GÉNESIS 19

Sodomatapish, Gomorratapish chingachishcamanta

1Ña chishiyagricucpimi, ishcai angelcunaca Sodoma puebloman chayarca. Chai pueblo yaicunapimi Lotca tiyacurca. Angelcuna ricuricpica, paicunata chasquingapacmi jatarishpa pambacaman cumurirca. 2Chashna cumurishpaca:

—Ñuca amitocunalla, cancunata servic ñuca huasipi pacaringapac shamuichic, chaipi chaquitapish jahuanguichic. Cayaca ñanta catishpa ringuichicllami— nirca.

Shina nicpimi angelcunaca:

—Mana, cunan tutaca canzhallapimi pacarishun— nirca.

3Shina mana yaicusha nicpipish, Lot shamuichic nicurcallami. Shina nicucllapimi angelcunaca huasiman yaicurca. Lotca sumac micunata ruhuashpami, levadura illac tandatapish cararca. Shinami micurca.

4Ashtahuanpish paicuna manarac sueñungapac siriricpimi, Sodomamanta tucui gentecuna shamushpa, Lotpac huasita muyurcacuna. Huambracunamanta callarishpa, yuyaccunacamanmi tucui tandanacushpa muyurcacuna. 5Chaipimi Lotta cayashpaca:

—¿Maipitac cunan tuta cambacman shamuc runacunaca? ¡Paicunahuan sueñungapac canzhaman llucchi!— nirca.

6Shina nicpimi, Lotca paicunata tupangapac canzhaman llucshishpa, punguta huichcashpa, 7shayarishpaca:

—Ñuca huauquicunalla, cai jatun llaquitaca ama ruhuaichicchu. 8Uyaichic, carihuan manarac chayarishca ishcai ushitami charini. Paicunata canzhaman llucchisha, paicunataca cancuna munashcata ruhuaichiclla, ashtahuanpish cai ñuca huasipi pozaccunataca ama imata ruhuaichicchu— nirca.

9Shina nicpimi paicunaca:

—¡Caimanta anchuri! ¿Can maimanta shamucllachu ñucanchicta mandagringui? Cantacarin paicunata yallimi llaquichishun— nishpami, Lottaca macai callarirca.

Punguta paquingapacmi punguman cuchuyarca. 10Shina ruhuacucpimi, chai ishcai pozaccunaca Lotta aisashpa, ucuman yaicuchishpa, punguta huichcarca. 11Huasi pungupi cac gentecunataca huambracunamanta callarishpa, yuyaccunacamanmi mana ricucta ruhuarca. Chaimantami chai gentecunaca punguta mashcacushpalla shaicurcacuna.

12Chaimantami chai ishcai pozaccunaca Lottaca:

—¿Caipica maijan familia ashtahuan tiyanracchu? Cambac churicunatapish, ushicunatapish cusacunandi, caipi tiyac tucui familiacunatapish caimanta llucchi. 13Cai pueblotaca chingachigrinchicmi. Cai pueblopi causaccunaca allita mana allita ruhuaccunami nishpa caparishcaca Mandac Diospac ñaupamanmi chayashca. Chaimantami Mandac Diosca caipi causaccunata chingachichun, ñucanchictaca cacharca— nirca.

14Chaimanta Lot llucshishpa, paipac ushicunahuan cazaragricuc yernocunataca:

—¡Mandac Diosca cai llactata llaquichigrinmi! Chaimanta jatarichic, llucshichic— nirca.

Shina nishcaca paipac yernocunamanca burla shinallami carca. 15Ña achicyamucucpimi, angelcunaca Lottaca:

—¡Cai llactata llaquichicpi, mana huañungapacca jatarishpa, cambac huarmitapish, caipi cac ishcai ushicunatapish apashpa, utca llucshi!— nirca.

16Lot mana utcacpimi, chai ishcai angelcunaca Mandac Dios llaquishcamanta paitapish, paipac huarmitapish, ishcai ushicunatapish maquimanta aisashpa, chai llactamanta canzhaman llucchirca. 17Chashna llucchishpaca:

—Cancuna quishpirisha nishpaca, ama huashata chapanguichicchu. Shinallatac chai pambacunapipish ama shayaringuichicchu, ashtahuanpish urcupi miticugrichic, mana cashpaca huañunguichicmi— nirca.

18Shina nicpimi Lotca:

—Ñuca amitocunalla, mana ri pudishachu. 19Cancunata servic ñucaca cancunapac ñahuipica allimi ricurishcani. Huañuimanta quishpichishpami, mai cuyashcata ricuchishcanguichic. Shina cacpipish, urcuman miticungapac mana ri pudishachu. Manarac chayacpimi, llaqui japishpa huañuchinga. 20Riqui, ñuca miticungapacca chai cuchullapimi shuc uchilla llacta tiyan. Chai uchilla llactapi ñuca miticugrichun saquichiclla. Chaipimi mana huañushpa quishpichisha— nirca.

21Shina nicpimi, paicunapuramanta shucca:

—Riqui, can mañashcata uyashcanimi. Can mañashcamantaca can mañashca llactataca mana tucuchishachu. 22Chaipi utca miticungapac callpai. Can chaiman chayangacamanca, imata mana ruhuashachu— nirca.

Chai llacta uchilla cashcamantami Zoar shuti saquirirca.

23Ña inti llucshicucpimi, Lotca chai Zoarman chayarca. 24Shina cacpica, Mandac Diosca Sodomapipish, Gomorra pueblopipish jahua pachamanta azufrehuan rupacuc ninatami tamyachirca. 25Chashnami chai llactacunatapish, chaipi causaccunatapish, tucui pambacunatapish, chaipi pucushca granotapish tucuchircami. 26Chaita Lotpac huarmi tigrarishpa ricushpaca, cachi rumi tucushpami saquirirca.

27Cayandi tutamantaca Abrahamca Mandac Dios-huan parlanacushca pushtumanmi rirca. 28Chaiman chayashpami, Abrahamca Sodomamantapish, Gomorramantapish, tucui pambacunamantapish hornomanta cushni llucshicuc shinata ricurca. 29Chashna chai pueblocunata, pambacunata tucuchishpapish Diosca Abrahamta yuyarishpami, Lotta chingarigricuc pueblomanta llucchishpa quishpichirca.

30Ashtahuanpish Lotca Zoarpi causanata manchashpami, paipac ishcai ushicunandi huichaiman rishpa, urcupi causangapac rirca. Chaipica shuc machaipimi ishcai ushicunandi causai callarirca. 31Chaipimi punta ushica quipa ushitaca:

—Ñucanchic taitaca ña yuyacmi, maijan cazarashpa huahuayuc tucuc shina, ñucanchicpish cazarangapacca cai llactapica caricunaca mana tiyanchu. 32Cunanca, ñucanchicpish huahuata charingapacca ñucanchic taitaman vinota ubiachishpa, machachishpa paihuan sueñushun. Chashna sueñushpami, taitamanta huahua huahuacunata charishun— nirca.

33Chai tutallatacmi punta ushica vinota ubiachishpa, paipac taitahuan sueñurca. Ashtahuanpish taitaca ima horas siririshcatapish, ima horas jatarishcatapish mana yacharcachu. 34Cayandi punzhaca punta ushica quipa ushitaca:

—Riqui, caina tutaca ñucanchic taitahuanmi sueñurcani. Cunan tutapish cutinllatac vinota ubiachishpa machachishun, paihuan sueñungui. Chashna sueñushpami, ñucanchic taitamanta huahua huahuacunata charishun— nirca.

35Chai tutaca cutinllatacmi taitaman vinota ubiachishpa, quipa ushica taitahuan sueñurca. Ashtahuanpish taitaca ima horas siririshcatapish, ima horas jatarishcatapish mana yacharcachu. 36Chashnami Lotpac ishcai ushicunaca taitapacta huicsayuc tucurca. 37Punta ushica shuc cari huahuatami charirca. Chai huahuataca Moabtami shutichirca. Paimi cunan punzha causac moabitacunapac taitaca can. 38Chai shinallatacmi quipa ushipish shuc cari huahuata charirca. Chai huahuataca Ben-amitami shutichirca. Paimi cunan punzha causac amonitacunapac taitaca can.

Currently Selected:

GÉNESIS 19: QCA10

Highlight

Copy