GÉNESIS 18
18
Dios Abrahamman shuc huahuata cusha nishcamanta
1Abrahamca Mamre pambapi tiyac encina yura ladopi causacushpami, chaupi punzha rupai yalli cacpi, carpa huasi pungupi tiyacurca. Chaipimi Mandac Diosca encina yuracuna cuchupi paiman ricurirca. 2Abraham huichailla ricushpaca, paipac ñaupapi quimsa runacuna shayacuctami ricurca. Abraham chaita ricushpa, chai carpa huasi pungumanta callpa rishpa, paicunahuan tupashpa, pambacaman cumurishpaca:
3—Amito, ñuca cambac ñahuipi alli ricurishca cacpica, ñuca huasi cuchumanta ama utca richuyari. 4Cancunapac chaquita jahuangapac yacuta apamungacaman shuyaichic, quipaca yura llandupi samaringuichic. 5Cancuna micuchunca, asha micunata apamugrisha. Ña micushpaca ringuichicllami. Cancunata servic ñucapac huasi ladota pasacushpaca micushpami rina canguichic— nirca.
Shina nicpimi paicunaca:
—Can nishca shina ruhuailla— nirca.
6Shina nicpimi, Abrahamca carpa huasi ucuman callpashpa Sarataca:
—Chuscu chunga libra alli harinamanta tandata ruhuashpa, utca cusai— nirca.
7Abrahamca huagracuna shayanaman rishpami, shuc ashtahuan alli becita acllashpa yanuchun, servic runaman curca. 8Abrahamca lechetapish, mantequitapish, yanushca beci aichatapish apamurcami. Abrahamca paicuna micungacamanca yura ladopimi shayacurca.
9Chai quipaca runacunaca:
—¿Maipitac cambac huarmi Saraca?— nirca.
Chashna tapucpimi Abrahamca:
—Carpa huasi ucupimi— nirca.
10Shina nicpimi paicunaca:
—Cunan shina shamuc huatami caiman cutimusha. Chaica, chashnatacmi canga. Chai punzhami cambac huarmi Saraca shuc cari huahuata charinga— nirca.
Chashna parlanacucuctaca Saraca Abrahampac huasha carpa huasi pungupimi uyashpa shayacurca. 11Abrahampish, Sarapish ña yallita yuyaccunami carca. Shinallatac Saraca quilla ungüitapish ña mana ungucchu carca. 12Chaimantami Saraca paipac shungullapi asishpaca: «Ñucapish, ñuca cusapish ña yuyaccunami canchic. Chashna cashpaca, ¿maitatac ñuca cusahuan chayarina munaitaca charishayari?» nirca. 13Chaimantami Mandac Diosca Abrahamtaca:
—¿Ima nishpatac Saraca: “Ña yuyacca, ¿maitatac huahuayuc tucushayari?” nicun? 14Mandac Diosmanca, ¿imapish mana ruhuaipacca tiyanchu? Cunan shina shamuc huata ñuca cutimucpica, Saraca ñami shuc cari huahuata charinga— nirca.
15Shina nicpimi, Sara manchaihuan cashpaca:
—Ñucaca mana asicurcanichu— nishpa llullarca.
Shina nicpimi, Mandac Diosca:
—Mana chashnachu, asircanguitacmi— nirca.
Abraham Sodoma pueblomanta mañashcamanta
16Chai quipami angelcunaca shayarishpa, Sodoma puebloman ri callarirca. Chashna rigricpimi, Abrahamca ashata compañashpa rirca. 17Chaipimi Mandac Diosca: «Ñuca imata ruhuagricushcataca Abrahammanca, ¿mana huillashpa pacashachu? 18¿Paimanta alli sinchi, jatun llacta tucugricucpi, shinallatac tucui cai pachapi causaccuna paimanta bendiciashca cagricucpichu mana huillana cani? 19Abraham tucui paipac causaipi huahuacunamanpish, huahuapac huahuacunamanpish ñuca yachachishcata yachachigricucta, imapish alli cashcallata ruhuanata yachachigricuctami yachani. Shina cacpica, ñuca imallata Abrahamman cusha nishcataca pactachishcami canga» nishpa yuyarca. 20Chaimantami Mandac Diosca:
—Cai Sodomapi, Gomorrapi causaccunaca yallita millai gentecunami nishpa caparinacuctami uyani. Paicunapac juchacunaca yallitami miraricun. 21Cunanca, ñuca uyashca shina, paicuna yallita millaita ruhuashcata, mana cashpaca mana ruhuashcata ricungapacmi rigrini. Chashna rishpami allita yachasha— nirca.
22Angelcuna chaimanta rishpaca, Sodomamanmi yaicugrirca. Shina ricpipish, Abrahamca Mandac Diospac ñaupamanta mana anchurircachu. 23Chaimantami Abraham cuchuyashpaca:
—¿Allita ruhuaccunatapish, Diosta mana cazuccunahuan pactachu llaquichigringui? 24Chai mana allita ruhuaccunapurapi pichca chungallapish allita ruhuaccuna tiyacpica, paicunata llaquishpa, ¿manachu perdonangui?
25Can Diosca tucui cai pachapi allita ruhuacmi cangui. Chashna cashca jahuaca, ¿allita ruhuaccunataca Diosta mana cazuccunahuan pactachu chingachingui? Chaitaca jaicapi mana ruhuanguichu— nirca.
26Shina nicpimi, Mandac Diosca:
—Sodoma pueblopi allita ruhuaccuna pichca chungallapish tiyacpica, paicunata cuyashcamantami, tucui chaipi causaccunataca perdonasha— nirca.
27Shina nicpimi Abrahamca:
—Riqui, ñucaca ñuto allpa shina, uchupa shina cashpapish ñucata Mandac Dios-huanmi parlai callarini. 28Cashcata ruhuac pichca chungapac pichca illacpica, ¿chai pichca illashcamanta chaipi tucui causaccunata chingachinguichu?— nirca.
Shina nicpimi paica:
—Chuscu chunga pichca tiyacpica, mana chingachishachu— nirca.
29Cutinmi Abrahamca:
—¿Caipi chuscu chungallapish tiyacpica?— nirca.
Shina nicpimi paica:
—Chuscu chungallapish tiyacpica, paicunata llaquishcamantami mana imata ruhuasha— nirca.
30Shina nicpimi Abrahamca:
—Ñuca Mandac Dioslla, cutin parlai callaricpica, ama piñaringuichu. ¿Caipi quimsa chungallapish tiyacpica?— nirca.
Shina nicpimi paica:
—Quimsa chunga tiyacpipish, mana imata ruhuashachu— nirca.
31Shina nicpimi Abrahamca:
—Riqui, ñuca Mandac Dioslla, yalli parlashpami canta piñachi callarini. ¿Ishcai chungallapish allita ruhuaccuna tiyacpica?— nirca.
Shina nicpimi paica:
—Ishcai chungata llaquishcamanta mana chingachishachu— nirca.
32Shina nicpimi, cutinllatac Abrahamca:
—Ñuca Mandac Dioslla, ama piñaringuichu, ña caillahuanmi tapugrini. ¿Chungallapish tiyacpica?— nirca.
Shina nicpimi, Mandac Diosca:
—Chungallapish tiyacpica, paicunata llaquishcamanta mana chingachishachu— nirca.
33Mandac Dios Abrahamhuan parlanata tucuchishpaca, rircallami. Abrahampish pai causacushcamanmi cutirca.
Currently Selected:
GÉNESIS 18: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
