GÉNESIS 20

Abrahammantapish, jatun mandac Abimelecmantapish

1Abrahamca pai causacushca llactamanta rishpaca, Neguev llactamanmi chayarca. Chaipimi Cades-huan, Shur shitashca pambahuan tupanacuipi tiyac Gerarpi asha punzhacunata causarca. 2Abrahamca chaipica paipac huarmi Sarataca: «Ñuca panimi» nicmi carca. Chaimantami Gerar llactata jatun mandac Abimelecca Sarata apamuchun cacharca. 3Ashtahuanpish Dios tuta muscuipi ricurishpami, jatun mandac Abimelectaca: «Riqui, chai huarmita apamushcamantaca huañugringuimi. Chai huarmica cusayucmi» nirca.

4Ashtahuanpish Abimelecca Abrahampac huarmi Sarapi manarac chayarishca cashcamantami paica: «¿Mandac Dioslla, ima millaita mana ruhuashca cacpipish huañuchinguichu? 5¿Manachu Abrahamllatac: “Ñuca panimi” cutin huarmica: “Ñuca turimi” nirca? Chaimantami ñuca chuya maquihuan, alli shunguhuan apamushpa, chaita ruhuarcani» nirca.

6Shina nicpimi, Mandac Diosca muscuipi ricurishpaca: «Ari, can alli shunguhuan chashna ruhuashcataca yachanimi. Chai huarmipi chayarishpa, ñuca mandashcata paquishpa, juchallichunpish cantaca mana saquircanichu. 7Cunanca, cai huarmita paipac cusaman cutichi. Paica ñuca ima nishcata huillacmi. Paica can ama huañuchunmi, ñucata mañanga. Cai huarmita mana cutichishpaca, canpish, canhuan causaccunapish huañunguichictacmi» nirca.

8Shina nicpimi, jatun mandac Abimelecca tutamanta jatarishpa, tucui paita serviccunata cayashpa, ima shina muscushcata huillarca. Shina huillacpica, yallitami chai serviccunaca mancharirca. 9Chai quipa Abimelecca Abrahamta cayachishpaca:

—¿Imatatac ruhuarcangui? Ñucatapish, ñuca mandacuc llactatapish jatun juchata ruhuachingapac shamuchunca, ¿ñucanchicca cantaca ima millaitatac ruhuashcanchicyari? Mana ruhuana cashcatami ruhuashcangui. 10¿Ima yuyaihuantac caita ruhuarcangui?— nirca.

11Shina nicpimi Abrahamca:

—Caipica Diosta manchaccunaca mana tiyanchu. Shina cashpaca, ñuca huarmita quichungapac ñucata huañuchingami yuyarcanimi. 12Caita ningapacca ñuca mamamanta mana pani cashpapish, ñuca taitamantaca panimi. Chaimantami paihuan cazararcani. 13Ñuca taitapac huasimanta llucshishpa, caita chaita purichun Dios mandacpica, ñuca huarmitaca: “Canca, mai llactaman chayashpapish ñucataca: ‘Paica, ñuca turimi’ ningui” nircani— nirca.

14Abimelecca Abrahamman paipac huarmi Sarata cutichishpaca, ovejacunatapish, vacacunatapish, servic caricunatapish, servic huarmicunatapish curcami. 15Chashna cushpapish Abimelecca Abrahamtaca:

—Riqui, ñuca llactaca cambac ñaupapimi. Can maipi munangui, chaita acllashpa causagrilla— nirca.

16Shinallatac Sarataca:

—Riqui, cambac turimanca huaranga cullquitami curcani. Chai cullquimi canhuan cac tucui gentecunapac ñaupapi yuranlla paño shina, chuya cashcata ricuchinga. Chaimantami cantaca pi mana juchanchinga— nirca.

17Chaimantami Abrahamca Abimelecmantapish, paipac huarmimantapish, paita servic huarmicunamantapish Diosta mañarca. Chashna mañacpica alliyarcami, shinallatac huarmicunaca cutinllatac huahuacunayuc tucurcami. 18Abimelec Abrahampac huarmi Sarata apashcamantami Mandac Dios Abimelecpac huasipi causac huarmicunataca huahuata mana charic pudicta ruhuarca.

Currently Selected:

GÉNESIS 20: QCA10

Highlight

Copy