AMÓS 6
6
Mana cazuc israelcunata tucuchinamanta
1¡Sionpi cushilla causaccunalla,
Samaria urcupi imatapish
mana manchashpa causaccunalla!
Tucui llactamanta ashtahuan
alli nishca mandaccunami
canguichic.
Chaimantami israelcunaca
cancunapacman shamun.
2Cancunaca Calne llactaman
rishpa ricuichic.
Chaimantaca Hamat
llactaman richic.
Chai quipaca filisteocuna
causana Gat llactaman richic.
Cancunaca, ¿chai llactacunata
yallichu canguichic?
¿Chai llactacunata atishpa,
ashtahuan jatun llactapichu
causanguichic?
3Cancunaca “Llaqui punzhaca mana
shamungachu” yuyarircanguichicmi.
Shina cashpapish, llaqui
punzhamanmi cuchuyacunguichic.
4Marfil camacunapimi
sueñunguichic.
Maltón cari ovejacunata,
maltón huira animalcunatami
micunguichic.
5Arpapi tocashpami cantanguichic.
David shinami, ima tocanacunata
ruhuanguichic.
6Vinotapish jatun vasocunapimi
ubianguichic.
Valishca mishquilla
ashnacuc-huanmi cahuiringuichic.
Josepac huahua huahuacuna
llaquita tucushcataca
mana llaquinguichicchu.
7Cunanca, prezu riccunapac
ñaupatami ringuichic.
Chashna ricpimi, cancunapac
munashcata ruhuashpa
cushicunaca tucuringa.
8Tucuita ruhuac,
tucuita Mandac Dios paipac
shutipi ari nishpaca:
«Jacobopac jatun tucushca
huahua huahuacunataca
mana ricunayachinichu.
Mandashpa tiyana huasicunatapish
millanayanmi.
Chaimantami chai llactataca
chaipi tucui tiyaccunandi,
paicunata piñaccunapac
maquipi churasha» ninmi.
9Chai punzhapica chunga
runacuna shuc huasipi
saquirishpaca huañungami.
10Chai huañushcataca
shuc aillullami
tucuita tandachinga.
Shinami huasimanta tullucunata
llucchishpa rupachinga.
Chai huasi ucupi cac runataca:
«¿Manachu maijanpish canhuan
saquirirca?» ningami.
Shina nicpimi, chai runaca:
«¡Mana pipish saquirircachu!» ningami.
Shina nicpica: «Upalla cai,
Mandac Diospac shutitaca
mana rimanachu» ningami.
11Mandac Diosmi
jatun huasicunata urmachichun,
chai huasi pircacunatapish
urmachichun mandanga.
12¿Caballocunaca rumi
quingraita callpanchu?
¿Mama cuchata yuntahuan yapunchu?
¡Cancunaca allita ruhuashpa
causanataca venenota shinami
ruhuashcanguichic!
¡Cashcata ruhuashpa causanataca
jayac ajenjota shinami
ruhuashcanguichic!
13Cancunaca yangami cushicushpa:
«Lodebar llactataca ñucanchic
alli yachac cashcamantami
mandacunchic» ninguichic.
14Chaimantami tucuita
Mandac Diosca:
«Israelcuna uyaichic.
Cancunata llaquichichunca
shuctac llactatami jatarichisha.
Chai llactaca Lebo-hamat
llactaman yaicunamanta
Arabá llacta jatun yacu
ladocamanmi llaquichinga» ninmi.
Currently Selected:
AMÓS 6: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
