AMÓS 5
5
Diospacman llaquirishpa cutirinamanta
1Israelcunalla,
ñuca rimashcata uyaichicyari.
Cancunamanta huacashcata
uyaichicyari.
2¡Carihuan manarac chayarishca
soltera shina israelcunaca,
jaicapi mana cutin
jataringapacmi urmashca!
Pipish mana jatarichishcami
pambapi siricun.
3Mandac Diosca israelcunataca:
«Macanacungapac huaranga
runacunahuan llucshishpaca,
patsacllahuanmi cutinga.
Cutin patsac runacunahuan
llucshishpaca, chungallahuanmi
cutimunga» ninmi.
4Chashna cacpipish,
Mandac Diosca israelcunataca:
«Ñucapacman shamuichic,
causanguichicmi.
5Bet-elmanpish, Gilgalmanpish
ama yaicunguichicchu.
Beersebamanpish
ama pasaichicchu.
Gilgalpi causaccunataca
prezu apangami.
Bet-el llactaca
tuñishcami canga» ninmi.
6Mandac Diospacman cuchuyaichic,
causanguichicmi.
Pacta Josepac
huahua huahuacuna shina,
ninapi rupanguichicman.
Pacta pipish ninata
mana huañuchicpi,
Bet-el llacta tucui rupanman.
7¡Cancunaca cashcata ruhuanataca
jayac ajenjota shina
ruhuashpami, imapacpish
mana valichinguichic!
8Pléyades, Orión lucerocunatapish
ruhuac Mandac Diospacman
cuchuyaichic.
Paimi tutataca punzhata,
punzhataca amsata ruhuan.
Paimi mama cucha
yacuta cayashpa,
allpapi tallin.
¡Paipac shutica Mandac Diosmi!
9Paica, sinchi runacunata
tucuchishpa, muyundita
jatun pircahuan pircashca
plazatapish urmachinmi.
10Cancunaca llacta pungupi
cunac runatapish,
cashcata rimactapish
mana ricusha nishpa
millarcanguichicmi.
¡Aij imachari tucunguichic!
11Huacchacunata llaquichishpami,
impuestotaca carga trigota
japircanguichic.
Chaimanta labrashca
rumicunahuan ruhuashca
huasipipish, mana
causanguichicchu.
Sumac uvas chagrata
charishpapish, mana vinota
ubianguichicchu.
12Ñucaca cancuna yallita
mana cazushcatapish,
yalli millaita
ruhuashcacunatapish,
cashcata ruhuac runata
llaquichishcatapish,
imata pacalla japishcatapish,
juezcunapac ñaupapi
huacchacuna japinata
quichushcatapish yachanimi.
13Chai punzhacuna
mana alli cashcamanta
alli yuyaiyuc runaca upallami.
14¡Mana alli ruhuanapac randica,
alli ruhuanata munaichic!
Chashna ruhuashpaca
causanguichicmi.
Cancuna nishca shinallatacmi
tucuita Mandac Diosca
cancunahuan canga.
15Mana alli ruhuanata
millanayachishpa,
allita ruhuanata munaichic.
Taripashpaca, cashcata ruhuaichic.
Chashna ruhuacpi,
tucuita Mandac Diosca
maijan saquirishca
Josepac huahua huahuacunata
llaquingapishchari.
16Tucuita Mandac Diosca:
«Tucui plazacunapimi
huacai tiyanga.
Tucui ñancunapimi:
“¡Aij, aij!” nishpa huacanga.
Trabajac runacunatapish,
allita huacanata yachaccunatapish
huacachunmi cayanga.
17Ñuca cancunapac chaupita
pasacucpica, tucui uvas
chagracunapimi huacai tiyanga.
18¡Aij, Mandac Dios shamuna
punzhata shuyaccunalla!
Pai shamuna punzhaca
achic canapac randica
tutami canga.
¿Imapactac Mandac Dios
shamuna punzhata shuyanguichic?
19Chai punzhapica leonta
manchashpa callpacushpaca,
osohuanmi tupanga.
Huasiman yaicushpa,
pircapi tuparishpaca,
culebrapimi taunallinga.
20¿Manachu Mandac Dios
shamuna punzhaca
achic canapac randica,
pura tuta canga?
Puyu tutayashcami canga.
Achicca mana tiyangachu.
21Cancunapac jatun fiestacunataca
millanayachishpami,
mana ricunayachircani.
Cancunapac jatun
tandanacuicunahuanca
mana cushicushachu.
22Ñucaman animalta cushpa
tucui rupachicpipish,
ofrendata cucpipish,
mana chasquishachu.
Ñucahuan alli tucungapac
huira animalta ñucaman cucpica,
ricunallatapish mana ricushachu.
23Tocaccunatapish
ñuca ladomanta anchuchichic.
Chai tocashcacunaca
mana uyasha ninichu.
24Ashtahuanpish allita
mandanaca yacu shina
callpacuchun.
Cashcata ruhuanaca
mana tucuric callpacuc
yacu shina cachun.
25Israelcunalla, cancuna
shitashca pambapi
chuscu chunga huatata
puricushpaca, ¿ñucaman animalta
cushpa huañuchircanguichicchu?
¿Ofrendatapish curcanguichicchu?
26Ashtahuanpish Moloc,
Quiún dioscunatami
ñucata yuyarina huasimanca
huandushpa aparcanguichic.
Cancuna ruhuashca
lucerocunatami aparcanguichic.
27Chaimantami cancunataca
Damascomanta ashtahuan
chimbaman apachun saquisha.
Chaitaca Mandac Dios
ñucami nini» ninmi.
Paipac shutica tucuita
Mandac Diosmi.
Currently Selected:
AMÓS 5: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
