AMÓS 7
7
Quimsa cutin llaquichinata muscuipi shina ricushcamanta
1Caitami Mandac Diosca muscuipi shina ricuchirca. Jatun mandacpac quihuata pitishca quipa, cutin quihua retoñacucpimi, achca langosta Mandac Dios achca langostacunata cachacucta ricurcani 2Chai langostacuna tucui llactapi quihuata micushpa tucuchicpimi ñucaca: «¡Mandac Dioslla, cunanca paicuna mana allita ruhuashcata perdonaiyari! Jacobopac huahua huahuacunataca, ¿pitac ayudangayari? Paicunaca uchillami» nircani. 3Shina nicpimi, Mandac Diosca llaquirishpaca: «Mana chashna cangachu» nircami.
4Mandac Diosca caitapish ricuchircami. Mandac Dios ninahuan llaquichishpa, taripangapac tandachicuctami ricurcani. Chai ninami mama cuchatapish, llacta achca allpatapish rupachircani. 5Chaimantami ñucaca: «¡Mandac Dioslla, cai ninataca cunanllata huañuchiyari! Jacobopac huahua huahuacunataca, ¿pitac ayudangayari? Paicunaca uchillami» nircani. 6Chaimantami Mandac Diosca llaquirishpaca: «Mana chashna cangachu» nirca.
7Mandac Diosca caitapish ricuchircami. Mandac Dios plomadahuan ruhuashca pirca jahuapi shayacuctami ricurcani. Paica albañilpac plomadatami charicurca. 8Mandac Dios chaita ricuchishpaca:
—Amós, ¿imatatac ricucungui?— nirca.
Shina tapucpimi ñucaca:
—Albañilpac plomadatami ricucuni— nircani.
Shina nicpimi, Mandac Diosca:
—Cai albañilpac plomadahuanmi ñuca acllashca israelcunataca ricugrini. ¡Paicunataca mana ashtahuan llaquishachu! 9Isaacpac, israelcunapac dioscunata yuyarina altarcunaca tucuringami. Paicunapac dioscunapac huasicunaca shitashca pambami saquiringa. Jerobopac aillutaca espadahuanmi huañuchisha— nirca.
Amosmantapish, Amasiasmantapish
10Chaimantami Bet-elpi causac Amasías curaca israelcunata jatun mandac Jeroboamman huillachun cachashpaca: «Amosmi israelcunapac chaupipi canta piñashpa jatarishca. ¡Pai huillashcataca cai llactapi causaccunaca ña mana ashtahuan uyasha ninchu! 11Chai Amosca: “Jeroboamtaca espadahuanmi huañuchinga. Israelcunatapish paicunapac llactamanta prezumi apanga” ninmi ningui» nirca.
12Chaimantami Amasiasca Amostaca:
—Dios ricuchishcata huillac caimanta llucshishpa, Judá llactallaman ri. Chaipi Dios huillashpa micunatapish charigri. 13Ama ashtahuan Bet-elpi huillaichu. Caipimi jatun mandacca Diosta mañan. Cai llactaca llactata mandana jatun llactami— nirca.
14Shina rimacpimi, Amosca Amasiastaca:
—Ñucaca, mana Dios ima nishcata huillacchu cani, mana huillacpac churichu cani. Ashtahuanpish huagrata michishpa, sacha higota pallacmi cani. 15Shina cacpipish, Mandac Diosmi ñuca huagrata michicucpi cayashpaca: “Ñuca ima nishcata ñuca acllashca israelcunaman huillagri” nirca. 16Cunanca Mandac Dios ima nishcata uyai. Canca ñucataca: “Ama israelcunata llaquichishpa huillaichu. Ama Isaacpac huahua huahuacuna llaquichishpa parlaichu” ninguimi. 17Chaimantami Mandac Diosca: “Cambac huarmica caipimi cullquimanta huainayanga. Cambac churicunatapish, ushicunatapish espadahuanmi huañuchinga. Cambac allpatapish chaupingami. Canca juchahuan mapayashca llactapimi huañungui. Israelcunataca paicunapac llactamantami caru llactaman prezu apanga” ninmi— nirca.
Currently Selected:
AMÓS 7: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.