Iáno 13

Isúso Morela ĥerá Péskire Sykliaibnytkonénge

1Angíl svénko Patradí Isúso, syr džindiá, so javdiá pašyledýr mardó (štúnda) vaš Léske te mekel davá svéto i te risjol ke Dad, Léske jačné drieván dróga odolé, savé dživdé Lésa pe davá svéto, i kakaná Jov sykadiá sarí zor Péskire laskasa ke jone. 2Bel'velié, kiéli jone xanas, nálačho čhudiá myslia dro iló Judáske, Simonoskire čhavéske Iskariotoskireske te zdel Isusós. 3Isúso džindiá, so Dad saró otdyjá dre Léskire vastá, i so Jov javdiá Devléstyr i risjola ke Devél. 4Isúso uštyjá skamindestyr, zlyjá Péstyr upratuno uribén, lyjá rušnika (khosno) i podphandiape lása. 5Paló (poslie) Jov čhudiá paní dro moribnaskiro čaró i lyjá te morel ĥerá sykliaibnytkonénge i te khosel rušnikasa, savjása Jov sys podphandlo. 6Kiéli Jov podgíia ke Símono Pétri, odová rakiréla Léske: “Rajo Dévla! Tu javésa te mores ĥerá mánge? 7Isúso otphendiá léske: “So Me keráva, kakaná tu na ĥaljosa, ne saró tu ĥaljosa korigedýr.” 8Pétri rakiréla Léske: “Tu nijékhvar na vymoresa ĥerá miré.” Isúso otphendiá léske: “Kóli Me na vymorava túke ĥerá, tedy tu na san Mánca khetané dre paš.” 9Tedy Pétri rakiréla Léske: “Rajo Dévla! Mor, na jekh ĥerá i vastá miré, ne i šeró.” 10Isúso rakiréla Léske: “Žužé (čystone) manušéske trej jekh ĥerá te vymorel, pal-dová so jov isyn žužó; i tumé san žužé, ne na saré. 11Pal-dová so Jov džindiá Péskires zdyibnaris, paldavá adiáke i phendiá, so na saré jone sys žužé. 12Ne kiéli Isúso vymordia lénge ĥerá i uridia Péskiro uribén, Jov besciá pe Péskiro štéto i phendiá lénge: “Ci tumé na džinéna, so Me kerdjom vaš tuménge? 13Tumé Man kharéna “Sykliakiribnáskiro” i “Devél”, i mištó keréna, pal-dová so Me adasavó i Som. 14I kóli Me, Devél i Sykliakiribnáskiro vymordjom tuménge ĥerá, adiáke-pac' i tuménge trej te moren ĥerá jekh jekhéske. 15Me dyjom tuménge primiéro (sykaibén), sob (kaj) i tumé te kerén adiáke-pac', so Me kerdjom tuménge. 16Čačes, čačes Me rakiráva tuménge: dynári isyn na baredýr péskire Rástyr, i odová, kon bičhadó, nane baredýr odoléstyr, Kon bičhadiá les. 17Kóli tumé džinéna davá, tumé javéna bahtalé, kóli i javéna te kerén adiáke-pac'. 18Me na pal sarénde tuménge rakiráva. Me džinóm (džináv) odolén, savén Me vykedyjom; ne mek te spolninélpe Svénto Čhinybén: Odová, kon xála maró khetané Mánca, ĥazdyjá ĥerój pe Mánde. 19Kakaná Me rakiráva tuménge: angíl, syr davá spolninelape, sob (kaj) tumé te patián, so davá som Me. 20Čačes, čačes Me rakiráva tuménge: kon priléla odolés, konés Me bičhaváva, priléla Man; ne kon priléla Man, priléla Odolés, Kon bičhadiá Man.”

Isúso Angilphenela pal Péskiro Zdyiben

21Kiéli Isúso phendiá davá, Jov drieván piridživelas dro iló i dosykadia i vyphendia: “Čačes, čačes Me rakiráva tuménge, so jekh tuméndyr zdela Man.” 22Tedy sykliaibnýtka, dykhí jekh pe jekhéste, na džindlé, pal konéste Jov rakirdiá. 23Jekh Léskire sykliaibnytkonendyr, savó sys drógo Isusóske, sys paštó pašýl Isusóskiro kolýn. 24Símono Pétri podphendia šperása (znakosa) léske, sob (kaj) odová te phučel Léstyr, pal konéste Jov rakiréla. 25I sykliaibnýtko, syr priklonindiape ke Isusóskiro kolýn, phendiá Léske: “Rajo Dévla! Kon adavá isyn?” 26Isúso otphendiá: “Odová, konéske Me bolavava kotér maró i podava”, i Jov podyja kotér maró Judáske, Simonoskire-Iskariotoskire čhavéske. 27I tedy paló davá kotér, nálačho zagijá dre léste. Tedy Isúso phendiá léske: “So kerésa, ker sygedýr.” 28Ne nikón, kon sys beštó odój, na ĥalyjá, ke so Jov phendiá davá léske. 29Vari-savé léndyr dumindle, so, syr Judaste sys lovitko tyknori, paldavá Isúso rakirdiá léske: “Kin, so aménge trej ke svénko, ci sob (kaj) te das vari-so bogenge.” 30Juda lyjá kotér maró, i adáj že gijá javrí; i davá sys rat. 31Kiéli jov gijá, Isúso phendiá: “Kakaná Čhavó Manušéskiro slavindiape i Devél slavindiape dre Léste. 32Kóli Devél slavindiape dre Léste, tedy i Devél proslavinela Les dre Péste, i syg proslavinela Les. 33Čhavale Miré! Nábut Mánge jaciápe te javav tuménca. Tumé javéna te rodén Man, i syr Me phendjom Judénge: Karik Me džáva, tumé na moginéna te javén, adiáke Me i tuménge rakiráva. 34Me dáva tuménge nevó priphenybén: javén dróga jekh vaš jekhéske; syr Mánge, adiáke-pac' i tumé javén dróga jekh vaš jekhéske. 35Pir davá udžinena saré, so tumé san Miré sykliaibnýtka, kóli javéla láska maškír tuménde.”

Isúso Angilphenela pal Léskiro Otphenybén

36Símono Pétri phendiá Léske: “Rajo Dévla! Karik Tu džása?” Isúso rakiréla léske: “Karik Me džáva, túke naštý (na moginésa) te džas kakaná pal Mánde, ne korigedýr džása pal Mánde.” 37Pétri phendiá Léske: “Rajo Dévla! Sóske Mánge naštý te džav pal Túte kakaná? Me čhuváva péskiro iló pal Túte.” 38Isúso otphendiá léske: “Čhuvésa iló péskiro pal Mánde? Čačes, čačes Me rakiráva túke: na probagala bašno, syr tu trin móly otphenesape Mándyr.”

Currently Selected:

Iáno 13: ROMBALTR

Highlight

Copy