Zakaria 14
14
1WA bi, ame he ka o bong bongu Iehova, ke adre me he ka khenâ hnyi wanbâm hna söh. 2Anyin oge me he ka ûkhacaköuâ ta je hnyei hia ûcon Jerusalema he ka vat; ke adre me he ka hûgûnâ taun, me söh je uma, me okongoâ omomo: ke adre me he ka hom bâ hafiny taun, ke adre me ca he ka subâ degecâ ûnyi hnyi taun kolon tavat. 3Ke haba Iehova ame he ka he but, me vat me je hnyei eling, helâji me hnen hna vat hnyi bonginy vat. 4Ke haba hnyi bong eling, me ame he li can ka tot hon bucen Elaio, cicö deiö Jerusalema, ke adre me he ka subâ luâ bucen Elaio hnyi wanben e deiö me jio, me ame he ka hu hnyigöulen bucen ae gan; ke ame he ke keihen bucen ka he ka hnyi hwadro, ke haba ke keihen ame he ka he ka hnyi hwaiöu. 5Ke öbun e he ka kec me gethen hnyi hnyigöulen anyik je bucen: anyin ame he ka he ke ne o but hnyi Azale hnyigöulen je bucen: eke, öbun e he ka kec helâji me hnobun hna kec ge hwiöi hnyi je bong bongu Uzia than Juda: ke ame he Iehova Khonguk ka o, ke ame he ka tha o möu tavat hia ae kap. 6Ke haba hnyi bong eling, ame ca he ka tha e bi lany me melam me menekholom: 7ke ame he ka khaca bong ae manen kö Iehova; ca lany bi, ke ca lit bi: ke so bi hnyi sahac ame he ka lany. 8Ke haba hnyi bong eling ame he ka di köiö möt ûheny Jerusalema; ame he ka di hanen ka hnyi köiö e deiö, ke ke hanen ka hnyi köiö e jio: ame he ka e bi hnyi honivakeny me hnyeun. 9Ke ame he Iehova ka Thaniny hmeledrany hia: hnyi bong eling ame he Iehova ka khaca thibi, ke khaca thibi ien. 10Adre me he ka wia hnyei hia me me helâ me dok ae tha hon hwân hnyi Geba ke ne o but hnyi Rimona ke keihen ka hnyi hwaiöuiny Jerusalema; ke adre me he ka ogöranyâ e, ke e ame he ka labâ iny, hwân hnyi homagouleny Beniamina ke ne o but hnyi hnen homagöule a bân, ke ne o but hnyi homagouleny kop, he hwân hnyi tap tue anyi Hananel ke ne o but hnyi hna hlic wan vine anyin than. 11Ke adre me he ka labâ e, ke ame ca he hmetu ka hnaûhango; kʼ ame he Jerusalema ka laba khötkic. 12Ke walang mok ae cap ame he Iehova ka kunâ ka tavat hia waleji adre me vat me Jerusalema: ame he ka aû tot je unyidra ödra ka he bi, ke ame he ka aû tot je emaködra hnyi je hnen, ke ame he ka aû tot je bohmödra hnyi je hnyimödra. 13Ke hnyi bong eling ame he ka gan imonumonuny gadra ûnyi ga Iehova; ke adre me he ka ûkötköuödra, me ûhaiköuâ je hnyamödra. 14Ke ame he Juda ka vat hnyi Jerusalema; ke adre me he ka ûkhöûna ta je omjeûiny hia je hnyei igigilo, gol, me sileva, me je ûkhaû, ae se hia hmonyin. 15Ke ame he ka ûcû mok ae cap anyin hors, me miul, me kamela, me asina, me ta je meno hia wale ame he ka he bi hnyi je hunuma eling, me mok eling ae cap. 16Ke haba je kolon ta je hnyei hia tavat adre me he ûcon Jerusalema, me adre me he bi ka he hnyi je huna he ka hnyi khudrung ka Than, Iehova tuhan sabaoth, me hnyi hanen bijeûiny uma mano. 17Ke haba aten je lapiny hmeledrany adre me ca hnyi he bi Jerusalema ai he ka hnyi khudrung ka Than Iehova tuhan sabaoth, me ame he bi ka ba we hobi kodra. 18Ke a ne ca hnyi he lap anyin Aigupito, me o but, me ame he ka ba we kodra; ame he ka e bi ling mok ae cap, wale hnö Iehova hna kunâ ka hnyi je hnyei adre me ca hnyi he me tuö bijeûiny uma mano. 19Wale konginy Aigupito me konginy je hnyei hia tavat adre me ca hnyi he me tuö bijeûiny uma mano. 20Hnyi bong eling ame he ka e hnyi je pate anyin je hors, ka habe, E KAP KO IEHOVA; ke ame he je öt hnyi uma umö Iehova ka helâ me je kaia cicö taben hut. 21Eke, ame he ka kap kö Iehova tuhan sabaoth je öt hia hnyi Jerusalema me Juda: ke ame he tavat bihut hia ka he me hom me ölâ: ke ame he ka ba hmetu bi at Kanana hnyi uma umo Iehova tuhan sabaoth hnyi bong eling.
Currently Selected:
Zakaria 14: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
