Zakaria 13
13
1HNYI bong eling adre me he ka oâ pupua ka lap anyi Davita me aten Jerusalema hobi kâu hulö me hwakecin ae ikiki. 2Ke hnyi bong eling haingö Iehova tuhan sabaoth, me oge me he ka ohia ta je ien je idola hnyi hnyei, mʼ adre me ca he hmetu ka ûnykûme ködrin: ke haba khaca oge me he ka obâ ta je perofeta me ta je hanu ae ikiki hnyi hnyei. 3Ke ame ne perofeta hmetu ke at, ke ame ne ba kâu hnen kamen me hinyen, a li at ödre hnokoâ, ka habe, U me ca he ka möt; anyin a u me ha thoi hnyi iö Iehova: ke e ka perofeta, me ame he kamen me hinyen a li at ödre hnokoâ ka dâoâ e. 4Ke hnyi ûen eling ame he ta je perofeta ka ve hmehma ge hnödra hna wâ, ödra ka perofeta; ke adre me ca he ka khavâ ûkhaû ae hu dinen he ka iyawö: 5ke adre me he ka ve ha, ka habe, Iny ca perofeta bi nya, ke iny at belök bi; anyin adre me thalûö nya kʼ iny tiga wanakat. 6Ke adre me he ka ha kâu, ka habe, Aat wanben li benyâm ahö? Me e ame he ka ha, ka habe, Wale hna kuc nya hnyi hnyaban je lahanök.
7Hele vat lö, hmak dö ka at ame tuö mamoe könya, me ûcon at ae ûcû mönya, haingö Iehova tuhan sabaoth: kot dö at ame tuö mamoe, me ame he ka ve se but ta je mamoe; ke oge me he ka wia hnyamök ka tavat ae ûhnyûkong. 8Ke haingö Iehova, ka habe, Haba hnyi hnyei hia, me adre me he ka subâ degecâ li ke keihen hnyin e mʼ adre me mokcu; ke ame he ka hnen biju hnyin e ke keihen a kuniny. 9Ke oge me he ka hom ke keihen a kuniny ka he hnyi wanben meic, me ânyâwiʼ ödra helâ me hna ânyâwia sileva, me cubic ödra helâ me hna cubec gol: ke adre me he ka hawâ iök, me oge me he bi nya ka ling ödra: ke oge me he ka ha, ka habe, Lakeik ödra; me adre me he ka ha, ka habe, Iehova Khonguhmun.
Currently Selected:
Zakaria 13: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
