Zakaria 12
12
1WALANG hok, wale hofuc ho Iehova ge Isaraela.
2Walang hna ha hnö Iehova at ame ulolo drany kʼ ame bi taben hmeledrany, me op hanon at eû hnyi hnyekon, ka habe, Wâ bi oge me he ka wia Jerusalema hnân kaiainy ta tot ka je hnyei hia igigilo, ke haba khaca me ame he ka e hon Juda hnyi hna igigilo Jerusalema. 3Ke hnyi ûen eling oge me he ka wia Jerusalema hnân veto ae hmak ka tavat hia; haba tavat adre me ka kap goranyai, me adre me he ka aat bi; ke ame he ka ûkhacaköu ûcon ta je hnyeiny hia hmeledrany. 4Hnyi bong eling, haingö Iehova me oge me he ka kot ta je hors hia ge uthmâhmâ, kʼame he ka monu bi at ame tabâ e: ke oge me he ka bwele ka wâ lap anyi Juda, ke oge me he ka owadruâ ta je hors hia haleny tavat. 5Ke ame he je taben hnyi Juda ka ha eû hnyi je hnyekudra, ka habe, Tang hwegiöhmun tavat adre me laba hnyi Jerusalema unyi Iehova tuhan sabaoth a Khongudrin. 6Hnyi bong eling oge me he ka wia je taben Juda me me helâ me hlogon öt hnyi wanben uto, me helâ me okûnû hnyi je thi hwit; ke adre me he ka an tavat hia igigilo, hnyi ke keihen metâ me me: ke ame be hmetu Jerusalema ka labâ hnen, wale hnyi Jerusalema. 7Ke ame he ka bö Iehova ka me omelö je uma mano umo Juda, me me ca görany hmanenanginy lap anyi Davita, me hmanenanginy aten Jerusalema hon Juda. 8Hnyi bong eling ame he Iehova ka söng aten Jerusalema; ke haba at ae sënyin gadra hnyi bong eling ame he ka helâ me Davita; ke ame he lap anyi Davita ka helâ me Khong, helâ me angela anyi Iehova hnyi hnyimaködra. 9Ke hnyi bong eling oge me he ka elâm he ka ohia ta je hnyei hia, tavat adre me hok vat Jerusalema ai. 10Ke oge me he ka hingâlâ hon lap anyi Davita me aten Jerusalema, hanuiny ibetengiö baû me hanuiny khöû; ke adre me he ka ō nya waleji adre dâ: ke adre me he ka tenge gan, helâ me at ame tenge ge nokon a khaca, ke adre me he ka vec gan, helâ me at ame vec ge nokon a bân. 11Hnyi bong eling ame he ka tenge thungaû hnyi Jerusalema, helâ me tenge thungaû hnyi Hadaderimona hnyi hnyigöulen bucen Megido. 12Ke ame he tavat ka tenge thungaû, ûsa khaca je lap hia; hake tavat thibi hnyi lap anyi Davita, me hake laöiödra thibi; hake tavat thibi hnyi lap anyi Nathana, me hake laöiödra thibi; 13hake tavat thibi hnyi lap anyi Levi, me hake je laöiödra thibi; me hake tavat thibi hnyi lap anyin at Simei, me hake laöiödra thibi; 14me kolon je lap hia, ke lap me ke lap a hake ödra thibi, me hake laöiödra thibi.
Currently Selected:
Zakaria 12: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
