Malaki 1
1
1WALANG hok wale a hofuc ho Iehova ka Isaraela a deny Malaki. 2Oge hia but betenge gabun, haingö Iehova. Ke haingöbun, ka habe, U je hai but betenge gahmun hnyi ieû? Hawa, ca kei Esau Jekob? haingö Iehova: ke oge me betenge ga Jekob; 3ke oge me höciö Esau, me wia anyin je bucen me me ba wan, me hna but jekhon ka ta je luko hnyi hnyebuba. 4Anyin a haba Edoma ame ha, ka habe, Adre hia but kiâ degeci ohmun, ke ohmun e he ka hmetu ka op je dok ae ba aten; ke walang hna ha hnö Iehova tuhan sabaoth, ka habe, Adre me he ka op, ke oge me he bi nya ka hagutâ hnyikânâi: ke ame he tavat ka hwenyi ödra, ka habe, Hnyigoulen hwakecin ae kong, ke Tavat ame hmonyin kodra Iehova nyiele balua. 5Ke ame he je emaköbun ka wâ, ke öbun e he ka ha, ka habe, E so adre me oganö Iehova hnyi je ke keihen hoton hnyigöuleny Isaraela.
6Haba nokon, me ame ogânâ kamen, ke athnyaba ame ogânâ tuhan: awe, a ne kamen bi nya, me ewa hna oganö nya? ke oge ne than, me ewa eang hna outö nya? haingö Iehova tuhan sabaoth köbun tavat bihut, tavat öbun e hûkötiâ iök. Ke haingöbun, ka habe, Ohmun e hawa ka hûkötiâ iâm? 7Anyin a öbun e hudo areto ae kong hon anyik taben hut. Ke haingöbun, ka habe, Ieû ohmun e okongu u hnyin? Anyin öbun e ha, ka habe, Haba laulau anyi Iehova, me ûnyi hnân hûkötiâ. 8Ke hnyi ûen öbun e hudo meno ae wadröu hnân hut, e ca hulö e! ke hnyi ûen öbun e hudo ta je meno ame ci, ke at ame takoû mok, e ca hulö bi e! Ham dö e walang ang ka tuhâm: hawa, e ame he bi ka senyin köu? hawa, e ame he ka kop u? haingö Iehova tuhan sabaoth. 9Ke walang, öbun na he ka sumâtâ thö Khong, me me he ka betenge gata: ke deny öbun ûnyi ang; hawa, e ame ca he ka kop öbun? haingö Iehova tuhan sabaoth. 10Nakainy ame ne hu ke at unyibun he ka hlöng je hwanuma, mʼ öbun e ca he ka vâc baûâ meic hon anyik taben hut! Haingö Iehova tuhan sabaoth, ka habe, Oge me ca senyin köbun, ke oge me ca he ka kap hnobun hna hudo. 11Anyin a hwân hnyi hna o hnen seûno ke ne o but hnyi hnen hna dit adre me he ka ogânâ iök hnen ta je Hnyei; ke haba hnyi je dok hia adre me he ka leû uto ae bo so ka iök, me hut ae so: anyin adre me he ka ogânâ iök hnen ta je Hnyei, haingö Iehova tuhan sabaoth. 12Ke öbun e okongoâ e, anyin a öbun e ha, ka habe, E kong ut laulau anyi Iehova, ke ikiki je wan ke jeû hon e. 13Ke haingöbun, ka habe, Wâ bi, ûnyi hnân höciâ! ke öbun e hia but hûkötiâ e, haingö Iehova tuhan sabaoth: ke öbun e hia but hom ûnyi adre me hûgûnâ, ke at ae kong can, ke hna takoû hnen mok; wale hut öbun e hom: hawa e ûcû könya he ka kap e ûnyi gabun? haingö Iehova. 14Ke e ka mok at iyawö, at ae hu baga hnyi haleny hnahat mamoe, ke e ame bi khöbi, me hudo at ae kong ka Than; anyin a iny than ae gan hmâ, haingö Iehova tuhan sabaoth, ke hnân outen iök unyin je Hnyei.
Currently Selected:
Malaki 1: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
