Mataio 21

1KE ödrin e hakekeny Jerusalema ai, kʼ ödrin e o but Bethefage hnyi bucen Elaio, ke haba Jesu ame kunâ li laten, 2haingen ködru, ka habe, He thʼ öbu ka hnyi taun cici öbu, me öbu me he ka wâ asina adre me noc, me nokon unyin: thang ut, me lelö thö jem könya. 3Ke ame ne he ke at ka fuc köbu, me ha thʼ öbu, ka habe, E hu hanymödru ge Than; me e ame he ka ie kunʼ ödru. 4Ke adre me ânyâ e, me me hwâdâ hna ha ge perofeta, ka habe,

5Ha thö ka hluiny Ziona, ka habe,

Wâ bi, ame o but köu Tuhâm,

At ae menyik, kʼ ame tabâ asina,

Ke nak asina, a nokon asina.

6Me ame he but li laten me ânyâ helâ me hna ha ködru ga Iesu, 7me lelö asina, me nokon, kʼ ödru me ip je ûkhaûidru hon li asina; me e ame laba hon. 8Ke haba tavat ae se hia adre me ulolo anyidra je ûkhaû eû hnyi gethen; ke haba keihen adre me sö je anginy ûö, me ave gethen. 9Ke haba tavat adre me bödra me tavat a bilidra, adre me kuku me ha, ka habe, Hosana ka Nöku Davita: Hnen hnahic at ame o but hnyi ien Than; Hosana ethö beönua. 10Ke hnyi ûen e ame o but hnyi Jerusalema me ame bwebwet bi taun hia, haingödra, ka habe, Ia e? 11Me ame ha tavat ae se hia, ka habe, Walang perofeta a Iesu ûheny Nazareta hnyi Galilaia.

12Ke haba Iesu ame didro hnyin uma kap umen Khong, me obâ hia tavat adre me ûcû hnyin uma kap, me hagutâ hnyikânâi ta je laulau anyin tavat wia mone, me je utap taben tavat adre me ûcû biny; 13me e ame ha kodra, ka habe, Adre hia but sihnalimen, ka habe, Adre me he ka hwenyi ien umök uma, me uma hnân hic: ke öbun e wia e me me op umen tavat venöu. 14Ke ame o but kâu ta je wadröu me ta je mat hnyi uma kap; me e ame omeli ödra. 15Ke haba je taben tavat bihut me hnyat sihnalimen adre me wâ ta je ûnyi hnân lâiâ e ame ânyâ, ke je wanakat adre me hongot hnyin uma kap, me ha, ka habe, Hosana ka Nöku Davita, me adre me hmönyidra, 16me ha kâu, ka habe, Hawa, u je long hnödrin hna ha? Haingö Iesu ame ha kodra, ka habe, Eke: öbun e ca munyi aû, ka habe, Ûnyi hnyi hnyimen ta je wanakat me ta je mendreng u je obekhötâ bi hna haisoâ. 17Me e ame hnʼ ödra but me he but ûheny hnyi taun Bethania ai, me mokut eling.

18Ke haba hnyi hnomakatu, e ame he hmetu ka hnyi taun ke ame mekihnânem. 19Me e ame wâ imeta hnyi baten gethen, me e ame he kâu, ke ba wan e ame wâ, ke je lan thibi; haingen kâu ka habe, U me ca he hmetu ka wa nyiele balua. Me ame ie meleca thö imeta. 20Ke a wâ but laten, me ödrin e lâiâ me ha, ka habe, E logot meleca thö imeta! 21Haba Iesu ame thu me ha ködrin, ka habe, E hnathu inya oge me ha köbun, öbun e ne hu labageju, me ca lolo bi hnyok, öbun e ca he ka hake ânyâ thibi hna ânyâ ka imeta, ke öbun e ne he ka ha ka bucen ang, ka habe, Bethe ok ut me ta but eû hnyi köiö, me ame he ka hwâdâ. 22Ke haba ta je ûnyi hia thithö öbun e he ka sumâtâ hnyi hic, öbun ka labageju, me öbun e he ka hu.

23Ke e ame o ka hnyi hnyin uma kap, me haba je taben tavat bihut me wahingatiny hnyei ödrin e o kâu hnyi ûen e ame tiga ûne, me haingödrin, ka habe, Hnen musi anyi ia u me ânyâ ta je ûnyi e? 24Haba Iesu ame thu me ha ködrin, ka habe, Oge me he bi nya ka hnei öbun ge ke hofuc, ke öbun ka thu thö könya, me oge me he ka ha köbun musi oge me ânyâ hnyin ta je ûnyi e. 25Haba hna bapataiso hnö Ioane me ûnyi ua? ûnyi hnyi drany, ûnyi ge at? Me adre me ûhnenamököuâ, ka habe, Ate ne ha me ûnyi hnyi drany, me e ame he ka ha köta ka habe, Ieû gabun öbun e ca geju kâu î 26Ke ate ne ha, ka habe, Ûnyi ge at; me ota outen tavat ae se hia; anyin a ödra hia adre me köp Ioane helâ me perofeta. 27Me adre me thu kö Iesu, ka habe, E ca khanʼ ohmun. Me e ame ha kodra, ka habe Oge me ca he minya inya ka ha köbun musi oge me ânyâ hnyin ta je ûnyi e. 28Ke ieû ûnykûmenöbun? Wale ke at a lo lakon; me e ame o ka atö me ha, ka habe, Nokuk, he thö ka huliwa hnyi bong ang hnyi ik hnyei vine. 29Ke haingen, ka habe, Iny höcö: ke hwaban e, e ame ietra me he. 30Me e ame o ka wakeiat me ha helâe minya. Ke e ame thu me ha, ka habe, Cica inya oge ma he: ke ame ca he bi. 31Ie at gadru ame ânyâ weny kamödru? Haingödra, ka habe, Atö. Haba Iesu ame ha kodra ka habe, E hnathu inya oge me ha köbun, haba ta je telona, me ta je momo hnyi gethen, adre me khaletʼ öbun ka hnyi dökhu dokhon Khong. 32Anyin a Ioane ame o but köbun hnyi deny hwakecin ae wisa, ke öbun e ca geju kâu: ke ame labageju kâu hnen ta je telona me ta je momo hnyi gethen: ke öbun e wâ thibi, öbun e ca ietra hwaban, mʼ öbun e he ka labageju kâu.

33Long ju ke ûhöûcû; Wale at tuhan uma ame belökö vine, me bi haginy igigilo, me hin thop hnân hlic vine, me otilâ tap ae beû goranyai, me hna ka tavat belök, me e ame he but ka hnyi ke hnyei bi. 34Ke hnyi ûen ame hakekeny ka metu je wan, me e ame kunâ lathnyabainy ka tavat belök, he ka hom je wan. 35Haba tavat belök adre me kât lathnyabainy, me osoâ khaca, me hlingâ khaca, me lûâ khaca. 36Me e ame kunâ hmetu ke lathnyaba ae se hia hon hnyat a bodrin: me adre me ânyâ helâe minya ködrin. 37Ke hwaban e, e ame kunâ kodra nokon, haingen, Ödrin e he la ka outen nokuk. 38Ke a wâ but nokon hnen tavat belök, me ödrin e ûha-köuâ, ka habe, Wale but ang mâtrân; ate me he ka hlingâ, me me tang omjehetin biju anyin ta je ûnyi. 39Me ödrin e kât e me obâ ûnyi hnyi hnyei vine, me hlingâ. 40Anyin a wale, e ka o tuhan hnyei vine, ieû ame be ka mâdrâ ka tavat belök? 41Haingödrin kâu, ka habe, E ame he ka ohia tavat eling ae kong, me hna hnyei vine ka keihen tavat belök, tavat adre me he ka ham wan kâu hnyi je ûen. 42Haba Iesu ame ha ködrin, ka habe, Öbun e ca aû hna sihnalimen, ka habe,

Haba veto ame degec hnen tavat bi uma,

Me adre me ânyâ me hnân ban kopiny:

Ûnyi ge Than eling,

Ke ate me wâ me lâiâ?

43Anyin a wale, inya oge me ha köbun, ka habe, Adre me he ka hom gabun dökhu dokhon Khong, me adre me he ka ham ka hnyei adre me wa waniny. 44Ke haba at ame he ka ta hon veto ang, me ame he ka thu amâmâ: ke e ka kölu ka hnyi hon at, me ame he ka thu omomono e. 45Ke a long ut ta je taben tavat bihut ke ta je Faresaio anyin ta je ûhöûcû, me Ödrin e wâ ûnykûme a e ame ha gadrin. 46Me ödrin e elâm he ka kât e, kʼ ödrin e outen tavat ae se hia, anyin adre me kap e a perofeta.

Currently Selected:

Mataio 21: IAAI

Highlight

Copy