Mataio 22

1HABA Iesu ame ha hmetu kodra je ûhöûcû ame ha, ka habe, 2Haba dokhon drany, me ûcû me ke than at ame ânyâ bijeû hnyi faipoipo a nokon, 3kʼ ame kunâ lathnyabainy he ka hom tavat adre hia but hawâ ka hnyi bijeûiny faipoipo: kʼ adre me höcö. 4Me e ame kunâ hmetu ke je lathnyaba me ha, ka habe, Ha thö ka tavat adre hia but hawâ, ka habe, Wâ bi, oge hia but penapena anyik bijeû: kʼ adre hia but hlingâ halek je bolok ke halek je meno ae pipikhenya, kʼ adre hia but penapena ta je ûnyi hia: ai öbun ka hnyi bijeûiny faipoipo. 5Ke adre me oûnyibâûâ me ve se but, ke at ka hnyi iny ta hnyei, ke ke at ka hnyin anyin hna ûcû: 6ke haba je kolon adre me kât lathnyabainy, me okongoâ, me hlingâ. 7Me ame hmonyin bi than, kʼ ame kunâ anyin je utbavat, me ohia tavat ûhlingö eling, me thong degecâ anyidra taun. 8Me e ame ha ka lathnyabainy, ka habe, Adre hia but penapena bijeûiny faipoipo ke ca ûcû ödra bi, a tavat adre me bödra ka hawâ. 9Anyin a wale, he thʼ öbun ka hnyi vheden ta je gethen, ke haba tavat hia öbun e he ka wâ, hawʼ ödra thö ka hnyi bijeûiny faipoipo. 10Me ame he but lathnyaba eling ka hnyi ta je gethen, me ûkhacahöuâ hia tavat ödrin e wâ, tavat ae kong ke tavat ae so: me ame unöngöt hna faipoipo ge at. 11Ke ame didro than he ka wâ tavat adre hawâ, me e ame wâ ke at eling ae ba ûkhaûen faipoipo: 12me e ame ha kâu, ka habe, Hanok lö, ieû gam u je didro kââng, ke ba gam ûkhaûen faipoipo? Me e ame laba hnyibû but. 13Ke haba than ame ha ka lathnyaba, ka habe, Ca ju li can ke li hnyamen, me khûâ but ka hnyi menekholom hnyou, dok adre me tenge hnyin me ûgiö ganyon. 14Anyin adre me hawâ tavat ae se, ke wakhalet thibi adre me ûca.

15Me ame he but ta je Faresaio me ûhnenamö mʼ adre ma kâmâu ka töuhne-weny ge hnen hna ha. 16Me adre me kunâ kâu latödrin, ke je Herodiane minya, me ha, ka habe, At ûne lö, e khanʼ ohmun dut a u at ae hnathu, a at ame ûnö hnatho gethen deny Khong, ke u me ca outen at, anyin a u me ca ûnykûme bi hnyimakan at. 17Anyin a wale, ha thö kohmun, Ieû ûnykûmenâm? e ûcû be ka fat kö Kaisara, hawa, degec u? 18Ke haba Iesu ame wâ hwakecidrin ae kong, me e ame ba, ka habe, Hnyat thoi, ieû gabun öbun e cubic nya? 19Omanenâ thö könya mone hnân fat. Me adre me hom kâu denari. 20Me e ame ha ködrin, ka habe, Hnyimakö ia ang me hna sihnalimen? 21Haingödrin kâu, ka habe, Kaisara. Me e ame ha ködrin ka habe, Awe, ham but kö Kaisara ta je ûnyi anyi Kaisara, ke ka Khong ta je ûnyi anyin Khong. 22Ke adre me long, me adre me lâiâ, me hna but e, me he but.

23Hnyi bong eling ame he but kâu ta je Sadukaio, tavat adre me ha, ka habe, e ba möt hmetu thö: 24ke adre me hnö e, ka habe, At ûne lö, haba Mose ame ha, ka habe, A ne mokcu ke at ke ba nokon, hamen liamekeiny mē he ka hom âiân bi, me bi mâtrân liamekeiny mē. 25E unyihmun je liamekeiny a seven: ame faipoipo thö atö, me ame mokcu, ke ba mâtrân, ke ame hna but âiân ka keiny; 26ke helâe minya ge loiny, me kuniny, ke ne o but hnyi seven. 27Ke hwabodrin hia thö, ame mok minya ju momo. 28Waleling, me ame he ka öiö ia gadrin a ödrin seven hnyi möt hmetu thö? anyin a ödrin hia ödrin e hom e. 29Haba Iesu ame thu me ha ködrin, ka habe, Öbun e ûnykûme hwalö but, ke ca khanʼ öbun hna sihnalimen, me man maniny Khong. 30Anyin adre me ca he ka hok âiân me ûhamtamomo hnyi möt hmetu, ke adre me he ka tha ûcû me ta je angela hnyi drany. 31Ke haba hnyi möt hmetu ûnyi hnyi hna mok, hawa, öbun e ca aû hnen Khong hna ha köbun ka habe, 32Inya ang Khongu Aberahama, me Khongu Isaaka, me Khongu Jekob? Haba Khong, me ca Khongon bi tavat adre mokcu, ke so bi tavat ae möt. 33Ke a long ut tavat ae se hia, me adre me lâiâ hnen hna ûne.

34Ke a long ut ta je Faresaio a gʼ ame ohnyibö ta je Sadukaio, me adre me ûkhacaköu thö. 35Ke haba ke at gadrin a at ûnö hnanyibu ame hnö he ka cubec e, hai; ngen ka habe, 36At ûne lö, ewa hnanyibu ae gan hnyi ta je hnanyibu? 37Me e ame ha kâu, ka habe, U me he ka hnyok ka Than a Khongom ge hnyekom ae bekhöt, me hanom ae bekhöt, me oûnykûmâm ae bekhöt. 38Wale hnanyibu ae gan a bân. 39Ke haba loiny, helâ minya e, ka habe, U ma betenge ge at ame laba hakekenyi u helâ me u bi. 40Hnyi li hnanyibu eling ame him je hnanyibu hia me ta je perofeta.

41Ame tiga ûkhacaköu ta je Faresaio, ke Iesu ame hnei ödra ge ke ûnyi, ka habe, 42Ieû ûnykûmenöbun ge Keriso? nöku ia e? Haingödrin kâu, ka habe, Nöku Davita. 43Me e ame ha kodra, ka habe, Ieû ga Davita ame hâiâ e ûnyi ge Hanu, ka habe, Than, haingen.

44Ame ha Than ka Tuhok, ka habe,

Laba ju hnyi ke keihen a metök

Ke ne o but oge me he ka ip ta je iwahnaihmiony möu hmelen li cam?

45Awe, ame ne hâiâ e hnö Davata, ka habe, Than, ama kâmâu ka nokon? 46Ke ba at ae khana he ka thu kâu ge ke hofuc, ke ba at ae hwege hnyekon he ka hnö hmetu e, hwân hnyi bong eling.

Currently Selected:

Mataio 22: IAAI

Highlight

Copy