Mataio 20

1ANYIN ae ûcû dokhon drany me tuhan uma, at ame vesâkong he ka hawâ tavat huliwa ka hnyi anyin hna belökâ vine. 2Ke tha mou thö gan me tavat huliwa he ka kap ûsa khaca denari hnyi bong, me e ame kunʼ ödra ka hnyi anyin hna belökâ vine. 3Ke e ame dit hmetu but hnyi awa a kuniny, kʼ ame wâ keihen adre me ûtitilen bâu hnyi hna ûcû; 4ke e ame ha kodra, ka habe, He thʼ öbun ka hnyi hna belökâ vine, me oge me he ka bi hwaban köbun ûnyi ae ûcû. Me ödrin e he but. 5Ke e ame dit hmetu but, hnyi awa a siks, ke hnyi awa a nain, kʼ ame ânyâ helâe. 6Ke haba hnyi awa a eleven, e ame dit hmetu but, me wâ keihen adre me ûtitilen baû; me e ame ba kodra, ka habe, Ieû gabun öbun e ûtitilen baû ke obekhötâ bong? 7Haingödra kâu, ka habe, Anyin ae ba at ame hawʼ ohmun. Ke e ame ha kodra, ka habe, He thʼ öbun minya ka hnyi hna belökâ vine. 8Ke hnyi hauhaotreng, haba tuhan vine ame ba ka homakan huliwa, ka habe, Hawâ thö tavat huliwa me ham kodra hwaban, hwân ge tavat a bilidra ke ne o but ka tavat a bödra. 9Me ame o but tavat adre hawâ hnyi awa a eleven, me ödrin e ve kap denari. 10Ke ame o minya but tavat a bödra, kʼ ödrin e ûnykûme he ka kap gânâ; ke ödrin e ve kap minya denari. 11Ke adre hia but kap, me adre me ulidro tuhan uma, 12me ha, ka habe, Haba tavat a bilidra adre hia but huliwa khaca thibi âwâ, ke u je mâdrâ ködrin e ûcû möhmun, waleji tavat ohmun e hok hmakiny bong me kahwainy ae gan hmâ. 13Ke e ame thu ka ke at gadrin, ka habe, Hanok lö, iny ca hwali köu: ʼhawa, öte ca tha thamuâ hnyi denari? 14Hom dö ânyâm me he thö, haba wek bi he ka ham ka at a biliny e ûcû möu. 15Hawa, e ca ûcû könya he ka ânyâ wek ge anyik ta je ûnyi? hawa e kong emakâm anyin a iny at betenge? 16Ke helâe haba at a biliny ame he ka bân, ke haba at a bân, ame he ka biliny jut.

17Haba Iesu ame he Jerusalema ai, me e ame saû thö me laten a twelv a hake ödrin ke, me ha ködrin eû hnyi gethen, ka habe, 18Wâ bi, otin e he Jerusalema ai; ke adre me he ka alecuâ Nokon at ka je taben tavat bihut me hnyat sihnalimen; ke adre me he ka hahnaûhangoâ e, he ka hlingâ, 19ke adre me he ka hna e ka Aten je hnyei he ka hluma e, me kot ge osö, me osatauroâ: ke e ame he ka möt hmetu thö hnyi bong a kuniny.

20Me ame e but kâu hinyen li laku Zebedaio tha e me li lakon, ödrin e khudrung me sumâtâ e ge ke ûnyi. 21Me e ame ha ka momo, ka habe, Ieû wem? Haba momo ame ha kâu, ka habe, Ö u ha thö me me he li lakuk ang ka laba ke at hnyi ke keihâm a metâm, ke ke at hnyi ke keihâm a mem hnyi dokhom dökhu. 22Ke haba Iesu ame thu me ha, ka habe, E ca khanʼ öbu bongon hnöbu hna sumâtâ. Hawa, e khanʼ öbu he ka ic hnyi kaia oge me he ka ijem? Haingödru ka habe, E khanʼ ohmu. 23Ke e ame ha ködru, ka habe, Öbu me he ka hnyi ic hnyi anyik kaia: ke haba he ka laba hnyi ke keihen metök me mek, me ca hamök bi he ka ham, ke wale hobi kâu thibi hnen Kamök hna penapena hobi kâu. 24Ke a long ut hnyat a ten me ame hmönyidrin ka li liamekeiny. 25Ke haba Iesu ame hawʼ ödrin kâu me ha, ka habe, E khanʼ öbun a hwakecin tavat adre me musö Aten je hnyei he ka hwen than hudrin, ke ame musi ödrin hnen ta je tuh-ödrin. 26Ame ca he ka helâe gabun: ke haba at ame began gabun ame he ka bi athnyaba köbun; 27ke haba at ame weny he ka bân gabun, me ame he ka bi athnyaba köbun: 28helâ me Nokon at a ca o me me he ka bi athnyaba kâu tavat, ke so bi he ka bi athnyaba me ham anyin möt hnân hwaban melen tavat ae se hia.

29Ke ödrin e tiga dit ûhedrin Jeriko me ame he tavat ae se hia hotudrin. 30Ke wâ bi, li wadröu ödru me laba hnyi baten gethen, kʼ ödru me long a gʼ ame he nulʼ ödru Iesu, me ödru me hongot, ka habe, Than a Nöku Davita lö, betenge ju gahmu. 31Me ame thawʼ ödru tavat ae se hia, mʼ ödru me laba hnyibû: ke so bi ödru me hongot hwege tot, me ha, ka habe, Than a Nöku Davita lö, betenge ju gahmu. 32Me Iesu ame todru me hawʼ ödru, me ha, ka habe, Ieû webu a oge me he ka ânyâ köbu? 33Haingödru, ka habe, Than lö, me me bwela but li emaköhmu. 34Me haba Iesu ame hnyok ködru, me kâlâ li emaködru: me ödru me ie bwela but me he hoton.

Currently Selected:

Mataio 20: IAAI

Highlight

Copy