Mataio 19

1AHIA but Iesu oumo ta je hofuc e, me e ame he ûheny Galilaia, me o hnyi hnyigoulen Juda hoton Joridano; 2ke ame he hoton tavat ae se hia; me e ame omeli ödra eling.

3Ke ame o thö kâu ta je Faresaio he ka cubec e, haingödrin ka habe, Hawa, e ûcû ka at he ka degec âiân can ta je ûnyi hia? 4Me e ame thu me ha, ka habe, Hawa, öbun e ca hnyi aû, a haba at ame op tavat hnyi can a e ame up ödru baga me momo, 5me ha, ka habe, Anyin a wale, ame he baga ka hna kamen me hinyen me kece bi ka âiân; ke ame he ka khaca thibi unyidru? 6Waleling mʼ ödru me ca lo hmetu bi, ke khaca thibi unyidra. Anyin a wale, haba hnen Khong hna ûhûkâlâköuâ, me ca he bi at ka thang. 7Haingödrin kâu, ka habe, Anyin a ieû Mose ame hûna he ka ham tusiny thang faipoipo, me ip ju momo? 8Me e ame ha ködrin, ka habe, Haba Mose ame hnʼ öbun he ka degec laöiöbun can ûnâkiny je hnyekubun: kʼ adre me ca hnyi helâe hnyi can. 9Ke inya oge me ha köbun, ka habe, Haba at ame degec âiân, kʼ a bi ûnyi monu, me ihok me ke at bi, me wale bi at ame bi ûnyi monu: ke haba at ame hom momo adre degec, me e at ame bi ûnyi monu. 10Ke haba laten, ödrin e ha kâu, ka habe, A ne helâe bongon at ge momo, e ca ûcû bi he ka faipoipo. 11Ke e ame ha ködrin, ka habe, E ca khana tavat hia he ka kap hofuc e, ke so thibi tavat adre me ham ködrin. 12Anyin ae hu je eunuka ame helâe ûnyi hnyi erkin ge hinyen: kʼ ame eunuka but keihen, a oeunuka hnen at: ke e hu je eunuka, adre me ka oeunukʼ ödra hobi kâu dokhon drany. Ke haba at ae khana he ka kap e, e so e ame kap.

13Me adre me hom but kâu ta je wanakat, me me he ka ip li hnyamen hudrin, me hic: ke haba laten ödrin e thawʼ ödra. 14Ke haingö Iesu, ka habe, Hna but ta je wanakat, ke ca thawʼ ödrin bi he ka he jem könya: anyin a helâ ödrin dokhon drany. 15Me e ame ip li hnyamen hudrin, me he but ûheny e.

16Me wâ bi ame o but ke at me ha kâu, ka habe, At ûne lö, ieû ke ûnyi ae so o ge me he ka ânyâ me me hu thö könya möt ame ca ba balua? 17Me e ame ha kâu, ka habe, Ieû gam u me hnö gak ûnyi ae so? Khaca thibi at ae so: ke a ne wem he ka didro ka hnyi möt vheno thö ta je hnanyibu. 18Haingen ame ha kâu, ka habe, Ewa? Ke Iesu ame ha kâu, ka habe, U ca he ka hlingâ, U ca he ka bi ûnyi monu, U ca he ka venöu, U me ca he ka ohnathoâ thoi, 19Ogânâ kâmâm me hinyâm: ke, U me he ka betenge ge at ame laba hakekenyi u helâ me u bi. 20Haba hidröu ame ha kâu, ka habe, Oge hia but vheno ta je ûnyi e: ke ieû biju ae hia gak? 21Haba Iesu ame ha kâu, ka habe, A ne wem he ka bekhöt, he thö, ûco thö ânyâm ta je ûnyi, me ham ka tavat ae theduoc, ke u me he ka hu tang omjeû hnyi drany: ke aiö u bi, he hotuk. 22Ke a long ut hidröu hofuc eling, me e ame he but me hmak ut hnyekon: anyin a e at ae tren omjeû ae gan hmâ.

23Me haba Iesu ame ha ka laten, ka habe, E hnathu inya oge me ha köbun, ka habe, Huliwa but at ae tren omjeû he ka didro ka hnyi dokhon drany. 24Ke inya oge me ha hmetu köbun, ka habe, E hâhâ ka kamela he ka didro hnyi hwanumen jebû, hon he ka didro ka hnyi dökhu dokhon Khong at ae tren omjeû. 25A long ut laten me ödrin e lâiâ gan hmâ me ha, ka habe, Ia la ae khana he ka möt? 26Haba Iesu ame ō ʼdrin me ha, ka habe, E ca khana bi e hnen at; ke ba ke ûnyi ae pason ka Khong. 27Haba Peteru ame thu kâu, ka habe, Wâ bi, ohmun e hia but hna degecâ ta je ûnyi hia, me he hotom; ke ohmun e he ka hu ieû? 28Haba Iesu ame ha ködrin, ka habe, E hnathu inya oge me ha köbun, ka habe, haba hnyi hna he ka omelö hmetu, e ka he Nokon at ka laba hon theroniny anyin hmanenang, haba öbun tavat öbun e he hotuk, me öbun e be minya bi ka laba hon je theron a twelv, he ka owisa je tribu anyin at Isaraela a twelv. 29Ke haba at ame he ka hna but uma, ke liamekeiny, ke haniny, ke kamen, ke hinyen, ke lakon, ke hnyei, can iök, me e ame kap wan haded ûsehiainy, me ame he ka hu minya möt ae ca ba balua. 30Ke se hia tavat ame bödra, me ame he ka bilidra but, ke haba tavat ame bilidra me ame he ka bödra but.

Currently Selected:

Mataio 19: IAAI

Highlight

Copy