Mataio 18

1HNYI ûen eling ame o laten kö Iesu me ha, ka habe, Ia ae gan hnyi dokhon drany î 2Me e ame hawâ wanakat ae ûhnyûkong kâu, me otilâ hnyi wanbödrin, 3me ha, ka habe, E hnathu inya oge me ha köbun, ka habe, Öbun e ne ca wiʼ öbun bi, me me helâ me wanakat, e ca khanʼ öbun he ka didro ka hnyi dokhon drany. 4Anyin a wale, haba at ame he ka oûhnyûkongoâ e bi helâ me wanakat ang, wale bi e at ae gan hmâ hnyi dokhon drany. 5Ke haba at ame he ka kap wanakat helâng hnyi iök, me ame köp nya minya: 6ke haba at ame he ka bijoniny ke at ae ûhnyûkong eang ame labageju kônya, me so ka at eling he ka vekiny hnyi nyin veto hnân oamâmâ, me he ka öûâ but e hnyi köiö ae dit. 7Ekölö ge hmeledrany anyin ae hu ta je hna bi joniny! anyin ae ûnyi hnathu he ka oâ ta je hna bijoniny: ke ekölö ge at ame be ka oâ ta je hna bijoniny! 8A ne bi jönâm hnyamâm a metâm, subâ degecâ but gam: e so köu he ka didro ka hnyi möt a u bâbu ke mat, hon he ka tha hu li hnyamâm ke li cam, ke adre me he ka khûö u ka hnyi meic ame ca mok balua. 9Ke a ne bi jönâm emâkâm, ûâ degecâ thö gam: ke so köu he ka didro ka hnyi möt a khaca biju emâkâm, hon he ka tha hu li ecmak, me adre me he ka khûö u ka hnyi meiciny gena. 10Wâ eâu öbun nye hûkötiâ ke at ae ûhnyûkong eang; anyin a inya oge me ha köbun, haba anyidrin ta je angela ethö hnyi drany adre me wâ bala hnyimakan Kamök ethö hnyi drany. 12Anyin a ieû ûnykûmenöbun? a ne ke at ae tren je mamoe a wan haded, ke ame he monu but khaca gadrin, hawa, e ame ca he ka hna bi nainte nain, me he ka hnyi je bucen he ka elâm at a he monu? 13Ke a ne wâ ju e, e hnathu inya oge me ha köbun, ka habe, e ame senyinâ e hon hnen hna senyinâ nainte nain ödrin e ca he monu. 14Ke helâe e ca weny Kamöbun ethö hnyi drany, a gʼ ame he ka hia ke at eang ae ûhnyûkong.

15Ke a ne monu köu kem, he thö ka omamenâ kâu anyin monu ke hake öbu ke: a ne ling u, öbu me he bi ka liamekeiny hmetu. 16Ke ame ne ca ling u, bi hiâm ju minya ge at a khaca, ame ne lo, mʼ adre me he ka ohmâ ta je hofuc hia a tha hahnathoâ hnen hnyimen li at a lo, ame ne kun. 17Ke a ne höcö ling ödrin, ha thö ka ûkhacaköu: ke a ne höcö long ûkhacaköu, hna but e me me he ka helâ köu me Aten ke je hnyei, ke ta je telona. 18E hnathu inya oge me ha köbun, ka habe, Haba ûnyi öbun e he ka ohmâ eang hmeledrany adre me he ka ohmâ ethö hnyi drany: ke haba ûnyi öbun e he ka thang eang hmeledrany, me adre me he minya ka thang ethö hnyi drany. 19Wale hmetu ang, inya oge me ha köbun, ka habe, ame ne he lo li at gabun ka tha ogâ ke ûnyi eang hmeledrany wale ödru me he ka sumâtâ, me ame he ka ham ködru hnen Kamök ethö hnyi drany. 20Anyin a haba dok ame ûkhacaköu hnyin li at a lo, ame ne kun, hnyi iök, me inya ling hnyi wanbödrin. 21Haba Peteru ame o but kâu me ha, ka habe, Than lö, ama ove monu könya keik mʼ iny hna but e? hawa, ame he ka o hnyi seven? 22Haba Iesu ame ha kâu, ka habe, Oge me ca ha köu, ka habe, Ame he ka o hnyi seven; ke so bi, Ke ne o but ka hnyi sevente je seven. 23Anyin a wale, haba dokhon drany me ûcû me ke than ame weny he ka hnö ge ta je ûnyi unyin lathnyabainy. 24Ke e ame hwân he ka wâhmakhmeto, me adre me hom but kâu at ame hia but me hom gan ten thauzan je talan. 25Ke can anyin ae ba gan hnân bi hwaban, haba tuhan ame ûkhûnöng he ka ûco e, me âiân, me lakon, me ta je ûnyi ae hu gan, me hnân bi hwaban. 26Anyin a wale, haba athnyaba ame ta ju me nom ju kâu, me ha, ka habe, Than lö, mē hokhnyoki nya ju, me oge me he ka ham hia hwaban köu. 27Haba tuhan athnyaba eling ame betenge gan, me thang ut e, me hna degecâ kâu hnen hna mē hom. 28Ke ame dit hnyou ai athnyaba eling, me wâ ke athnyaba a hanen, waleji ame mē hom gan je denari a wan haded: me e ame kâlâ e, me kât nyin me ha, ka habe, Hö jem hmetu hnâm hna mē hom gak. 29Me haba athnyaba a hanen ame ta ju, me khöû kâu, me ha, ka habe, Më hokhnyoki nya ju, me oge me he ka ham hmetu köu. 30Ke e ame höcö: me e ame he me khûâ e hnyin uma ce at, ke ne o but e ame ham hmetu hna mē hom. 31Ke a wâ but hnen je athnyaba a hanen hnen hna ânyâ, me ame hmak je hnyekudrin, me ödrin e o thö me omanenâ ka tuhödrin ûnyi hia ame ânyâ. 32Me haba tuhan ame hawâ e, me ha kâu ka habe, U athnyaba ae kong lö, oge me thang hia hnâm hna mē hom gak, anyin a u je khöû könya: 33hawa, e ca ûcû köu he ka betenge minya ge athnyaba a hânâm, helâji me hnok hna betenge gam? 34Haba tuhan ame hmonyin, me hna but ka tavat ûöveci, ke ne o but e ame he ka ham ta je ûnyi hia e ame mē hom. 35Ke ame he ka ânyâ helâe köbun hnen Kamök ethö hnyi drany, Öbun ka ca he hia ka ve thong keiny ûnyi hnyi je hnyekubun.

Currently Selected:

Mataio 18: IAAI

Highlight

Copy