Mataio 13

1HNYI bong eling Iesu ame he ûheny hnyi uma, me laba hnyi hobatköiö. 2Me ame ûkhacaköu thö kâu tavat ae se hia, me e ame ölö thö ka hnyi hon hu me laba; ke ame utitilen tavat ae se hia hnyi baten köiö. 3Me e ame ha kodra ta je hofuc ae se hia a deny je ûhöûcû, haingen, ka habe, Wâ bi, ame he but at belök he ka jijingâ wan; 4ke e ame jijingâ, me ame kolu but ke je wan hnyi baten gethen, me ame o but ta je meno ame gâ me an dö: 5ke ame kolu but keihen ka hnyi hon dok ae hudei, ke ca haki hnyi kânâ: me ame ie kû thö anyin ae ca haki kânâ: 6kʼ ame o but seûno, me ame le but, me me mok, anyin ae ba iwân. 7Ke ame kolu but keihen hnyi wanben ta je ûö ae ûdedö; ke ame kû takoû but hnen ta je ûö ae ûdedö: 8ke ame kolu but keihen ka hnyi kânâ ae hoso, me wa but, keihen ûsa wan haded, keihen ûsa sikste, keihen ûsa thote. 9Haba at ae hu hnyikonyen, long ju e.

10Me ame o thö laten, me ha kâu, kahabe, Ieû can u je ha kodra ge ta je ûhöûcû? 11E ame thu ködrin me ha, ka habe, Adre me ham köbun he ka wâhmakhmetoâ ta je ûnyi ae iyong hnyi dokhon drany, kʼ adre me ca ham bi kodra. 12Anyin adre me he ka ham ka at ae hu gan, me me he ka tren gan hmâ: ke adre me he ka hom ge at ae ca hu gan bi, ûnyi e ame hu. 13Anyin a wale, inya oge me ha kodra ta je ûhöûcû; anyin adre me bwela, kʼ adre me ca wâ bi, ke long, kʼ adre me ca lönghmakhmeto bi, kʼ adre me ca wâ ûnykûme bi. 14Me hwâdâ but kodra hna perofeta hnö Isaia, ka habe,

Öbun e he ka long ge hnyeköny, me ca wâ ûnykûme bi;

Kʼ öbun e he ka wâ ge ecmak, me ca he bi ka khana:

15Anyin ame khot ut hnyekon, tavat ang,

Ke hmak je hnyikönyödra he ka long,

Kʼ adre mook ge je emaködra;

Wâ adre nye wâ ge je emaködra

Me long ge je hnyikönyödra,

Me wâ ûnykûme ge hnyekudra,

Me hmetuhmetu but,

Mʼ oge me he ka omeli ödra.

16Ke hnahic hnen ta je emaköbun, anyin öbun e wâ, me ta je hnyikönyöbun, anyin öbun e long. 17Anyin ae hnathu inya oge me ha köbun, ka habe, e se hia ta je perofeta me tavat ae wisa hwakecidra adre me weny he ka wâ hnobun hna wâ, kʼ adre me ca wâ bi; me be he ka long hnobun hna long, kʼ adre me ca long bi. 18Anyin a wale long ju öbun ûhöûcû ge at ame belök. 19E ka long ut ke at hofucin dökhu, ke ame ca wâ ûnykûme bi, me ame o but at ae kong, me hûgûnâ ûnyi adre tā eû hnyi hnyekon. Wale thibi e hna tā hnyi baten gethen. 20Ke haba hna tā hnyi dok ae hudei, wale at ame long hofuc, me ie kap senyinâ; 21ke so bi e ba bi iwân eû hnyi hnyekon, kʼ ame ca kûeny tethmâ; ke ame ne o but hlöuhlöu, me ûöveci, can hofuc, me e ame ie thö thö. 22Ke haba at adre tā hnyi wanben ta je ûö ae ûdedö, wale at ame long hofuc, ke ame kû takoû hofuc hnen je vheliny hmeledrany, me je iyawö ge omjeû, me e ame ca wa but. 23Ke haba hna tā hon kânâ ae hoso, wale at ame long hofuc, me wâ ûnykûme; at ame hing wa, me hu wan, keihen ûsa wan haded, ke keihen ûsa sikste, ke keihen ûsa thote.

24E ame omanenâ hmetu kodra ke ûhöûcû, ka habe, Haba dokhon drany, me ûcû me at ame tā je wan ae so hnyi iny hnyei: 25ke ame tiga mokut tavat, me ame he but iwahnaihmiöny mē, me tā takoû hwit hnen zizania, me he thö. 26Ke ame kû thö bâtân me wa, me ame manen minya but zizania. 27Me ame o but lathnyabainy at tren uma, me ha kâu, ka habe, Than lö, hawa, u je ca tā ta je wan ae so hnyi em hnyei? ke ûnyi ua bi zizania? 28Ke e ame thu me ha ködrin ka habe, Ame ânyâ e hnen iwahnaihmiony. Ke haba lathnyaba ödrin e ha kâu, ka habe, Hawa e wem ohmun e he ka oc ûkhöûnâ e? 29Ke haingen, ka habe, Ohe; wâ öbun nye tha oc dö hwit me je zizania. 30E so ödru me he ka tha kû ke ne o but hnyi ûen menu: ke haba hnyi ûen menu oge me he ka ha ka tavat menu, ka habe, Më ûkhöûnâ thö je zizania, me tha ip me ca, hnân thong degecâ: ke ip dö hwit hnyi anyik om hani.

31E ame omanenâ hmetu kodra ke ûhöûcû, ka habe, Haba dokhon drany, me ûcû me wan sinapi ame hom ke at me ta hnyi iny hnyei: 32wale thibi e wan ae ûhnyûkong hmelen ta je wan hia; ke hnyi ûen e ame kû thö me ame gan hmâ hon ta je ûö ae ometu, a ûö cici, me ûcû ka ta je meno ame gâ ethö he ka tabâ ta je vheiny.

33Ke e ame ha hmetu kodra ke ûhöûcû, ka habe, Haba dokhon drany me ûcû me leven ame hom ke momo me ikhâlâ hnyi hnyin falawa a kun ta tulut, ke ne o but ame tha khibi hia thö.

34Haba ta je hofuc hia e, ame ha Iesu ka tavat hnyi je ûhöûcû; kʼ ame ca fuc kodra ke ba ûhöûcû: 35me me hwâdâ thö hna ha hnen perofeta, ka habe,

Oge me he ka khong ut hnyimök hnyi ta je ûhöûcû;

Oge me he ka ha ta je ûnyi ae iyong hwân hnyi hna bi taben hmeledrany.

36Ke haba Iesu ame hna but tavat ae se hia, me ame didro ka hnyi uma: ke ame o but kâu laten, haingödra, ka habe, Omanenâ thö köhmun bongon ûhöûcû me zizania hnyi utkânâ. 37Me e ame thu ködrin, me ha, ka habe, Haba at ame tā wan ae so, me wale Nokon at; 38ke haba utkânâ, me wale hmeledrany; ke haba wan ae so, me wale lakon dokhu; ke haba zizania, me wale lakon at ae kong; 39ke haba iwahnaihmiony a at ame tā, me wale diabolo: ke haba menu, me wale obiny hmeledrany; ke haba tavat menu, me wale ta je angela. 40Ke haba zizania adre ûkhöûnâ he ka thong hnyi meic; me ame he ka helâe hnyi obiny hmeledrany. 41Ame he Nokon at ka kunâ anyin ta je angela, mʼ ödrin e he ka ûkhöûnâ ûnyi hnyi dokhon dökhu ta je ûnyi hia adre me bi jöniny, ke tavat adre me ânyâ hulö, 42me khûʼ ödrin ka hnyi thopiny meic: kʼ adre me he ka tenge me ûgiö ganyudra eling. 43Ke haba tavat ae wisa, me adre me he ka hadröngöc helâ me seûno hnyi dökhu dokhon Kamödra. Haba at ae hu li hnyikonyen, long ju. 44Haba dokhon drany, me ûcû me tang omjeû adre me ikhâlâ hnyi hnyei; waleji ame wâ hnen ke at, me ikhâlâ but; me e ame senyin me he but me ûcoâ anyin ta je ûnyi hia, me ûco utkânâ eling.

45Wale hmetu ang, haba dokhon drany me ûcû me at ûco omjeû at ame elâm ta je penina ae so: 46ke e ame wâ ju ke penina ae gan hwaban, me e ame mē ûco anyin ta je ûnyi hia hnân bi hwaban e.

47Wale hmetu ang, haba dokhon drany, me ûcû me ert adre me thong eû hnyi köiö, me ame hnok dö ta je wâ monu hia: 48ke ame unöngöt dö, me ödrin e lelö e ka hnyi hme; ke adre me ûlalabainy me ûkhöûnâ je wâ ae so ka hnyi je tang, me degec bi ta je wâ ae kong. 49Ame he ka helâe hnyi obiny hmeledrany: ame he ka he but ta je angela me kia luâ tavat ae kong me tavat ae wisa, 50me khûʼ ödra ka hnyi thopiny meic: adre me he ka tenge me ûgiö ganyudra eling.

51Hawa, öbun e wâ ûnykûme ta je ûnyi hia e? Haingödrin ka habe, Eke. 52Me e ame ha ködrin, ka habe, Anyin a wale, haba tavat sihnalimen hia waleji adre nâ ka hnyi dokhon drany, me helâ me at ae tren uma ame eang ta je ûnyi ae teb ûnyi me ta je ûnyi ae kueny jut ûnyi hnyi tang omjehen.

53A hia but Iesu umo ta je ûhöûcû e, me e ame he but ûheny e. 54Me e ame o but ka hnyi iny hnyei, me e ame nʼ ödra hnyin umödra sunago, me adre me lâiâ, me ha, ka habe, Ûnyi ua metâ eang me ta je huliwa ae man unyin at ang? 55Hawa, ca nokon bi at tretrau? ke ca Maria bi ien hinyen? ke hawa, ca je liamekeiny mē jia Iakobo, me Josefa, me Simona, me Juda? 56Ke ca eang bi unyita je lahaniny hia? Ke ûnyi ua bi ta je ûnyi hia eang gan? 57Ke adre me thö thö gan. Ke haba Iesu ame ha kodra, ka habe, E ca ba lung anyin perofeta, ke ka e bi hnyi iny hnyei, me anyin bi lap. 58Ke e ame ca ânyâ ta je huliwa ae man ae se hia eling, can anyidra ca labageju.

Currently Selected:

Mataio 13: IAAI

Highlight

Copy