Mataio 12

1HNYI ûen e, Iesu ame he hnyi hna belökâ hwit hnyi bong sabath; ke mekihnânem but laten, ke ödrin e hwân ka thu wan hwit me han. 2Haba ta je Faresio adre me wâ, me adre me ha, ka habe, Wâ bi haba lâtâm ödrin e ânyâ ûnyi ae ca ûcû he ka ânyâ hnyi sabath. 3Ke haingen ködrin, ka habe, Hawa, öbun e ca hnyi aû hna ânyâ hnö Davita ehac, waleji e ame mekihnânem me anyin bunyen; 4a gʼ ame didro ka hnyi uma umen Khong, me an je areto hnân omanenâ, waleji ae ca ûcû kâu he ka an me anyin bunyen, ke so thibi tavat bihut? 5Ke öbun e ca munyi aû minya hnyi hnanyibu, ge hnen tavat bihut hna ca okabâ sabath hnyi hnyin uma kap, ke ödrin e ca kong bi? 6Ke inya oge me ha köbun, ka habe, Wale bi ang At ae gan hon uma kap. 7Ke a ne khanʼ öbun bongon hna ha, ka habe, Wek a ibetengiö ke ca hut bi, mʼ öbun e ca he ka haikongoâ tavat ae ca monu bi. 8Anyin a Nokon at a tuhan sabath.

9Ke e ame he ûheny e, me e ame didro ka hnyi umödrin sunago: 10ke wâ bi, eling ke at ae meleca hnyamen. Me ödrin e hnö e me ha, ka habe, Hawa, e kap he ka ûhomeli hnyi sabath? mʼ Ödrin e he ka bifuco e. 11Me e ame ha ködrin, ka habe, Ia gabun ae tren mamoe, a ne kolu but ka hnyi thop hnyi bong sabath, me ame ca he ka kât, me lelö hmetu e? 12Ke hawa, e ca beönua at hon mamoe? Waleling me me so he ka mâdrâ so hnyi sabath. 13Me e ame ha ka at eji, ka habe, Lau but hnyamâm. Me e ame lau but; me ame so but helâ me khaca. 14Ke ame didrut ta je Faresaio he ka ûbnenamö gan, mʼ adre me he ka kâmâu he ka hlingâ. 15Ke a wâhmakhmeto but Iesu, me e ame hna but dok e: ke ame he hoton tavat ae se; me e ame omeli ödra hia, 16me thawʼ ödra mʼ adre me ca he ka omanenâ e: 17me me hwâdâ hna ha hnö Isaia perofeta, ka habe,

18Wâ bi, athnyabaik oge me ûca;

A oûnykumik, wale ame senyin kâu hanuk:

Oge me he ka ip Hanuk hon,

Ke e ame he ka omanenâ wisa ka Aten ta je hnyei.

19E ame ca he ka ivinö, me fuc goranyai;

Ke ba at ame he ka long ifucin eû hnyi je gethen.

20E ame ca he ka thu hlowe ame ihnyong,

Ke ame ca he ka ume waamo ame hiâ ûhnyûkong

Ke ne o but e ame kunâ hna owisa he ka ton.

21Ke ame he Aten ta je Hnyei ka ge ju ka hnyi ien.

22Adre me hom but kâu ke at a delec demoni, ae wadröu, ke hum: me e ame osoâ e, me ame fuc dö at ae hum me bwela. 23Haba tavat hia ae se adre me lâiâ gan hmâ me ha, ka habe, Hawa, nöku Davita at ang? 24Haba at Faresaio adre me long me adre me ha, ka habe, At ang ame ca obâ ta je demoni ke so bi ûnyi ga Belezebuba a tuhan ta je demoni. 25Ke e ame wâ je ûnykûmenödrin, me e ame ha ködrin, ka habe, Haba je dökhu hia adre imouköu gadra, me ame he ka ba wan; ke ame ca he ka tethmâ taun ame ne hnyaba adre me imouköu gadra: 26ke a ne Satana ame obâ Satana me ame imouköu but; ke ame he ka kâmâu ka tethmâ dokhon dökhu? 27Ke a ne inya oge me obâ ta je demoni ûnyi ga Belezebuba, ûnyi ga ia ame obʼ ödrin minya hnen lakubun? waleling e me ûcû ködrin he ka owisʼ öbun. 28Ke oge ne obâ ta je demoni ûnyi ge Hanon Khong, awe, a o but köbun dökhu dokhon Khong. 29Ke ame be ka kâmâu at ka dit ka hnyi uma umen at ae hwege, he ka söh anyin ta je ûnyi, a ne ca bân bi he ka ca at ae hwege? me ame he bi ka söh umen uma. 30Haba at ame ca tha hien mönya, me wale iwahnaihmiony mönya; ke haba at ame ca tha ûkhöûnâ mönya, me ame oveseâ but. 31Anyin a wale, inya oge me ha köbun, ka habe, Adre me he ka thang degecâ ta je monu hia, ke ta je bi gan anyin at; ke haba at ame he ka bi gan ka Hanu, me adre me ca he ka thang degecâ. 32Ke haba at ame he ka haikongoâ Nokon at, me adre me he ka hna degecâ e; ke haba at ame he ka haikongoâ Hanu Kap, me adre me ca he ka thang degecâ e hnyi möt ang, ke ba minya hnyi möt ame he ka o. 33Osoâ thö ûö me me so minya je wan; ke haba khaca, okongoâ ûö me me kong minya je wan: anyin adre me wâhmakhmetoâ ûö ge wan. 34Je lakon on lö, öbun e he ka kâmâu he ka ha je hofuc ae so, kʼ öbun kong bi? anyin ame fuc hnyem ûnyi ge unöngötiny hnyok. 35Haba at ae so ame hom but ta je ûnyi ae so ûnyi hnyi tang omjehen ae so; ke haba at ae kong ame hom but ta je ûnyi ae kong ûnyi hnyi tang omjehen ae kong. 36Ke inya oge me ha köbun, a haba ta je hofuc baû hia ame ha hnen at, me adre me he ka ha hmetu hnyi bong owisa. 37Anyin adre me he ka haiwisö u ge hwâm ta je hofuc, kʼ adre me he ka ohnaûbangöi u ge hwâm ta je hofuc.

38Haba keihen tavat sihnalimen me ta je Faresaio adre me thu me ha, ka habe, At ûne lö, e bewehmun he ka wâ ke haten gam. 39Ke e ame thu ködrin, ka habe, Dö ae kong ke bi ûnyi monu, adre me elâm haten; ke adre me ca he ka ham kodra haten, ke so thibi haten ga Jona perofeta: 40anyin a Jona ame laba hnyi hnyin wâ ae gan kun ta lany ke kun ta lit: helâe ame he Nokon at ka laba hnyi hnyin kânâ kun ta lany ke kun ta lit. 41Ame he at Nineve ka tha tot me dö ang hnyi hna owisa, ke adre me he ka ha hnaûhangoâ e: anyin adre me ietra hnyi hna khetâ hnö Jona; ke wâ bi walang at ae beönua hu Jona. 42Ame he momo than ûheny hnyi hwaiöu ka tha tot me dö ang hnyi hna owisa he ka hahnaûhangoâ e: anyin a e ame o ûnyi hnyi can hmeledrany he ka long metâ anyi Solomona; ke wâ bi, wale bi ang at ae beönua hu Solomona. 43Ke haba hanu ae kong, hnyi ûen e ame didrut ûnyi hnyi hnyin at, e ame he hnyi je dok ae hwahwacit, he ka heleû hna menâ kʼ ame ca wâ bi. 44Me e ame ha, ka habe, Oge me he ka hmetu ka hnyi umök uma ehac oge didrut ûhek hnyin; ke e ame o but me wâ ae ba onyen, ke adre hia but aba wia, me omecâ. 45Me e ame he but me tha hom mē je hanu a seven ae beönua anyidrin monu hon e, ke ödrin e didro me laba eling: ke haba obiny ka at eling, ame he ka kong hon a bân. Ke ame he ka helâe minya ka dö ang ae kong.

46E ame tiga fuc ka tavat ae se hia, wâ bi, ame ûtitilen eû hnyou hinyen me je liamekeiny mē, e bewedrin he ka ûhnenamö mē. 47Ke haba ke at ame ha kâu, ka habe, Wâ bi, ame ûtitilen eû hinyâm me je liamekeiny möû, e bewedrin he ka ûhnenamö möu. 48Me e ame thu me ha ka at ame fuc kâu, ka habe, Ia hinyök? ke ie je liamekeiny mönya? 49Me e ame inâ hnyamen ka je laten me ha, ka habe, Wâ bi, hinyök, me je liamekeiny mönya! 50Anyin a haba at ame ânyâ we Cica ethö hnyi drany, wale thibi e keik, me hanik, me hinyök.

Currently Selected:

Mataio 12: IAAI

Highlight

Copy