Mataio 14

1HNYI ûen eling a long ut Heroad than lung a Iesu, 2me e ame ha ka lathnyabainy, ka habe, Ioane Bapataiso e; a möt hmetu thö ûheny hnyi hna mok; anyin a wale ame huliwa ta je ûnyi ang ae man unyin. 3Anyin a hia but Heroda kot Ioane, me ca e, me ip hnyi uma ce at, can ga Herodia, öiö Filipo, liamekeiny mē. 4Anyin a Ioane ame ha, ka habe, E ca ûcû köu he ka hom e. 5Me e ame weny ka hlingâ e, kʼ ame outen tavat ae se hia, anyin adre me kap e helâ me perofeta. 6Ke haba hnyi bong adre me bijeuâ bong adre hnöku Heroda hnyin, ame biâ hlu nöku Herodia hnyi wanben, me osenyini Heroda. 7Waleling me me khemanyin he ka ham kâu ûnyi e ame he ka sumâtâ. 8Ke haba hlu, me ame ha hnyekon hinyen he ka ha, ka habe, Ham but könya bö Ioane hnyin mini. 9Me ame hmak ut than; ke ûnyi bi ge hna khemanyin, ke can ge tavat adre me tha laba mē, me e ame hûna he ka ham but; 10me e ame ûkhûnöng he ka subâ bö Ioane hnyin uma, ce at. 11Me adre me hom but ban hnyi mini, me ham ka hlu, ke hlu ame hom me ham ka hinyen. 12Me ame he but laten, me hom unyin, me konâm; ke ödrin e he but me thumetu Iesu.

13Ke a long ut Iesu, me e ame he ûheny e hon hu, ka hnyi ong hnyebuba a hake e: ke a long ut tavat ae se hia, me adre me he hoton hon kânâ ûnyi hnyi ta je taun. 14Ke e ame o thö me wâ tavat ae se hia, me e ame betenge gadra, me ohia hnödra ta je mok. 15Ke hnyi sahac ame he but kâu laten, me haingödrin, ka habe, Hnyebuba ang, kʼ a um do lany; kunâ thö tavat ang ae se hia, mʼ adre me he ka hnyi je taun he ka ûcû ö ʼdra bi. 16Ke haba Iesu ame ha ködrin, ka habe, Ohe, adre me ca he ka he; ha ö ʼdra bi öbun. 17Ke haingödrin kâu, ka habe, E hu thabûng thibi ta areto ke lo li wâ unyihmun. 18Me e ame ha, ka habe, Hö jem. 19Ke ame hûna ka tavat ae se hia he ka laba hnyi hna önying; ke e ame hom je areto a thabûng ke li wâ, kʼ ame bwele hnyi drany ai me oleâ, me thuthu, me ham je areto ka laten, ke laten ka tavat ae se hia. 20Ke ödra hia adre me han, me ame sekudra ju: ke adre me hom je kolon adre thuthu a unöngöt dö je tang a twelv. 21Ke haba ûseiny tavat adre me han me helâ me faiv thauzan obaga, kʼ adre ca aû bi omomo me je wanakat.

22Me e ame ie kunâ laten he ka laba hon hu, me me bödrin ka kec ka hnyi ke keihen, me e ame he ka hna but tavat ae se hia. 23Ke a hia but kunâ tavat ae se hia, e ame hake ölö thö ka hnyi bucen be ka hic: ke hauhaotreng ut ke hake e thiju ling. 24Ke haba hu, me e but hnyi wanben köiö, ame kap hnahna hnen ta je waköiö, anyin a esang. 25Ke hnyi hna hmak a vakiny hnyi lit e ame he ködrin, ame he hon köiö. 26Ke a wâ but e hnen laten ame he hon köiö, me ödrin e hmak me ha, ka habe, Hanu jo; ke ödrin e kuku anyin a ödrin ot. 27Ke haba Iesu ame ie fuc ködrin, ka habe, Hwege thö; inya bi; ca ot. 28Haba Peteru ame thu kâu, ka habe, Than lö, ame ne u bi ling, bethe ha könya he ka he but köu ka hnyi hon köiö. 29Haingen ame ha, ka habe, Aiö u, Haba Peteru ame utut ûheny hon hu, me he hon köiö, he ka he kö Iesu. 30Ke e ame wâ ang, me e ame ot; ke e ame hwân he ka û, me e ame kuku me ha, ka habe, Than lö, omeli nya. 31Me Iesu ame ie hinôbeny me kât e, me ha kâu, ka habe, At ame labageju ûhnyûkong lö, ieû gam u me hlohlo? 32Ke ödru me ölö thö ka hnyi hon hu, me ame ta but hau. 33Ke haba aten hu ödrin e khudrung kâu, me ha, ka habe, E hnathu u thibi Nokon Khong.

34Ke ödrin e kec ka hnyi ke keihen, me ödrin e o thö hot, ka hnyi Genesareta. 35Ke ame wâhmakhmeto e hnen tavat hnyi hnyei eling, me adre me ûkhûnöng igigilo hnyei eling, me hom but kâu ta je komok hia; 36me khöû kâu mʼ adre me he ka kâlâ thibi obiny anyin ûkhaû: ke haba tavat hia adre me kâlâ, adre me mödrut.

Currently Selected:

Mataio 14: IAAI

Highlight

Copy