Joela 1

1WALANG hofuc ho Iehova waleji ame a kö Joela nöku Pethuela.

2Öbun wahingat lö, long ju hofuc ang, ke tevehlöng ju öbun tavat aten hnyei. Hawa, e hu ûnyi helâng hnyi bongubun je bong, ame ne hnyi bong bongon lakamöbun? 3Thumeto thö lakubun ge ûnyi eling, ke ame he lakubun ka thumeto lakudra bi, ke hamen lakudra ka thumeto dö a biliny. 4Haba kolon ame hna ge lakon wahamon, me ame han e hnen wahamon veto, ke haba ju hna hna hnen wahamon veto, me ame han hnen oböu, ke haba hna hna hnen oböu, me ame han hnen walewi. 5Hmak dʼ öbun tavat öbun e ic monu, ke tenge; ke haba öbun tavat hia öbun e ic waina, kuku tenge thö, ge waina ae hnebwia; anyin adre me subâ degecâ e ûnyi hnyi je hnyimöbun. 6Anyin ame o but ke hnyei ka hnyi ik hnyei, a tavat hwege, ke ca hnân aû; haba je nyudra, me helâ me nyon liona, ke haba je ohûlûsinaidra, me helâ me ohûlûsinainy liona. 7Ke e ame oba wan anyik vine, me thu anyik imeta: kʼ ame okalaötâ e, me degec; ke hau but je vheiny. 8Tenge thö, helâ me hlu ame weikâ ecmano ae gan nân can âiân hlu a e. 9Adre me subâ degecâ hudiny ban me hudiny ic ûnyi hnyi uma umo Iehova; kʼ ame tenge tavat bihut a lathnyabai Iehova. 10E ba but wan ta hnyei, ame tenge kânâ; anyin ae ba but hwit, a hme thö waina ae teb ûnyi, ke ba wakaco. 11Hmehma ju öbun tavat belök, tenge thʼ öbun tavat huliwan vine, can hwit me bali; anyin ae kong ut hwit hnyi ta hnyei. 12E meleca thö vine, ke ba but meta; a mok dö rimona, me pama, me tapua, wale je ûöiny hia hnyei: anyin ame aû but senyin unyin tavat. 13Tavat bihut lö, oweikʼ öbun ju, ke tenge; tavat huliwan taben hut lö, kuku tenge thö; lathnyabainy Khonguk lö, ai öbun, mokut hnyi lit hia hnyi mano ae gan nân: anyin ae ba hmetu hudiny han me hudiny ic hnyi uma umen Khongubun. 14Thu bongon ju he ka ca han, hawâ thö ûkhacaköu ae ûnyi hnathu; ûkhacaköu â thö wahingat me aten hnyei hia ka hnyi uma umo Iehova Khongubun, ke tenge thʼ öbun kö Iehova. 15Ekölö ge bong! anyin ame he jem bong bongi Iehova, ke e ame he ka o helâ me hnaûhango ûnyi ge Ataekhanahia. 16Hawa, ame ca ba jeû gata eke, me senyin me hobâ hnyi uma umen Khonguta? 17A bobot ut je hatong eû hnyi kânâ; e ba but onyen je uma jeû, e amam but je omhani; anyin ae meleca thö hwit. 18Ekölö ge ûtengien je meno! ame hlohlo je hnahat kau anyin ae ba but ö ʼdra; eke adre oba wan je hnahat mamoe. 19Iehova lö, inya oge me tenge köu: anyin a hia but meic thong jeû an je meno hnyi hnyebuba, ke haba bâhlân ame hia but an je ûöiny hnyot hia. 20Eke, je menoiny hnyot adre me momokhon unyâm: anyin e hme but je deny köiö, ke a hia but meic! thong jeû an je meno hnyi hnyebuba.

Currently Selected:

Joela 1: IAAI

Highlight

Copy