Joela 2

1TÛA thö trutru hnyi Ziona, me olungâ haten hnyi anyik bucen ae kap; öbu-buny ju öbun hia aten hnyei; anyin ame he jem bong bongu Iehova, ae hakekeny jut; 2bonginy lit me menekholom, bonginy ûlâ me khömet, helâ me melaminy hnyomakatu ame ulolo hon je bucen; hnyei ae gan me hwege, e ba helâe ehac, ke ame ca he hmetu ka helâe, hnyi je hunainy je dö ae se hia. 3Ame han meic hnyi hnyimakodra, ke haba bâhlân ame hlâ hwabödra: haba hnyei hnyi hnyimakodra, me helâ me hnyei Edena, ke hnyebuba ae ba wan hnyi hwabödra; eke, ke ba at ame kec mot ge ioidra. 4Haba unyidra me helâ me unyin, je hora; ke adre me wadring helâ me je hors adre me tabâ. 5Helâ me hwan je kariota hnyi ban je bucen hwan gâ a ödra, ke helâ me hwan bâhlân meic ame thong thatûnyin hwit, helâ me tavat ae hwege adre me tot metâ he ka vat. 6Ame öbu-buny tavat hnyi hnyimakodra; kʼ ame löhau ta je hnyimak hia. 7Adre me wadring helâ me tavat hwege; kʼ adre me ölö hanyâûâ hak veto helâ me tavat vat; kʼ adre me ve vheno dedra je gethen, ke adre me ca saû ûnyi hnyi anyidra je deö at. 8Adre me ca ûhneki; kʼ adre me ve vheno dedra je gethen: adre me thu vat me omjehen vat, kʼ adre me ca saû hnyi dedra. 9Adre me utut ka hnyi taun; adre me wadring hon hak veto; adre me ölö ka hnyi hnyin je uma; kʼ adre me didro hnyi je mamalama helâ me at venöu. 10Ame öbubuny hmeledrany hnyi hnyimakodra; kʼ ame jijing drany; ame menekholom seûno me tehi, kʼ ame ca melam ta je okhû: 11ke ame fuc Iehova hnyi hnyimakan anyin utbavat; anyin ae gan hmâ hnen hna hunuma; anyin ae hwege at ame ohwâdâ hwan hofuc: anyin ae gan hmâ bong bongu Iehova me linân outen e; ke ie at ae hwege he ka hokhnyok hnyin e? 12Ke so bi, haingo Iehova, ka habe, Walang ang hwio thö könya ge je hnyekubun ae bekhot, me ânyâ ca han, me tenge, me tenge thungaû: 13kia but je hnyekubun, ke ca kia je ûkhaû bi, me hwio thö kö Iehova Khongubun: anyin a e at ame betenge baû, ke betenge vec, ke bec he ka hmonyin, ke gan hmâ anyin ibetengiö, kʼ ame ka ietra hulo. 14E khanö ia, a gʼ ame ca he bi ka hmetu me ietra, me ip bi hnahic hwaban, wale hudiny han ke hudiny ic hobi kö Iehova Khongubun.

15Tûâ thö trutru hnyi Ziona, thu bongon ju ânyâ ca han, hawâ ûkhacaköuâ thö ae ûnyi hnathu: 16ûkhacaköuâ thö tavat, okabâ thö ûkhacaköu, hawâ thö wahingat, ûkhacaköuâ thö ta je wanakat, me tavat adre me i: hamen at a tep faipoipo ka he ûnyi hnyi hnyeuleny, me hlu a tep faipoipo ûnyi hnyi ong hnyeuleny. 17E so ame he tavat bihut, a je athnyabai Iehova ka tenge hnyi wanben poretiko me taben hut, me ha, ka habe, Iehova lö, betenge ju ge lakem, ke ca he ka hna jekhom me hnân taben haikongoâ, me he ka musi ödra hnen ta je hnyei: anyin a ieû ame he ka ha hnen je hnyei, ka habe, Ewa Khongudrin?

18Me Iehova ame ciâ ge iny hnyei, me betenge ge lakeiny. 19Ke Iehova ame thu me ha ka lakeiny, ka habe, Wâ bi, oge me he ka kunâ köbun hwit, me waina, me wakaco, me me sekubun hnen je ûnyi e: ke oge me ca he hmetu ka hnʼ öbun me hnân haikongoâ hnen ta je hnyei: 20ke oge me he ka öûsâkâûöâ mʼ öbun utbavat ûnyi hnyi hwadro, me obâ e ka hnyi hnyei ae hwahwacit me ba wan, haba hnyimakan e ka hnyi köiö e deiö, me hoton ka hnyi köiö e jio; ke ame he ka o anyin bokong, j ke ame he ka o bunen anyin bobot, anyin a e ame hia but ânyâ ta je ûnyi ae gan. 21Hnyei lö, ca ot bi, senyin do me hobâ; anyin a hia but Iehova ânyâ ta je ûnyi ae gan. 22Je menoiny utkânâ lö, ca ot bi; anyin ame kû jeû an je meno hnyi hnyebuba, anyin ame wa ta je ûö, ke ame wa gan hmâ meta me vine. 23Ke senyin dö, öbun je lakon Ziona me hobâ ga Iehova Khongubun; anyin a e ame ham köbun we a bân ae ûcû, ke e ame kunâ köbun we, wale we a bân me we a biliny, hnyi tehi a bân. 24Ke ame he ka unöngöt je hna huje hwit ge hwit, me bahihingölö thö je tengen waina me wakaco. 25Ke oge me he ka bi hwaban köbun je huna, waleji a an hnen wahamon veto, me oböu me wale wi, me nokon wahamon, wale anyik utbavat ae gan oge kunâ köbun. 26Ke öbun e he ka han me sekubun, me ogânâ iö Iehova Khongubun, at ame hia but ânyâ ûnyi hnân lâiâ unyibun: ke ame ca he balua bi lakeik ka hmehma. 27Ke öbun e he ka wâ a inya hnyi wanben Isaraela, ke inya Iehova Khongubun, ke ba ju ke at: ke ame ca he balua bi lakeik ka hmehma.

28Ke hwaban e, oge me he ka hingâlâ hanuk hon tavat hia thithö; ke ame he lakubun obaga me wahlu ka perofeta, ame he wahingatibun ka bwo je bwi, ame he wahidröu unyibun ka wâ je hna omanenâ: 29ke hnyi je bong eling oge me he bi minya ka hingâlâ hanuk hon ta je athnyaba baga me momo. 30Ke oge me he ka omanenâ je haten ethö hnyi drany me eang hmeledrany, wale dra, me meic, me hai ame sâ goranyai. 31Ame he ka wia seûno me me lit, me tehi me me dra, me ame he ka o but bong bongu Iehova, bong ae gan hmâ ke hnân outen. 32Ke ame he ka e bi, a haba at ame he ka hawâ iö Iehova me e ame he ka mot: anyin ame he ka hu tavat kec mot hnyi bucen Ziona me Jerusalema, helâji me hna ha hnö Iehova, ke unyin je kolon, hnyat a hawʼ ödra ga Iehova.

Currently Selected:

Joela 2: IAAI

Highlight

Copy