Ioane 6

1HWABAN ta je ûnyi e Iesu ame he hanyâûâ köiö Galilaia, wale köiö Tiberia. 2Haba tavat ae se hia adre me he hoton, anyin adre me wâ ta je ûöman e ame ânyâ ka tavat a ödra mok. 3Ke haba Iesu ame öliâ bucen, me tha laba eling me laten. 4E hakekeny jut bong paseka, bijeû, anyin at Juda. 5Iesu ame bwele thö, kʼ ame wâ tavat ae se hia hmonyin adre me he but kâu, me e ame ha kö Filipo, ka habe, Otin e he ka ûcû areto ua, mʼ adre me he ka han? 6Kʼ ame ha e he ka cubec e: anyin ae khana ûnyi ame he ka ânyâ. 7Haingö Filipo kâu, ka habe, E ca ûcû bi kodra je areto a hwaban lo li haded je denari, me me ve ûcû ködra ong jeû ae ûhnyûkong. 8Me ame ha kâu hnen ke aten jia Anedrea liamekeiny me Simona Peteru, ka habe, 9Wale ke da ae hu je areto bali a faiv ke li ong wâ: ke hnân eû thö ling ke se hia tavat? 10Ke haingö Iesu, ka habe, Olaba ju tavat. Ke gan hmâ hna önying hnyi dok eling. Me ame ûlalabainy ju tavat, haba ûseidra, me helâ me faiv thauzan. 11Haba Iesu ame hom je areto, ke a hia but oleâ, me e ame khenâ but ka tavat adre me ûlalabainy; helâe minya li ong wâ, hoton wedra. 12Ke ame sekudra thö, me e ame ha ka laten, ka habe, Ûkhöûnâ thö je ong kolon, me me ba ûnyi adre ma degec bi. 13Me ödrin e ûkhöûnâ thö, me ounöngötâ je tang a twelv wale je kolon je areto bali a faiv, a kolon hna han hnen tavat. 14A wâ but hnen tavat ûöman a ânyâ, me adre me ha, ka habe, E hnathu, walang perofeta adre me ha a gʼ ame he ka utut ka hnyi hmeledrany.

15Ke a wâ but Iesu, a gʼ adre me he ka o thö he ka hom ûjengö e he ka otilâ e me than, me e ame hake he hmetu ka hnyi bucen. 16Ke a sahac ut haba laten ödrin e utut ka hnyi köiö; 17ke ödrin e ölö hon hu, me hwân he ka kec hanyâûâ köiö Kaperenauma ai. Ke a lit ut, ke tiga ca o Iesu ködrin. 18Me ame omun dö köiö ge ang ae gan. 19Ke ödrin e hia but galu helâ me twente faiv, ame ne thöti je setadia, me Ödrin e ö Iesu ame he hon köiö, me hakekeny ka hnyi hu: me ödrin e ot. 20Ke e ame ha ködrin, ka habe, Inya bi; ca ot. 21Me ödrin e kap senyinâ thö e ka hnyi hu: me ame ie khop dö hu hnyi hnyei ödrin e kec ka hnyin.

22Haba nyi, a wâ but hnen tavat adre me ûtitilen hnyi ke keihen köiö, ae ba ju ke hu e, ka ca tha ölö Iesu me laten hon hu, ke hake laten thibi, 23(ke so bi ame khop dö ke je ong galu ûheny Tiberia hakekeny ka hnyi dok adre me han hnyin hwaban hna ole hnen Than): 24me ame wâ hnen tavat ae se hia ae hiö Iesu eling, me laten minya, me adre me laba but hon je ong galu, me kec Kaperenauma ai he ka elöm Iesu. 25Ke adre me wâ ju e hnyi ke keihen köiö, haingödra kâu, ka habe, Rabi, u je o eang kehö? 26Haba Iesu ame thu ködra, ka habe, E hnathu, e hnathu inya oge me ha köbun, öbun e ca elöm nya anyin öbun e wâ ta je ûöman, ke anyin bi öbun e han areto me ame sekubun dö. 27Ca huliwa bi hobi kâu jeû wale ûnyi ame he ka bobot, ke so bi jeû ae tet hmâ ke ne o but ka hnyi möt ame ca ba balua, wale ame he Nokon at ka ham köbun: anyin a wale at Kamen ame okeceâ haten hon, wale Khong. 28Haingödra adre me ha kâu, ka habe, Ieû hanymöhmun mʼ ohmun e he ka ânyâ ta je huliwa anyin Khong? 29Iesu ame thu ködra, ka habe, Walang huliwa anyin Khong, ka habe, öbun e he ka labageju ka at a kunâ. 30Me adre me ha kâu, ka habe, Ieû haten u me he ka mâdrâ, mʼ ohmun e wâ thö, me labageju köu? ieû ânyâm huliwa? 31Haba lakamöhmun adre me han mana hnyi hnyebuba; helâ me hna sihnalimen, ka habe, E ame ham ködra areto ûnyi hnyi drany hnân han. 32Me haba Iesu ame ha ködra, ka habe, E hnathu, e hnathu inya oge me ha köbun, ka habe, A ca ham köbun areto ûnyi hnyi drany ga Mose; ke so bi Cica ame ham köbun hing areto ûnyi hnyi drany. 33Anyin a areto anyin Khong, me wale at ame utut ûnyi hnyi drany, kʼ ame ham möt ka hmeledrany. 34Haingödra kâu, ka habe, Than lö, ham bala ju kohmun areto e. 35Me haingö Iesu ködra, ka habe, Inya ang aretoiny möt: haba at ame he ka o könya, me ame ca he hmetu ka mekihnânem, ke haba at ame he ka labageju könya, me ame ca he hmetu ka beic. 36Ke oge me ha köbun, ka habe, öbun e ö nya, ke öbun e ca labageju bi. 37Haba ödra hia a ham könya Kamen, me adre me he ka o könya; ke haba at ame he ka o könya, me oge me ca he bi nya ka degec. 38Anyin oge me ca utut ûhek hnyi drany he ka mâdrâ wek, ke so i bi weny at a kunö nya. 39Ke walang weny at a kunö nya, o oge me ca he ka hna ke at gadra a ham könya, mʼ oge me he bi ka otilʼ ödra hnyi bong a obiny. 40Ke walang weny Kamök, a gʼ ame he ka hu möt ame ca ba balua ka tavat hia adre me wâ Nokon, me labageju kâu; me oge me he bi nya ka otilʼ ödra hnyi bong a obiny. 41Haba at Juda adre me ulidro e anyin A e ame ha, ka habe, Inya ang areto ame utut ûheny hnyi drany. 42Haingödra, ka habe, Hawa, ca Iesu e, nöku Josefa, ke khanʼ ota kamen me hinyen? a hawa hofuc e ame ha, ka habe, Ogo me utut ûhek hnyi drany? 43Haba Iesu ame thu kodra me ha, ka habe, Ca ulit öbun. 44E ba at ae khana he ka he könya, a ne ca lelo bi e hnen Kamen, a at a kunö nya: ke oge me he ka otilâ thö e hnyi bong a obiny. 45Adre me sihnalimen hnyi tusi anyin je perofeta, ka habe, Ame he Khong ka nʼ ödra hia. Ke haba tavat hia adre me long ûnyi ge Kamen, kʼ adre me ûne bi, me adre me he ka o könya. 46E ba at ame wâ Kamen, ke so thibi at a ûnyi ge Khong, e ame wâ Kamen. 47E hnathu, e hnathu, inya oge me ha köbun, ka habe, Haba at ame labageju, me hu but kâu möt ame ca ba balua. 48Inya ang aretoiny möt. 49Ame han mana lakamöbun hnyi hnyebuba ke adre mokcu. 50Walang areto ame utut ûheny hnyi drany, a ga ne an hnen ke at, e ame ca he ka mok. 51Inya ang areto ae möt ame utut ûheny hnyi drany: a ne an dö ke at areto eang e ame he ka möt nyiele balua: eke, ke haba areto oge me he ka ham me wale unyik, hnân malen hmeledrany.

52Me ame iwatretra at Juda, ka habe, Ama hawa ka khana at ang ka ham köta unyin hnân han? 53Haba Iesu ame ha kodra, ka habe, E hnathu, e hnathu, inya oge me ha köbun, ka habe, Öbun e ne ca an unyin Nokon at, me ijem dren, me ca hu möt bi eû hnyi je hnyekubun. 54Haba at ama an unyik me ijem drök, me hu but kâu möt ame ca ba balua; ke oge me he ka otilâ thö e hnyi bong a obiny. 55Anyin a hing jeû unyik, ke hing möt hnathu drök. 56Haba at ame he ka an unyik me ijem drök, me ame laba eû hnyi hnyik, ke inya bi eû hnyi hnyekon. 57Haba Kamen ae möt ame kunö nya, ke inya oge möt ûnyi ge Kamen; ke helâe ge at ame he ka han unyik, e ame he ka möt ûnyi gak. 58Walang areto ame utut ûheny hnyi drany: ca helâ me hna han hnen lakamen ke adre me mokcu: haba at ame han areto ang, me ame he ka möt nyiele balua. 59E ame ha ta je hofuc eling hnyi sunago, hnyi hnen hna ûne hnyi Kaperenauma.

60A long ut hnen ke je laten ae se hia, me adre me ha ka habe, E hmak hofuc e; ke ia ae khana he ka long? 61Ke a wâ but Iesu eû hnyi hnyekon hnen laten hna ulidro ge ûnyi eling, me e ame ha kodra, ka habe, Hawa hnân jönibun hofuc e? 62Ame ne he ka hawa öbun ka he ka wâ Nokon at ame ölö ka hnyi hnen bi ehac? 63Haba at ame omelö, me hanu; ke ca ûnyi hnathu bi unyin: haba ta je hofuc oge hia but ha köbun, wale hanu me möt. 64Ke ame ca labageju keihen gabun. Anyin ae khanö Iesu tavat adre me ca labageju, me at minya bi ame he ka alecuâ e. 65Me e ame ha kodra, ka habe, Waleling me inye ha köbun, ka habe, E ba at ae khana he ka o könya, a ne ca ham kâu hnen Kamen.

66Anyin a wale, e se hia laten adre me hmetuhmetu me ca tha he hmetu mê. 67Haba Iesu ame ha ka hnyat a twelv, ka habe, E webun minya he ka hmetuhmetu? 68Haba Simona Peteru ame thu kâu, ka habe, Than lö, ohmun e he ka he ko ia? e thibi gam je hofucin möt ame ca ba balua. 69Ke ohmun e hia but labageju me wâhmakhmeto a u thibi At ae Kap anyin Khong. 70Iesu ame thu ködrin, ka habe, Hawa, oge me ca ûcʼ öbun a twelv, ke diabolo ke at gabun? 71E ame haiö Juda nöku Simona Isakariota, anyin a e at ame he ka alecuâ e, ke hanen hnyat a twelv.

Currently Selected:

Ioane 6: IAAI

Highlight

Copy