Ioane 5

1HWABAN ta je ûnyi e, e hu bijeû anyin at Juda; me ame he but Iesu Jerusalema ai.

2E hnyi Jerusalema hnyi homagöuleny mamoe ke an, haba ion hnyi hwen Heberu, me, Betheseda, dok ae hu hnyin je poretiko a faiv. 3Ame mokut eling tavat ae se hia a at sënyin, me wadröu, me kong can, me mat. 5Eling at ae mok thöte faiv je huna. 6Iesu ame wâ e ame mokut, ke e khana ae beû hmâ but hnen hna mok, me e ame ha kâu, ka habe, E bewem he ka möt? 7Haba at ae mok ame thu kâu, ka habe, Than lö, e ba at he ka köp nya ka hnyi an, e ka hûnyûnye thö köiö: anyin a oge me tiga he ka utut, me ame ie logot ut ke at ke belik thiju. 8Iesu ame ha kâu, ka habe, Todrö hom minya thö hnâm me he thö. 9Me ame ie möt dö at, ke e ame hom dö hnen hna mokut me he.

Ke sabath bong eling. 10Me ame ha at Juda ka at adre omelö, ka habe, Sabath ang, e ca ûcû köu he ka vadren hna mokut. 11Me e ame thu ködra, ka habe, Hnen at a omeli nya a ha könya, ka habe, Hom dö hnâm me he thö. 12Me adre me hnö e, ka habe, Ie at a ha köu, ka habe, Hom dö hnâm me he thö? 13Ke haba at adre me omelö, me ca khana bi ia e; anyin a Iesu ame he iyong, anyin a eling tavat ae se hia. 14Ke hwaban e Iesu ame wâ e hnyi uma kap, me haingen kâu, ka habe, Wâ bi, adre hia but omeli u, ca mâdrâ hmeto hulö, wâ e nye o but monu ae gan hmâ köu. 15Ke e ame he but, kʼ ame thumeto at Juda, a Iesu ame omelö e. 16Wale mʼ adre me oveci Iesu ge at Juda, anyin a e ame ânyâ ta je ûnyi e hnyi bong sabath. 17Ke haingö Iesu kodra, ka habe, Ame huliwa Cica ke ne o but hnyi bong ang, ke oge me huliwa bi nya. 18Waleling me ti hwege at Juda he ka heleû deny he ka hlingâ e, ca ûnyi thibi ge hnen hna hanyâûâ sabath, ke anyin minya bi e ame ha, ka habe, haba Khong, me hing Kamen, kʼ ame oûco e me Khong. 19Haba Iesu ame thu me ha kodra, ka habe,

E hnathu, e hnathu inya oge me ha köbun, ka habe, E ca khana Nokon he ka ânyâ huliwa a ka ûnyi gan, ke so bi e ame wâ hna mâdrâ hnen Kamen: anyin a haba ta je ûnyi e ame ânyâ, me ame ânyâ minya bi Nokon. 20Anyin a kamen ame hnyokâ Nokon, me omanenâ kâu ta je ûnyi hia e ame ânyâ: ke e ame he ka omanenâ kâu ta je huliwa ae gan hon e, mʼ öbun e he ka lâiâ. 21Anyin a Kamen ame otilâ thö ta je komok me omeli ödra, helâe minya Nokon ame omelö tavat e ame weny. 22Anyin a haba Kamen ame ca hnö ke at, ke e ame ham ka Nokon he ka hnö hia thö; 23me me he tavat hia thithö ka ogânâ Nokon helâ me hnödra hna ogânâ Kamen. Haba at ame ca ogânâ Nokon, me ame ca ogânâ Kamen at a kunâ e. 24E hnathu, e hnathu, inya oge me ha köbun, ka habe, Haba at ame long hok ta je hofuc, kʼ ame labageju ka at a kunö nya, me hu but gan möt ame ca ba balua, kʼ ame ca he bi ka hnaûhango, ke e ame he but ûheny hnyi mok ka hnyi möt. 25E hnathu, e hnathu inya oge me ha köbun, ka habe, ame he jem awa, ke walang ang, me ame he ka long ifucin Nokon Khong hnen tavat adre mokcu; ke haba tavat adre me long me adre me he ka möt. 26Anyin ae ka hu bi ge Kamen anyin möt, ke helâe e ame hna ka Nokon he ka hu gan möt: 27ke e ame ham minya kâu man he ka hnei, anyin a e Nokon at. 28Ca lâiâ bi e, anyin ame he jem ûen a gʼ ame he tavat hnyi ta je erkemok ka long ifucin, 29me he but; haba tavat adre me mâdrâ so, adre me he ka todrö ka hnyi möt; ke haba tavat adre me ânyâ hulö, me adre me he ka tot ka hnyi hnaûhangö.

30E ca khanö nya he ka hake mâdrâ thiju ke ûnyi: oge me hnö hoton hnök hna long: ke inya oge me hnö wisa; anyin oge me ca elâm wek, ke so bi weny at a kunö nya. 31Oge ne ohnathu nya bi, e ca hnathu bi hnök hna ohnathu nya. 32E so ke hu ke at ame ohnathu nya; ke e khanö nya ae hnathu hnen hna ohnathu nya. 33Öbun e hia but ûkhûnöng kö Ioane, me e ame ohwâdâ hnathu. 34Ke oge me ca kap hna ohnathoâ ûnyi ge at: ke inya oge me ha ta je ûnyi eling me öbun e mödrut. 35E thibi lamepa ame ubâhlâ me umumelam: ke e webun he ka senyin ge iumumelaminy hnyi ke ûen. 36Ke hu but gak hnân ohnatho ae beönua hu Ioane: anyin a haba ta je huliwa a ham könya Kamen he ka ânyâ, me wale ta je huliwa oge me ânyâ hnân ohnathu nya a ga kunö nya Kamen. 37Ke a hia but ohnathu nya hnen Kamen at a kunö nya Öbun e ca long bala ifucin, ke öbun e ca wâ minya bi unyin. 38Ke ca e bi eû hnyi je hnyekubun hwan hofuc: anyin a öbun e ca labageju bi ka hnen hna kunâ. 39Öbun a elâm hnyi je hna sihnalimen, anyin a öbun e ûnykûme ae hu but gabun möt eling ame ca ba balua; ke wale bi e at ame ohnathu nya; 40ke öbun höcö he ka he könya me me hu möt gabun. 41Oge me ca kap hna ogânâ ûnyi ge at. 42Ke oge wâhmakhmetu öbun dut ae ca hu gabun weny ka Khong. 43Oge o but hnyi ien Kamök, ke öbun e ca köp nya: ame ne he ka o but ke at hnyi ka ien bi, öbun e he ka kap e. 44Öhun e he ka kâmâu he ka labageju, öbun hnyat ûkapköuâ hnân ogânâ ûnyi gabun bi, ke ca elâm bi hnân ogânâ ûnyi ge Khong a khaca thibi? 45Ca ûnykûme öbun a oge me he ka hai öbun ka Kamök: e hu bi ke at ame he ka hai öbun wale Mose, at öbun e labageju kâu. 46Anyin öbun e ne köp Mose, me öbun e he ka köp nya minya; anyin a e a sihnalimi nya. 47Ke öbun e ne ca kap hnen hna sihnalimen, me öbun e he ka hawa he ka kap hok ta je hofuc.

Currently Selected:

Ioane 5: IAAI

Highlight

Copy