Hosea 5

1TAVAT bihut lö, long ju hofuc ang; lap anyi Isaraela lö, löng ju; lap anyin than lö, tevehlöng ju, anyin adre ha hwaban köbun; anyin a hnewe öbun ka Mizepa, me ert adre thong hon Tabora. 2Ke haba tavat thu musi adre me ûhlingö gan hmâ; ke inya bi at û ödra hia. 3Oge me ō Eferaima but, ke ca iyong bi Isaraela könya: unyin a walang ang, u Eferaima, u je hia but bi ûnyi monu, ke kong ut Isaraela. 4Haba anyidra ta je huliwa ame ovheli ödra he ka hmetu ka Khongudrin: anyin a e unyidra weny he ka bi ûnyi monu, ke ca khanʼ ödra but Iehova. 5Ke haba bi gan anyin Isaraela ame ohnathoâ hnyi hnyimakan: anyin a wale ame he ka tha ta Isaraela me Eferaima hnyi anyidru hulo; kʼ ame he minya Juda ka ta unyidru. 6Adre me he ka he me elom Iehova me haledra je hnahat mamoe me kau; ke adre me ca he bi ka wâ e: e ame ka he me digic ödra. 7Adre hia but iyawo kö Iehova; anyin adre hia but hnokoâ je lakudra a je atkanyua: ke walang ang ame he tehi a teb ûnyi ka ön ödra me je jekhoûdra.

8Tûâ thʼ öbun sofa hnyi Gibea, me trutru hnyi Rama: kuku thö hnân haten hnyi Beth-aven; e hnyi hotom Beniamina. 9Ame he ka ba wan Eferaima hnyi bong û: oge hia but omanenâ ka je tribuiny Isaraela ûnyi ame he ka o. 10Haba je than hnyi Juda e ûcû me tavat adre me hok hnyigot: oge me he ka hingâlâ hudrin anyik hmonyin helâ me köiö. 11Adre ovecâ Eferaima, adre ngâ e hnyi ûhnei; anyin a e ame ogâ he ka hnu hoton hna hûna. 12Anyin a wale, iny helâ me nokon walelaba ka Eferaima, ke iny helâ me bobot ka lap anyi Juda. 13Ke a wâ but Eferaima anyin mok ke a wâ but Juda hnân aat, me haba Eferaima ame he Asuria ai, kʼ ame ûkhûnöng kö Jareba than; ke ca khana bi he ka omeli u, me ometo hnobun aat. 14Anyin a oge me he ka helâ me liona ka Eferaima, ke helâ me nak liona ka lap anyi Juda: haba inya me oge me he ka oloû kia me he but; oge me he ka hom, ke ba at ame he ka hûgûnâ. 15Oge me he ka he but me hmetu ka hnyi hnok, ke ne o but adre me ogâ anyidra monu, me elâm hnyi-makök: ke adre me he ka ti elom nya e ka hu vec gadra.

Currently Selected:

Hosea 5: IAAI

Highlight

Copy