Hosea 4

1LAKON Isaraela lö, löng ju hofuc ho Iehova: anyin ae hu ivino anyi Iehova me aten hnyei, anyin ae ba hnathu, me ibetengiö, ke ca khanʼ ödra bi Khong hnyi hnyei. 2Adre me khemanyin thibi, me thoi, me hlingâ at, me venöu, me bi ûnyi monu: kʼ adre me utut, me dra ame kâlâ dra bi. 3Anyin a wale ame he hnyei ka tenge, kē sēnyin hia but tavat adre me labâ e, tha ödra me je menoiny hnyot, me je meno ame gâ ethö; eke adre me he minya ka hom but je wâ eû hnyi köiö. 4Ke so bi, ca he ke at ka ivino, ke ca he ke at ka nâ; anyin a haba je liamekeiny möu, me ödrin ûcû me tavat adre me ivino me at bihut. 5Ke u me he ka haû hnyi selany, ke u me he ka tha haû me perofeta hnyi lit; ke oge me he ka ohia hinyâm. 6Adre me ohia lakeik anyin ae ba wâhmakhmeto: anyin a u je hia but hna degecâ wâhmakhmeto, awe, oge me he bi nya ka hna degeci u, inʼ u me ca at bihut könya: anyin a u je hnying hnanyibu anyin Khongom, me oge me he bi nya ka hnying lakom. 7Kʼ adre me ânyâ hwakecin ae kong könya hoton ûseidra: oge me he ka wia anyidra hmanenang, mʼ adre me hmehma but. 8Adre me ha Ö ʼdra bi ge hulo anyin lakeik, me behnyokâ hwakecidra ae kong. 9Kʼ ame he bi ka khaca bongon tavat me at bihut: ke oge me he ka bi hwaban kodra hoton dedra je gethen, me bi hwaban kodra hoton anyidra je huliwa. 10Ke adre me he ka han, me ca sekudra bi; adre me he ka bi ûnyi monu, kʼ adre me ca he bi ka osehia: anyin adre hia but degec he ka löng kö Iehova. 11Haba ûnyi ame hûgûnâ hnyok, me wale bi ûnyi monu, ke waina, ke waina ae teb ûnyi. 12Kʼ ame labö he lakeik ka hnei unyin anyidra je ong uto, kʼ ame thumetu ödra anyidra uci: anyin adre me omonu ödra hnen bi ûnyi monu, kʼ adre me kec ûnyi hnyi hmelen Khongudrin he ka bi ûnyi monu. 13Kʼ adre me bi hut hon ban je bucen, ke leû utö ae bo so hon je dok ae gorany, ke hmelen je iwajo, ke je libene, ke je ela, anyin ae so hmenon: anyin a wale ame bi ûnyi monu lakubun wahlu, kʼ ame venöu laöiöbun. 14Ke oge me ca he ka bi hwaban ka lakubun wahlu can hnödra hna bi ûnyi monu, ke laöiöbun can hnödra hna venöu; kʼ adre me ka tha he me hnyat venöu, kʼ adre me tha bi hut me omomo hnyi gethen: ke haba hnyei ame ca wâhmakhmeto, me adre me he ka öta e. 15Isaraela lö, eja ke ne u je ne bi ûnyi monu, ke so u Juda ame ca he bi ka monu; ke ca he öbun Gilegala ai, ke ca he Beth-aven ai, ke ca khemanyin bi, ka habe, Kia inya Iehova. 16Anyin a hia but Isaraela ûkhin fuc, helâ me man kau at ame hwen höcö: ke ame he Iehova walang ang ka ha ö ʼdra helâ me nokon mamoe hnyi dok ae lau. 17Ke Eferaima ame ûkhacaköu me je idola; hna but e. 18A hiny dut belidra; kʼ adre me bi ûnyi monu bala: ke haba je tuhan me adre me beânyâ ûnyi hnân ohmehma gan. 19Haba ang ame hia but vhec e ge li labenyin; ke adre me he ka hmehma ge anyidra je hut.

Currently Selected:

Hosea 4: IAAI

Highlight

Copy