Ezekiela 32
32
1HNYI huna a twelviny, hnyi tehi a twelv, hnyi bong a bâniny tehi ame o but könya hofuc ho Iehova, ame ha, ka habe, 2Nokon at lö, hai thö khumöng tenge ga Farao than Aigupito, me ha kâu, ka habe, Adre me oûcû u me nak lionainy ta je hnyei: ke u helâ me tanimoiny köiö; kʼ ame patrutruâ ânyâm je wagewe, ke i u je obwebwelâ köiö ge li cam, me ohâeâ anyidra ta je wagewe. 3Walang hna ha hnen Than Iehova, ka habe, Oge me he ka ulolo anyik ert hom, a tha u me tavat ae se; kʼ adre me he ka lili u hnyi ûtök ert. 4Ke oge me he bi nya ka hnö u hnyi kânâ, ke khûö u ka hnyi utkânâ, ke oge me he ka olaba ka hnyi hom ta je meno adre me gâ ethö, me osekunâ je menoiny hnyot hia thithö adre me he ka ön u. 5Ke oge me he ka ip je utioiâm ethö hon je bucen, me öunöngötâ je hnyi-göulin bucen ge ibeûâm göranyai. 6Oge me he minya ka hû hnyei u je hai hnyrn ke ne o but hnyi je bucen, ge drâm; ke ame he ka unöngöt je deny köiö gam. 7Ke haba hnyi ûen oge me he ka oumi u, me oge me he ka tube drany, me olidrâ je okhûiny; ke oge me he ka tube seûno ge ûlâ, ke ame ca he ka melam tehi. 8Oge me he ka olidrâ hom je Uny hia hnyi drany ae umumelam, me hna but menekholom hon em hnyei, haingen Than Iehova. 9Ke oge me he minya ka ohmönyinâ hnyekon je hnyei ae se hia, hnyi ûen oge me he ka ohnauhangö u unyin ta je hnyei, ka hnyi je hnyei ae ca khanö u bi. 10Eke, oge me he ka kunâ je hnyei ae se hia ka lâiâ gam, ke ame he je tuhödra ka ot gan hmâ hobi köu, iny ka nyikâ anyik hele vat hnyi hnyimakodra; ke adre me he ka öbubuny bala, wâ adre nye mokcu, hnyi bonginy ta a u. 11Anyin a walang hna ha hnen Than Iehova, ka habe, Ame he ka o köu hele vat anyin than Babulona. 12Hnen je hele vat anyin tavat hwege oge me he ka ota tavat ae se hia unyâm; ödra hia tavat adre me outen hnen je hnyei: ke adre me he ka kot hia hmanenanginy Aigupito, ke adre me he ka ohia aten hia ae se. 13Ke oge me he ka ohia je menoiny hia ûnyi hnyi je köiö ae se hia; ke adre me ca he hmetu ka ohâeâ e hnen can at, ke adre me ca he hmetu ka ohâeâ e hnen ûjimen can meno. 14Me oge me he ka oalaiâ anyidra je köiö, me hingâlâ anyidra je wagewe helâ me wakaco, haingen Than Iehova. 15Iny ka hia but oba wan hnyei Aigupito, me me hnyei wau, me ohia iunöngötiny hnyei, iny ka hia but kot hia tavat adre me laba hnyin, adre me he ka wâ a inya Iehova. 16Walang khumöng tenge adre me he ka hai; ame he wahluiny je hnyei ka khumöng tengiâ; adre me he ka khumöng tenge gan, ge Aigupito, me aten hia ae se, haingen Than Iehova. 17Ke hnyi huna a twelviny hnyi bong a fiftininy tehi, ame o but könya hofuc ho Iehova, ame ha, ka habe, 18Nokon at lö, tenge thö ge aten Aigupito ae se hia, ke hagutʼ ödra but, e, me wahliuny je hnyei ae lung kâû ka hnyi kânâ tha ödra me tavat adre me utut ka hnyi thop. 19U hmanenang hu ia? utut me tha mokut me tavat adre me ca peritomon. 20Adre me he ka ta hnyi wanben tavat adre me hlingâ ge hele vat: adre hia but hna e ka hnyi hele vat: lelö e me aten ae se hia. 21Ame he ka fuc kâu tavat ae hwege a je taben hnyi wanben hedis, tha e me tavat adre me hadruâ e: adre me utut, adre me mokut, a gʼ adre ca peritomonâ, kʼ adre hlingâ ge hele vat. 22Wale Asuria me anyin ûkhacaköu hia; ke wale hon ta je erkemok igigilöâ: ödra hia tavat adre me hlingʼ ödra kʼ adre me ta ge hele vat: 23kʼ adre me ip anyidra je erkemok hnyi je ke keihen thop ae sâkâû, kʼ ame mokut anyin ûkhacaköu hnyi baten anyin erkemok: ödra hia tavat adre hlingʼ ödra, kʼ adre me ta ge hele vat, tavat adre me ot gudra waleji hnyi ûen adre me möt. 24E bi Elama me aten hia ae se igigilo anyin erkemok: tavat adre hlingʼ ödra, kʼ adre ta ge hele vat, kʼ adre me utut kâû ka hnyi kânâ a gʼ adre ca peritomonâ, waleji tavat adre ot gadra ödra tiga möt, kʼ adre me tha hmehma me tavat adre me utut ka hnyi thop. 25Adre hia but ip hnen hna mokut hnyi wanben tavat adre me hlingʼ ödra tha e me aten hia; ke igigilo e anyin je erkemok: tavat hia adre ca peritomon, kʼ adre hlingʼ ödra ge hele vat; anyin adre me ot gadra waleji ödra tiga möt, kʼ adre hia but tha hmehma me tavat adre me utut ka hnyi thop: kʼ adre me ip e hnyi wanben tavat adre me hlingʼ ödra. 26Ke wale Meseka me Tubala me aten hia ae se; ke igigilo anyin je erkemok: tavat hia adre me ca peritomon, kʼ adre hlingʼ ödra ge hele vat; anyin a ödra tavat adre me ot gadra waleji hnyi ûen ödra tiga möt. 27Kʼ adre me ca he ka tha mokut me tavat ae hwege adre me ta, kʼ adre ca peritomon, a tavat adre me utut ka hnyi hedis tha ödra me anyidra ta je omjehen vat, kʼ adre me hûnâ anyidra je hele vat, ke wale hwakecidra ae kong hnyi hon je jei ödra; anyin a gʼ adre ot gadra hnen tavat hwege hnyi ûen adre me tiga möt. 28Ke adre me he ka thu degeci u hnyi wanben tavat adre ca peritomonâ, me tha mokut me tavat adre hlingâ ge hele vat. 29E bi Edoma me anyin je than me anyin je taben hia, waleji adre tha ip hnyi anyidra tang hwege unyin tavat adre hlingʼ ödra ge hele vat: adre me he ka tha mokut me tavat adre ca peritomonâ, me tavat adre me utut ka hnyi thop. 30E bi je thaniny hwadro, ödra hia, me at Zidona hia, adre tha utut me tavat adre hlingʼ ödra; waleji hnyi ot adre oâ hnyi hwegiödra ödra hmehma but; ke adre me mokut a gʼ adre ca peritomon, tha ödra me tavat adre hlingʼ ödra ge hele vat, me tha hmehma me tavat adre me utut ka hnyi thop. 31Ame he Farao ka ö ʼdra, me tubet can aten hia ae se: wale Farao me anyin utbavat hia, adre hlingʼ ödra ge hele vat, haingen Than Iehova. 32Anyin oge hia but ip mʼ adre me ot gan hnyi ûen möt; ke adre me he ka omokulec e unyin tavat adre ca peritomonâ, me tavat adre hlingʼ ödra ge hele vat, a Farao me aten hia ae se, haingen Than Iehova.
Currently Selected:
Ezekiela 32: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
