Ezekiela 31
31
1HNYI huna a eleveniny, hnyi tehi a kuniny, hnyi bong a bâniny tehi, ame o but könya hofuc ho Iehova ame ha, ka habe, 2Nokon at lö, ha thö kö Farao than Aigupito, me anyin tavat ae se, ka habe, U ûcû me ia hnyi ûgânâm? 3Wâ bi, haba at Asuria, me arasiny Lebanona ae hmanenang anginy, ke gan hmenon, ke beû göranyai, ke haba ban, me walethö hnyi je ûlâ. 4Ame hat e ge ta je köiö, kʼ ame ogöranyâ e hnen je dok ae dit; anyin je wagewe ame di igigilo dok e ame belökâ; ke ame di anyin je ong wagewe ka hnyi je ûöiny hnyot hia. 5Anyin a wale e beönua ibeûen göranyai hon ta je ûöiny hnyot hia; ke adre osehia je anginy, ke beû je anginy can je köiö ae se hia, e ka okûâ. 6Haba ta je meno hia ame gâ ethö, adre me bi haûʼ ödra hnyi je vheiny, ke haba je menoiny hn yot hia adre me hnokoâ hmelen je vheiny, ke haba je hnyei hia ae gan adre me laba hnyi hmenon. 7Ke e hmanenang hnyi ûganiny, me ibeûen je anginy; anyin a e bi wân hnyi je köiö ae se hia. 8Ame ca ikâlâ e hnen ta je arasi hnyi hnyaban Khong: e ca ûcû ta je köp me ta je anginy, ke ca ûcû ta je aremoni me ta je vheiny; ke ba ûö hnyi hnyaban Khong ae ûcû mē hnyi hmanenanginy. 9Oge me omecâ e ge ta je anginy ae se hia: me me ciâ gan ta je ûö hia hnyi Edena, hnyi hnyei iny Khong.
10Anyin a wale, walang hna ha hnen Than Iehova, ka habe, Anyin a u beû göranyai, ke e bi ban hnyi je ûlâ, ke ethö hnyekon hnyi ibeûen; 11me oge me he ka hna e ka hnyi hnyamen at ae hwege hnyi je hnyei; ka e ame he ka mâdrâ e: oge hia but obâ e can hwakecin ae kong. 12Ke haba je atkanyua, tavat ame outen hnen ta je hnyei, adre hia but subâ degecâ e, me hna degecâ bi; a kolu but je anginy hon je bucen, me hnyi je hnyigöulen bucen hia, ke a hmetru but je vheiny hnyi je wageweiny hia hmeledrany: ke ame utut e tavat hia aten hmeledrany ûnyi hnyi hmenon, me hna degecâ e bi. 13Ame he je meno hia ame gâ ethö ka ta hon hnyaban adre degec, ke ame he je menoiny hnyot hia ka mokulec je vheiny: 14me me ca bi gan ta je ûö hnyi baten je köiö ödra ka gorany, me ca e je bodrin hnyi dok ae hlau, ke ame ca tot unyidrin hnyi ibeûödrin tavat ae hwege, wale tavat hia adre ijem köiö; anyin adre hnʼ ödra hia ka hnyi mok kâû ka hnyi kânâ unyin je lakon at tha ödra me tavat adre me utut ka hnyi thop.
15Walang hna ha hnen Than Iehova, ka habe, Hnyi bong eji e ame dit ka hnyi hedis, me oge me oâ hnyamok; can e oge me tube dok ae dit, ke thawâ je wageweiny, kʼ ame todrö je köiö ae gan: ke oge me ohlöuhlöuâ Lebanona can e, kʼ ame mok unyin ta je ûöiny hnyot hia can e. 16Oge me oöbubunyâ ta je hnyei ge hwan ûtainy, hnyi ûen oge me khûâ e ka hnyi hedis tha e me tavat adre me dit ka hnyi thop: ke haba je ûöiny hia Edena, je hna ûca me soiny Lebanona, a tavat hia adre me ic köiö, adre me tubet bi eû hnyi kânâ. 17Adre me tha ut minya mē ka hnyi hedis ka tavat adre me hlingâ ge hele vat; eke, tavat eji a hnyamen, wale tavat adre me laba hnyi hmenon hnyi wanben je hnyei.
18U hmanenang ke gan helâ me ia unyin je ûöiny Edena? ke so bi adre me he ka tha hum u me ta je ûöiny Edena kâû ka hnyi kânâ: ke u me he ka mokut hnyi wanben tavat adre me ca peritomonâ, tha u me tavat adre me hlingâ ge hele vat. Wale Farao me anyin tavat hia ae se, haingen Than Iehova.
Currently Selected:
Ezekiela 31: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
