Ezekiela 33
33
1KE ame o but könya hofuc ho Iehova ame ha, ka habe, 2Nokon at lö, ha thö ka tavat aten em hnyei, me ha kodra ka habe, Oge ne oâ hele vat ka hnyi ke hnyei, ke a ne he tavat aten hnyei ka hom ke at gadra, me otilâ e hnân anyidra at hmâkâ: 3ke e ka wâ hele vat ame o ka hnyi hnyei, me e ame tûâ trutru me koû ka tavat; 4ke haba at ame long hwan trutru, ke ame ca vheno bi, ke ame ne o hele vat me hlingâ e, me ame he dren ka takoû e bi. 5E ame long hwan trutru ke ame ca vheno bi; me ame he ka takoû e hnen dren bi: ke so bi ame ne hia but long me ame ka omelo e bi. 6Ke ame ne wâ hele vat hnen at hmâkâ, kʼ ame ca tûâ trutru, me ba haten ka tavat, me ame o but hele vat me hlingâ ke at unyidra; me ame mekiny hwakecin ae kong, me oge me he ka elâm dren bi unyin at hmâkâ. 7Ke haba u nokon at, oge hia but otilö u hnân at hmâkâ lap anyi Isaraela; anyin a wale u me he ka long hofuc ûnyi hnyi hnyimök, me koû kodra bi ûnyi gak. 8Iny ka ha ka at ae kong, ka habe, At ae kong lö, u me he ka mok, ke u me ca he bi ka fuc me koû ka at ae kong hnyi deny gethen; awe, ame he at eling ae kong ka mekiny hwakecin ae kong, ke oge me he bi nya ka elâm dren gam. 9Ke u je ne koû at ae kong he ka hmetu hnyi deny gethen, kʼ ame ca hmetu bi ûnyi hnyi deny gethen; awe, e ame he ka mekiny hwakecin ae kong, ke u bi u je omeli u.
10Ke haba u, nokon at lö, ha thö ka lap anyi Isaraela, ka habe, Walang hnobun hna ha, ka habe, Huhmun bi anyihmun je monu ke anyihmun je hulo, ke ohmun e aû tot hnyin; kʼ ohmun e he ka hawa he ka möt? 11Ha thö kodra, ka habe, Kia inya inya, haingen Than Iehova, a oge me ca senyin bi ge mok anyin at ae kong; ke so bi me me he ka hmetu at ae kong ûnyi hnyi deny gethen me me möt: hmetu ju, hmetu ju öbun ûnyi hnyi debun ta je gethen ae monu; ke ieû gabun mʼ öbun e he ka mok lap anyi Isaraela? 12Ke haba u, nokon at lö, ha thö ka lakon em hnyei, ka habe, Ame ca he hwakecin ae wisa anyin at ae wisa ka omelo e hnyi ûen monu a e; ke haba hwakecin ae kong anyin at ae kong, me ame ca he ka ota e hnyi bong e ame hmetu ûnyi hnyi anyin hulo; kʼ ame ca he ka möt bi at ae wisa hwakecin hnen e hnyi bong e ame ânyâ hnyin hulo. 13Ke iny ka ha ka at ae wisa, ka habe, e ame he ka möt; kʼ ame ne he bi ka labageju hwakecin ae wisa, kʼ ame ne ânyâ hulo bi, awe adre me ca he ka ûnykûme hwakecin ae wisa; kʼ ame he bi ka mekiny hulo e ame ânyâ. 14Ke haba khaca, iny ka ha ka ke at ae kong, ka habe, U me he ka mok; ke e ame hmetu bi ûnyi hnyi anyin monu, me ânyâ ûnyi ae wisa me ûnyi ae ûcû; 15kʼ ame ne he at ae kong ka ohmeto haten, kʼ ame ne ham hmetu ûnyi e ame hûgûnâ, me vheno je hnanyibuiny möt, ke ame ca ânyâ bi monu; awe, e ame ke ka möt, ke ame ca he bi ka mok. 16Adre me ca he ka ha kâu ke monu hnyi ta je monu e ame hia but ânyâ; e ame hia but ânyâ ûnyi ae ûcû me wisa; e ame he ka möt. 17Ke so bi haingen lakon em hnyei, ka habe, E ca ûcû bi hwakecin Than: ke haba ödra bi, e ca ûcû hwakecidra. 18E ka hwio at ae wisa hnyi hwakecin ae wisa, me ânyâ hulo, e ame he ka mekiny e. 19Ke e ka hwio at ae kong ûnyi hnyi anyin hulo, me ânyâ ûnyi ae ûcû me wisa, e ame he ka möt hnen e. 20Ke so bi öbun e ha bi, ka habe, E ca ûcû bi hwakecin Than. Lap anyi Isaraela lö, oge me he ka ve owisai öbun hoton je hwakecibun.
21Ke haba hnyi huna a twelviny bâ a ohmun, hnyi tehi a teniny, hnyi bong a faiviny tehi, ame o but könya ke at a kec möt ûheny Jerusalema me ha, ka habe, Adre hia but kot taun. 22Ke e huk hnyamö Iehova eja hnyi sahac, ke tiga ca o at a kec möt; ke e ame hia but khong hnyimök, ke ne o but e ame o könya hnyi hnyomakatu; ke ame khong ut hnyimök ke oge ca hum hmetu bi. 23Ke ame o but könya hofuc ho Iehova, ame ha, ka habe, 24Nokon at lö, ame ha tavat adre me labâ je dok ae hwahwacit ehele hnyi Isaraela, ka habe, Hake Aberahama thibi, ke e hu gan hnyei: ke ohmun se hia bi; ke adre hia but ha kohmun hnyei me me ihmun. 25Anyin a wale, ha thö kodra, ka habe, Walang hna ha hnen Than Iehova, ka habe, Öbun e han meno me dren, me bwele ka je idola, me hingâlâ dra,: kʼ ame ka he bi ka ibun hnyei? 26Öbun e tot me anyibun je hele vat, me ânyâ ûnyi ae ikiki, me ve okongoâ laâiân keihen: kʼ ame ka he bi ka ibun hnyei? 27Walang hofuc u me he ka ha kodra, ka habe, Walang hna ha hnen Than Iehova, ka habe, Kia inya inya a haba ödra hnyi je dok ae hwahwacit adre me he ka ta ge hele vat, ke haba at ae hnyi ta hnyei, oge me he ka ham e ka je meno me me an e, ke haba ödra a ödra hnyi je hnabâ me je op, adre me he ka mekiny mok ae cap. 28Ke oge me he ka oba wan hnyei me me hnân lâiâ, kʼ ame he ka um dö hmanenanginy maniny man; kʼ ame he ka ba wan je bucen Isaraela, ke ba at ame he ka vheno. 29Me adre me he ka wâ a inya Iehova, iny ka hia but oba wan hnyei ine me hnân lâiâ, can ta je hwakecin hia ae ikiki adre hia but ânyâ. 30Ke haba u, nokon at lö, ame haiö u hnen lakon em hnyei hnyi je hna up hak, ke hnyi hwanumen je uma, kʼ adre me ûhaköuâ, ka habe, Öbun mē he thö jem me long hofuc ame o ûnyi ga Iehova. 31Ke adre me he köu helâ me hwakecin tavat, kʼ adre me laba hnyi hnyimâkâm helâ me lakeik, kʼ adre me long hwâm hofuc, ke so bi adre me ca mâdrâ: anyin adre me ha betenge ge ta je hnyimödra, kʼ adre me vheno hnödra hna behnyekon ge je hnyekudra. 32Ke wâ bi, haba u, me u tha ûcû me hhumöng ae kese anyin at ae so hwan, a at ae khana he ka ânyâ ûnyikhumöng kodra: anyin adre me long hwâm je hofuc ke adre me ca mâdrâ bi. 33Ke e ka hwâdâ thö e (ke wâ bi, ame he ka hwâdâ,) me adre me he ka wâ a gʼ ame hu perofeta unyidra.
Currently Selected:
Ezekiela 33: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
