Ezekiela 25
25
1KE ame o but könya hofuc ho Iehova ame ha, ka habe, 2Nokon at lö, hnyimâkâm dö ka je lakon Amona, me perofeta gadra: 3ke ha thö ka lakon Amona, ka habe, Long ju öbun hofuc hwan Than Iehova; Walang hna ha hnen Than Iehova, ka habe, Anyin a u je ha, ka habe, Öhö, ka anyik dok ae kap, hnyi ûen eji adre me okongoâ; ke ka hnyei Isaraela hnyi ûen adre me öba wan e; ke ka lap anyi Juda, hnyi ûen adre me he but ka bâ: 4anyin a wale, wâ bi, oge me he ka hnö u ka tavat e jimeio me hnân idra, kʼ adre me he ka hunuma hnyi wanbâm, me bi hnyabadra unyâm; kʼ adre me he ka an âm jeû, me ijem belâm debai. 5Ke oge me he ka wia Raba hnân umen kamela, ke lakon Amona hnân hnyaban je hnahat mamoe: me öbun e ka wâ a inya Iehova. 6Anyin a walang hna ha hnen Than Iehova, ka habe, Anyin a u je hia but khaû li hnyamâm, ke utö ge li hnyeûcam, me hobâ, me ikikiâ hnyei Isaraela ge hnyekom; 7anyin a wale, wâ bi, oge me he ka hai hnyamok hom, kʼ oge me he ka hnö u me hnân söh hnen ta je hnyei; ke oge me he ka subâ degeci u unyin tavat, me ohiö u ûnyi hnyi je hnyei: kʼ oge me he ka ohiö u, me u me he ka wâ a inya Iehova.
8Walang hna ha hnen Than Iehova, ka habe, Anyin a haingen Moaba me Seira, ka habe, Wâ bi, e tha ûcû lap anyi Isaraela me ta je hnyei hia thithö; 9anyin a wale, wâ bi, oge me he ka khong ke baten Moaba ûnyi hnyi ta je taun, a ta je taun hnyi hnyigöulen, wale hmanenanginy tavat, a Beth-jesimoth, me Baal-meon, me Kiriathaima, 10ka tavat e jimeio, mʼ adre me he but ûcon lakon Amona, me oge me he ka hnʼ ödra hnân idra, mʼ adre me ca he bi ka ûnykûme hmetu Amona unyin ta je hnyei: 11ke oge me he ka bi hwaban ka at Moaba; mʼ adre me he ka wâ a inya Iehova. 12Walang hna ha hnen Than Iehova, ka habe, Anyin a Edoma ame okongoâ lap anyi Juda hnyi hnen hna bi hwaban, ke joniny jut ae gan hmâ wale hnen hna bi hwaban kodra; 13anyin a wale, walang hna ha hnen Than Iehova, ka habe, Oge me he ka hai hnyamok hon Edoma, me subâ degecâ gan at me meno; ke oge me he ka oba wan gan, hwân hnyi Temana; adre me he ka ta ge hele vat ke ne o but hnyi Dedana. 14Ke oge me he ka bi hwaban kö Edoma a deny lakeik a at Isaraela; ke adre me he ka ânyâ hnyi Edoma hoton anyik hmonyin me anyik wathethot: ke adre me he ka wâ bongon hnok hna bi hwaban, haingen Than Iehova.
15Walang hna ha hnen Than Iehova, ka habe, Anyin a at Filisiti adre me bi hwaban, me bi hwaban hnen hnyok ae hmonyin he ka ohia e me bi iwahnaihmiony mē nyiele balua; 16anyin a wale, walang hna ha hnen Than Iehova, ka habe, Wâ bi, oge me he ka hai hnyamok hon at Filisiti, ke oge me he ka subâ degecâ at Kerethi, me ohia je kolon hnyi hobatköiö. 17Ke oge me he ka ti bi hwaban kodra hnyi û ae hwege; ke adre me he ka wâ a inya Iehova, iny ka he ka bi hwaban ûnyi gak hnyi hudrin.
Currently Selected:
Ezekiela 25: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
