Ezekiela 26
26
1KE hnyi huna a eleveniny, hnyi bong a bâniny tehi, ame o but könya hofuc ho Iehova, ame ha, ka habe, 2Nokon at lö, anyin a Turo ame hia but ha ge Jerusalema, ka habe, Öhö, e hmetru but at eji a homagöuleny ta je hnyei; e ame hnyimakan dö könya: oge me he ka unöngöt, ke ba but wan gan: 3anyin a wale, walang hna ha hnen Than Iehova, ka habe, Wâ bi, ûcûk u, Turo ke oge me he ka öliâ köu ta je hnyei ae se hia, helâ me köiö ame öliâ ta je waköiöiny. 4Ke adre me he ka ohia je hna up haginy, me kia je tap tue hnyin: oge ma aba minya sesâiny, me wia e me kic ae ba leûnen. 5Ke e ame he ka dok hnân ulolo je ert hnyin, hnyi wanben köiö; anyin oge hia but ha, haingen Than Iehova: ke ame he ka hnân söh hnen ta je hnyei. 6Ke haba je lakon wahlu hnyi je hna belök adre me he ka hlingâ ge hele vat: me adre me he ka wâ a inya Iehova. 7Anyin a walang hna ha hnen Than Iehova, ka habe, Wâ bi, oge me he ka oi Nebukaneza than Babulona ûheny hnyi hwadro, a tuhan je than, tha e me je hors, ke je kariota, ke tavat tabö hors, ke deö at, ke tavat ae se hia, ka Turo. 8Ke e ame he ka hlingâ lakom wahlu ge hele vat hnyi je hna belök: kʼ ame he ka op cici u je tap vat, ke okhibö kânâ cici u, ke hai göranyai bec cici u. 9Ke e ame he ka otilâ anyin ta je ûnyi vat hnân thö hnyi ânyâm je hna up haginy, ke e ame he ka kia degecâ ânyâm je tap tue ge anyin je giwa. 10Anyin ae se hia haleny je hors me ame he ka oiyongi u ge sesâiny kânâ gadra: kʼ ame he ka öbubuny ânyâm je hna up haginy ge hwan tavat tabö hors, ke je kat, ke je kariota, e ka didro ka hnyi je homagöulem, helâ me udilidra hnyi taun adre me kia. 11Kʼ ame he ka utö dem je gethen hia thithö hnen ta je boûjimen can haleny je hors: ke e ame he ka hlingâ lakem ge hele vat, ke adre me he ka ohnyikânâ je taben tang hwegiâm. 12Kʼ adre me he ka hûgûnâ ta je omjehem, ke söh ânyâm ta je ûnyi adre ûcû: kʼ adre me he ka kia hagâm ta je hak, ke hagutâ umâm je uma ae hmanenang: kʼ adre me he bi ka khûâ hnyi köiö ânyâm je veto me utö me sesâiny kânâ. 13Ke oge me he ka bi obiny hwan ânyâm khumöng; kʼ adre me ca he hmetu bi ka long hwan ânyâm je kitara. 14Ke oge me he bi nya ka wiö u hnân kic ae ba leûnen: ke u me he ka dok hnân döi ert; kʼ adre me ca he hmetu ka up u: anyin a inya Iehova at ame ha, haingen Than Iehova.
15Walang hna ha hnen Than Iehova ka Turo, ka habe, Hawa, ame ca he ta je bomene ka öbubuny ge hwan ûtaem, e ka mâng tavat ae aat, kʼ ödra ka hlingâ tavat hnyi wanbâm? 16Haba hnyi ûen eling me ame he ka utut ta je thaniny köiö hia ûhedrin hnyi hon anyidrin ta je theron, me ip anyidrin je ûkot, me uny anyidrin ta je ûkhaû ae ve bongon bi: kʼ adre me he bi ka okhaûʼ ödra ge öbubuny; kʼ adre me he ka laba hnyi kânâ, ke adre me he ka labö öbubuny, me uthmâhmâ gam. 17Ke adre me he ka tenge thungaû gam, me ha köu, ka habe, Ekölö ge hna ohiö u waleji a labâ hnen aten köiö, taun ae lung, me hwege hnyi köiö, e me tavat adre me labâ, tavat adre me ooti ödra hia tavat adre me he hnyin! 18Walang ang ame he je bomene ka öbubuny hnyi bonginy ta a u; eke, ame he je bomene ka hlohlo hnyi bong u me he ka he hnyin. 19Anyin a walang hna ha hnen Than Iehova, ka habe, Iny ka he ka wiö u me me taun ae ba onyen, helâ me je taun ae ba aten, wale iny ka okhibö dok ae dit hom, ke ame he ka khaûö u hnen köiö ae gan; 20hnyi ûen eling, oge me he ka ohnyikânâi u tha u me tavat adre me utut kâû ka hnyi thop, ka tavat kâû adrem, me ip u hnyi dok a hnyikânâiny hmeledrany, hnyi je dok ae ba aten ehac, tha u me tavat adre me utut ka hnyi thop, me me ca labö u hmetu hnen tavat; ke oge me he ka ip hmanenang hnyi hnyei iny tavat ae möt: 21oge me he ka wiö u hnân outen ke ame he ka hiö u: eja ke ne adre ne elom u, adre me ca he hmetu ka ō u nyiele balua, haingen Than Iehova.
Currently Selected:
Ezekiela 26: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
