Ezekiela 24
24
1KE ame o but hmetu könya hofuc ho Iehova hnyi huna a naininy, hnyi tehi a ten, hnyi bong a teniny tehi, me ha, ka habe, 2Nokon at lö, sihnalimen ju ien bong, a bong ang: kʼ ame o than Babulona hnyi Jerusalema hnyi bong ang. 3Ke ha thö ûhöûcû ka lap ûkhin fuc, me ha kodra, ka habe, Walang hna ha hnen Than Iehova, ka habe, Ip ju öt hon meic, ip ju, ke hingölö köiö but minya ka hnyin: 4ke ûkhöûnâ thö ka hnyin je uthmeno, je uthmeno ae so, wale li benyin me li can; öunöngötâ thö ge je jö adre ûca. 5Hok mamoe thö adre ûca, ke ûkhöûnâ je jö eû hmelen, ke ocitrouâ wia e; eke, ölâ ju je jö hnyi wanben e.
6Anyin a wale, walang hna ha hnen Than Iehova, ka habe, Ekölö ge taun ame hingâlâ dra, a öt ae hu vi hnyin, kʼ adre me ca ohia vi wale ûnyi hnyi hnyin e! hai thö ke uthmeno me ke uthmeno; kʼ adre ca hia but kû e hnen ugleköbâ. 7Anyin a e hnyi wanben e dra e ame hingölö; e ame hingâlâ e hon kic ae ba leûnen; kʼ ame ca hingâlâ e hon kânâ me me iyong ge sesâ; 8me me he ka oâ hmönyin he ka bi hwaban, ke oge hia but ip dren bi hon kic ae ba leûnen me me ca iyong. 9Anyin a wale walang hna ha hnen Than Iehova, ka habe, Ekölö ge taun ame hingâlâ dra! oge me he bi nya ka oganâ hna khon utö. 10Hom gânâ thö utö, hû thö meic, ölâ wia ju utioiny, me me hu onyen dân, me thong degecâ je jö. 11Hwaban e otilâ e ae ba onyen hon je walep ae möt, me me kahwa, me hlâ brasiny, me me köiö but konginy eû hnyin, me me ohia vi hnyin. 12A sënyin dut momo ge huliwa ae hmak; ke so bi ame ca he but ûnyi gan anyin vi ae gan; kʼ ame ca hia bi vi hnyin ge meic. 13E bi hnyi hwakecâm ae ikiki ûnyi ae ti kong: oge hia but obosoi u ke u ca bo so, anyin a wale adre me ca he hmetu ka obosoi u ûnyi hnyi hwakecâm ae ikiki, ke ne o but oge me he ka ip hom anyik hmönyin. 14Inya Iehova at ame ha: ame he ka o, ke inya oge me he ka ânyâ; oge me ca he ka hmetu, ke oge me ca he ka betenge, ke oge me ca he ka ietra; adre me he ka bi hwaban köu hoton dem je gethen, ke hnâm je hna ânyâ, haingen Than Iehova.
15Ke ame o but minya könya hofuc ho Iehova ame ha, ka habe, 16Nokon at lö, wâ bi, oge me hûgûnâ gam wem hnen mok: ke so bi u me ca he ka tenge me tenge thungaû, ke ame ca he bi ka hingölö li deköiâm. 17Mâng ju ke ca hwege; ca he bi ka hnyamok, wano ju hnabicom, ke inâ ju li tangen hnyeûcam, ke ca tube li esongodâm, ke ca an ju jeû an tavat. 18Me oge fuc ka tavat hnyi hnyomakatu; ke hnyi sahac ame mokcu öiök: ke haba hnyi hnomakatu oge me ânyâ helâ me hna hûnâ könya. 19Ke haba tavat adre me ha könya, ka habe, Hawa, u me ca he ka thumetu ohmun hnân eû kohmun ta je ûnyi, mʼ u me ânyâ helâe? 20Me oge me ha kodra, ka habe, Ame o but könya hofuc ho Iehova, ame ha, ka habe, 21Ha thö ka lap anyi Isaraela, ka habe, Walang hna ha hnen Than Iehova, ka habe, Wâ bi, oge me he ka okongoâ anyik dok ae kap, wale tang hwegiöbun ae beönua, webun, ame oûnyihnatho hnen hnyekubun; ke ame he ka ta ge hele vat je lakubun obaga me wahlu waleji öbun e kec hotʼ ödra. 22Ke öbun e he ka ânyâ helâji me hnok hna ânyâ: öbun e ca he ka tube je esongodibun me an jeû an tavat. 23Ke ame he ka e bi hon böbun je hnabinybak, ke hnen ju je tangen hnyeûcabun hnyi je cabun: öbun e ca he ka tenge me tenge thungaû; ke öbun e he ka aû tot hnyi anyibun ta je hulo, me ûtengiököu. 24Helâe ame he Ezekiela ka hnân haten köbun: öbun e he ka ânyâ helâji me hnen hna ânyâ: ke e ka hwâdâ thö e, öbun e he ka wâ a inya Iehova.
25Ke haba u nokon at lö, hnyi bong oge me he ka hom gadra tang hwegiödra, wale senyin ge anyidra hmanenang, wale wedra, me weny hnyekudra, wale lakudra obaga me wahlu, 26hawa, ame ca he ka o köu at ame kec möt hnyi bong eling, me thumetu u? 27Haba hnyi bong eling u me he ka khong hnyimâm ka at ame kec möt, ke u me he ka fuc, ke u me ca he ka hum hmetu: helâe u me he ka hnân haten kodra; ke adre me he ka wâ a inya Iehova.
Currently Selected:
Ezekiela 24: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
