Amosa 6
6
1EKÖLÖ ge tavat adre me laba wia hnyi Ziona, me tavat adre me laba khotkic hnyi je buceniny Samaria, je at hnathu hnyi je hnyei ae beonuâ, wale ame he ködrin lap anyi Isaraela! 2He thö Kalene ai me wâ; ke ûhem e, he thö Hamath ai ae gan: ke utut minya Gatha ai anyin at Filisiti: hawa, ödra so hon je dokhu eling? ame ne gan je idra hon je ibun? 3Öbun tavat öbun e ûsâkâûö me bong ae kong, me ohakekenyâ taben lap anyin ûokonguny; 4tavat adre me mokut hon je hna mokut a nyon elefan, me hlöhlöu hon hnöjra je ong hna mokut, tavat adre me an lakon je hnahat mamoe, me lakon kau ûnyi hnyi hnyin uma; 5tavat adre me khumöngö je khumöng baû tha e me hwan nabeli; tavat adre me ûnykûme je ûnyikhumöng hobi kodra bi, helâji me Davita; 6tavat adre me ijem waina ûnyi hnyi je utkaia, kʼ adre me ka sûâ wakaco ae so; ke adre me ca hmak bi ge vec anyin Josefa. 7Anyin a wale adre me he walang ang ka bâ, tha ödra me tavat adre me bödra ka bâ, ke ame he ka hia hwan senyin anyin tavat adre me hlöhlöu. 8A hia but Than Iehova khemanyin ame ka ha gan bi, me haingo Iehova Khongon sabaoth, ka habe, Oge me höcö ge beönuâ anyin Jekob, me hûkotiâ je uma umen tuhan: anyin a wale oge me he bi nya ka hna taun me onyen. 9Ke ame ten je kolon tavat hnyi uma a khaca, me adre me he ka mok. 10Ke ame ne he ke kamen ka vadren at, wale at ame thong degecâ e, kʼ ame hom but je jö ûnyi hnyi hnyin uma, ke ame he ka ha ka at eiö hnyauma, ka habe, E hu at biju unyâm? me e ame he ka thu, ka habe, E ba; me e ame he ka ha, ka habe, Laba hnyibû ju; anyin ate me ca he ka ha iö Iehova. 11Anyin a wâ bi, Iehova ame hûna, ke adre me he ka kot uma ae gan, me me amam but, ke uma ae ûhnyûkong me me khekhe but. 12Hawa, ame he ta je hors ka wadring hon kic? kʼ ame he at ka wia kânâ eling hnen ta je bolok? anyin a öbun e hia but wia hna owisa ka hnyi waada, ke wan hwakecin ae wisa ka hnyi khöhlöng: 13öbun tavat öbun e hobâ ûnyi ae ba onyen me ha, ka habe, Hawa, ohmun e ca bi faoihmun meno ge tang hwegiöhmun? 14Ke wâ bi, lap anyi Isaraela lö, oge me be bi nya ka otilâ hnyei ûcûbun, haingo Iehova Khongon sabaoth; ke adre me he ka oveci öbun hwân hnyi homagöuliny Hamath ke ne o but ka hnyi wageweiny dok ae tha hon.
Currently Selected:
Amosa 6: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
