Amosa 7

1WALANG hna omanenâ könya ge Than Iehova: ke wâ bi, e ame op je wahamon hnyi dok a hwân ka kû hnyin jeû a biliny; he wâ bi wale hna kû a biliny hwaban hna sö hobi kâu than. 2Ke hnyi ûen adre hia but an hia önyi-nginy hnyei, me oge me ha, ka habe, Than Iehova lö, ö u thang degecâ hulo: ama kâmâu Jekob he ka tot? anyin a e ûhnyûkong. 3Haba Iehova ame ietra ûnyi e: Ame ca he ka hwâdâ haingo Iehova.

4Walang hna omanenâ könya ge Than Iehova: ke wâ bi, Than Iehova ame hawâ meic hnân bi hwaban, ke e ame thong dok ae ti dit, ke ame bethong ut kânâ. 5Me o ge me ha, ka habe, Than Iehova lö, ö e soju: ama kâmâû Jekob he ka tot? anyin a e ûhnyûkong. 6Haba Iehova ame ietra ûnyi e: Ame ca he ka hwâdâ haingen Than Iehova.

7Walang hnen hna omanenâ könya: ke wâ bi Than ame tot hnyi hak veto ame tot wisa, ke e hnyi hnyamen tulut tot. 8Haba Iehova ame ha könya, ka habe, Amosa lö, ieû u je wâ? He haingök, ka habe, Tulut tot. Ke haingen Than, ka habe, Wâ bi, oge me he ka otilâ tulut tot wanben lakeik a at Isaraela; oge me ca he hmetu ka he me digic ödra, 9ke ame he ka ba wan je dok ae gorany anyi Isaaka, me ba onyen je dok ae kap anyi Isaraela; ke oge me he ka tot ûcon lap anyi Jeroboama me hele vat.

10Me haba Amazia at bihut hnyi Bethela ame ûkhûnöng kö Jeroboama than Isaraela me ha, ka habe, A hia but Amosa si hnâm hnyi wanben lap anyi Isaraela: e ca ûcû bi hnyei he ka hok hnyokâ hwan je hofuc. 11Anyin a walang hna ha hnö Amosa, ka habe, Ame he Jeroboama ka mok ge hele vat, ke e hnathu adre me he ka hom bâ at Isaraela ûnyi hnyi idra. 12Ke haba Amazia ame ha kö Amosa, ka habe, At ame wâ lö, he thö, kec dö ka hnyi hnyei Juda, me han eling, me perofeta eling: 13ke ca perofeta hmetu bi hnyi Beth-ela: anyin a dok e ae kap anyin than, ke hnyaban e than. 14Me haba Amosa ame thu me ha kö Amazia, ka habe, Iny ca perofeta bi nya, ke ca nokon bi nya perofeta: ke iny at tuö meno me at ame huliwan je ûö sukamore: 15ke Iehova ame hum nya ûnyi hnyi hoton hnahat meno, ke Iehova ame ha könya, ka habe, He thö, me perofeta ka lakeik a at Isaraela. 16Anyin a wale long ju walang ang hofuc ho Iehova, ka habe, Haingâm, ca perofeta bi ka at Isaraela, ke ca fuc bi ka lap anyi Isaaka; 17anyin a wale walang hna ha hnö Iehova, ka habe, Ame he âiâm ka helâ me momo hnyi getheniny taun, kʼ ame he ka ta lakon obaga me wahlu ge hele vat, ke adre me he ka khenâ em hnyei ge tulut tö; ke u me he bi ka mok hnyi hnyei ae ikiki, ke e hnathu adre me he ka hom bâ at Isaraela ûnyi hnyi idra hnyei.

Currently Selected:

Amosa 7: IAAI

Highlight

Copy