Amosa 4

1LONG ju hofuc ang öbun je kau hnyi Basana, a öbun hnyi je bucen Samaria, a hnyat öbun e ovecâ tavat ae theduoc, me okongoâ tavat ae vec, a hnyat öbun e ha ka latuhöbun, ka habe, Hom but jem me habelihmun. 2A hia but Than Iehova khemanyinâ hwakecin ae kap, a gʼ ame he ka o but köbun je bong adre me he ka hum öbun ge ta je bâlet, me lelö kolon gabun ge je wage. 3Ke öbun e he ka he ehele hnyi je dok ae hmouca ve cici öbun; ke öbun e he ka khûʼ öbun ka hnyi Haremona, haingen Than.

4Ai öbun Beth-ela ai, me ânyâ monu; ke Gilegala ai, me osehia hnobun je hna hanyâûâ; ke hom anyibun je hut hnyi je hnyomakatu, ke anyibun je ke keihen a libenyitainy hwaban ta bong a kun hia; 5me hudo thö hudiny ole adre me levenâ, me thu bongon je hut ae betenge me haimemenâ: anyin a wale webun, lakon Isaraela, haingen Than Iehova. 6Ke oge hia but ham köbun je nyu ae ba tiren hnyi anyibun je taun hia, me ohmiâ jeû hnyi je hnobun hia: ke so bi öbun e ca hmetu könya haingo Iehova. 7Me oge hia but behânâ we köbun, ke adre me he bi ka menu hwaban kun ta tehi: ke oge me ota we hnyi ke taun, kʼ oge me ca ota hnyi ke taun: kʼ ame ta we ka hnyi hon ke ong dok, ke haba dok ame ca ta we ka hnyin me ame melecâ thö. 8Waleling me me he lo li taun ame ne kun ka hnyi taun a khaca he ka ic köiö, kʼ adre me beic bala bi: ke so bi öbun e ca hmetu könya haingo Iehova, 9Oge hia but kuc öbun ge meleca me löhau: ke haba wahamon ame an hnyiganiny ibun ta hnyei, me ibun je hnyei vine, me halebun je meta, me halebun je elaio: ke so bi öbun e ca hmetu könya haingo Iehova. 10Oge hia but kunâ köbun mok ae cap helâ me hnyi Aigupito: oge hia but hlingâ wahidröu gabun ge hele vat, me hûgûnâ halebun je hors: ke oge hia but oâ bokonginy hnobun hna hunuma ka hnyi je hnyingöibun: ke öbun e ca hmetu könya haingo Iehova. 11Oge hia but ohia keihen gabun helâ me hnen Khong hna ohia Sodoma me Gomora, ke öbun ûcû me uthmeic adre oc ûnyi hnyi meic: ke so bi öbun e ca hmetu könya, haingo Iehova. 12Anyin a wale, oge me he ka ânyâ helâe köu Isaraela: ke can anyin oge me he ka ânyâ helâe köu, penapena thö he ka iouny me Khongom, Isaraela. 13Anyin a wâ bi, haba at ame op je bucen, me mâdrâ ang, me omanenâ ka at ûnykûmenen, at ame wia hnyomakatu me me lit, me vheno je dok ae gorany hnyi hmeledrany; haba ien e, me Iehova Khongon sabaoth.

Currently Selected:

Amosa 4: IAAI

Highlight

Copy