Amosa 3
3
1JE lakon Isaraela lö, long ju hofuc ang wale a ha Iehova ûcûbun, ûcon lap hia oge hom ûheny hnyi hnyei Aigupito, ame ha, ka habe, 2Oge hia but khanö nya thibi öbun hnyi ta je lap hia eang hmeledrany: anyin a wale oge me he ka bi hwaban ta je hwakecibun hia ae kong. 3Hawa, ame he ka tha he li at a lo, e ka ca tha hnyekudru bi? 4Hawa, ame he ka kuku liona hnyi hnyot, e ka ba haniny? hawa, ame he nak liona ka fuc hnyi umen bi, e ka ba ûnyi e ame hom? 5Hawa, e khana meno ameʼ gâ he ka ta hon kânâ ge hnewe e ka ba ofific hobi kâu? ame he ka fific ofific eû hnyikânâ, e ka ba haniny? 6Hawa, adre me he ka tûâ trutru hnyi taun, ke ame ca he ka ot tavat? hawa, ame he ka hu ûnyi ae kong hnyi taun ke a ca ânyâ bi Iehova? 7E hnathu ame ca he bi Than Iehova ka ânyâ ke ûnyi a ne ca bân ka omanenâ weny ka je perofeta a je athnyabainy. 8A um dö kuku liona, ie at ame ca be ka outen? a hia but Iehova fuc, ie at ame ca he bi ka perofeta?
9Haimemenâ thö hnyi je uma umen than hnyi Asedoda, me je uma umen than hnyi hnyei Aigupito, me ha, ka habe, Ûkhacaköu thö hon je buceniny Samaria, me wâ je imediököu ae gan hnyin e, me je hna ovecâ hnyi wanben e. 10Anyin e ca khanʼ ödra he ka ânyâ ûnyi ae ûcû, tavat adre me ûkhöûnâ ûokonguny me hna söh hnyi umödra je uma ae hmanenang, haingo Iehova. 11Anyin a wale, walang hna ha hnen Than Iehova, ka habe, Ame be ka hu iwahnaihmiony igigilo hnyei; ke e ame he ka hûgûnâ tang hwegiâm gam, ke adre me he ka söh umâm je uma ae hmanenang. 12Walang hna ha hnö Iehova, ka habe, Adre me he ka hûgûnâ lakon Isaraela tavat adre me laba hnyi Samaria hnyi kopiny hna mokut, helâ me at tuö mamoe ame hûgûnâ ûnyi hnyi hnyimen liona li can, ame ne ke keihen hnyikonyen. 13Long ju öbun, me ohnathoâ ûcon lakon Jekob, haingen Than Iehova Khongon sabaoth. 14Anyin a hnyi bong oge me he ka bi hwaban monuiny Isaraela, me oge me he minya ka bi hwaban ka je taben hut hnyi Beth-ela, ke adre me he ka sö degecâ je baitoiny taben hut, me kolu hnyikânâi. 15Ke oge me he ka tha kot umen hnyeun me honivakiny; kʼ adre me he ka ohia je uma a nyon elefan, kʼ ame he ka ba but je uma ae gan, haingo Iehova.
Currently Selected:
Amosa 3: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
