Ta je huliwa 16

1ME e ame o minya hnyi Derebe me Lusetara: ke wâ bi eling ke aten, Timoteo ien, nokon momo Juda at ame labageju; ke at Heleni bi kamen. 2Adre haisoâ e hnen je liamekeiny hnyi Lusetara me Ikonio. 3E we Paulo e ame he ka tha he mê; me e ame hom e me peritomonâ, anyin ae hu tavat Juda hnyi je ke keihen eling: anyin ae khanʼ ödra hia a at Heleni kamen. 4Ke ödrin e vheno je taun, me ödrin e ham kodra ta je hnanyibu, waleji a otilâ je aposetolo me wahingat hnyi Jerusalema. 5Me adre me otethmâ ekalesia hnyi labageju, me bi hanen hnyi je bong.

6Ke ödrin e vheno Ferugia hia me hnyei Galatia, haba Hanu Kap ame thawʼ ödrin he ka ca ha hofuc hnyi Asia; 7ke ödrin e o but cicö Musia, me ödrin e ûnykûme he ka he Bithunia ai; ke ame ca hnʼ ödrin bi Hanu Iesu; 8me ödrin e nulâ Musia me o hnyi Troas. 9Ke Paulo ame wâ hna omanenâ hnyi lit; Ame tot at Makedonia, me sumâtâ e, ka habe, He but jem Makedonia ai he ka hadruʼ ohmun. 10Ke a hia but wâ hna omanenâ, ohmun e ie penapena ka he Makedonia ai, anyin a ohmun e wâhmakhmeto a ga hia but Than kunʼ ohmun he ka khetâ kodra ûthumetu ae so.

11Anyin a wale ohmun e tabâ hu ûheny Troas, me kec wisa Samotheraki ai, me nyi Neapoli ai; 12ke ûhehmun e, Filipi ai, taun ae beönua hnyi ke keihen eling hnyi Makedonia, ke koloni: ke ohmun e laba hnyi taun ang hnyi ke je bong. 13Ke hnyi bong sabath, ohmun e he ka hnyi hoton taun hnyi baten wagewe, waleji ohmun e ûnykûme he ka wâ ke dok hnân hic; ke ohmun e laba ju, me ha hofuc ka watamomo adre me ûkhacaköu eling. 14Ke ame ling ohmun hnen ke momo Lidia ien, at ame ûcû mano ae udrudrâ hlit, aten taun a Thuataira, at ame hmi ka Khong: ke haba Than ame khong ut hnyekon he ka long ta je hofuc ame ha Paulo. 15Ke adre hia but bapataisoâ e me anyin lap, me e ame hawʼ ohmun, ka habe, Öbun ka ûnykûme a inya oge me labageju ka Than, me ai öbun ka hnyi umök uma, ka laba. Me e ame thawʼ ohmun.

16Ke hnyi ke bong ohmun e he ka hnyi dok adre me hic hnyin, me ame ûkhane thö möhmun hlu a delec hanu ame bi obotkong, ke se hia omjeû ame o ka latuhan, troban anyin bihihwakecin. 17Kʼ ame he hotu Paulo hlu eling, me ohmun, kʼ ame ha hwegiâ, ka habe, Lathnyabainy Khong ae beönua hnyat ang, tavat adre me haimemenâ köbun gethen deny möt. 18Ke se hia je bong e ame ânyâ e. Me ame hmak hnyekon Paulo, me e ame hwio me ha ka hanu, ka habe, Inya oge me ha köu hnyi iö Iesu Keriso he ka didrut ûhem hnyi hnyin. Me e ame didrut hnyi awa eling.

19Ke a wâ but hnen latuhan ae ba hmetu deny omjeû ködru, me ödrin e kot Paulo me Sila, me lili ödru ka tavat musi hnyi hna ûcû, 20me ödrin e hum ödru ka je taben, me ha, ka habe, Haba li at Juda eang, ödru me omonoâ anyita taun, 21me ûnö je hwakecin ae ca ûcû köta a at Roma he ka kap me mâdrâ. 22Me ame tha todrö tavat ae se hia ködru: ke haba je taben, ödrin e kia but je khauödru, me ûkhû-nöng he ka kuc ödru ge je osö. 23Ke ödra osehia kuc ödru, me adre me khûʼ ödru thö ka hnyi uma ceat, me hûna ka at tuö uma ceat he ka tuʼ ödru wia: 24e ame long hofuc eling, me e ame khûʼ ödru ka hnyi hnyeule eiö hnyi hnyin uma, kʼ ame ohmâ li cadru hnyi utö. 25Ke hnyi wanbenset haba Paulo me Sila ödru me hic me khumöng ka Khong, kʼ ame ling ödru hnen tavat wale adre me cʼ ödrin minya; 26me ame ie o but hwiöi ae gan hmâ, me jijingâ je taben uma ceat: me ame ie memang ut hlinginy je hwanuma hia; me ame ok ut je hna cʼ ödrin. 27Ke ame hmak dö at tuö uma ceat, me wâ ta je hwanumen uma ceat adre hia but khong, me e ame oc dö anyin bele vat he ka hlingâ e bi, anyin a e ame ûnykûme a kec ut tavat adre ca. 28Ke haba Paulo ame ha hwegiâ, ka habe, Ca mē okongu u bi, anyin a ohmun bia ang. 29Me e ame ie hongot he ka hom je okûnû, me wadring ka hnyin uma, kʼ ame ta öbubuny hnyi hnyimakö Paulo me Sila, 30me hum ödru but hnyou ai, me ha ka habe, Li than lö, ieû hanymök oge me he ka ânyâ me inye mödrut? 31Ödru me ha, ka habe, Labageju ka Than Iesu, me u me he ka möt, me ânyâm bi lap. 32Me ödru me ha hofuc hwan Than kâu, me kodra hia hnyin umen uma. 33Me e ame hum ödru hnyi awainy lit eling me hneû hwadeny je osö; me ödru me bapataisoâ e me anyin hia lap. 34Me e ame su ödru ka hnyi umen uma, me ip jeû hnyi hnyimakodra, ke haba e me anyin lap hia ödrin e senyin me labageju ka Kkong.

35Ke a lany jut, haba je taben adre me kunâ je athnyaba he ka ha, ka habe, Hna but li at e he ka he. 36Me ame ha at ame tuö uma ceat hofuc eling kö Paulo, ka habe, A ûkhûnöng je taben he ka hnʼ öbu but; anyin a wale, didrut öbu, ke tha he thʼ öbu me hnahic. 37Ke haba Paulo ame ha ködrin, ka habe, Adre hia but kucʼ ohmun hnyi hnyimakan tavat, kʼ at tiga ca hnei öhmu, a li at Roma ohmu, ke adre hia but cʼ öhmu; ke walang ang, adre me he ka obʼ ʼöhmu duöngi öhmu? ohe; e so adre me he jem he ka hum öhmu hnyou ai. 38Haba je athnyaba adre me ha ta je hofuc eling ka je taben: ke ödrin e long ut a ödru li at Roma, me ödrin e ot; 39me ödrin e he but me bi so ködru; ke a hia but hum ödru hnyöu ai, me ödrin e sumat ödru he ka he but ûnyi hnyi taun. 40Me ödru me didrut ûhedru hnyi hnyin uma ceat, me didro ka hnyi uma umo Lidia: ke ödre hia but iouny me je liamekeiny, me ödru me sihwegi ödra, me ödru me he but.

Currently Selected:

Ta je huliwa 16: IAAI

Highlight

Copy