Ta je huliwa 15

1KE ame o thö keihen ûhedrin Juda, me nâ je liamekeiny, ka habe, Adre me ne ca peritomoni öbun helâ me hwakeci Mose, me ca khanʼ öbun he ka möt. 2Haba Paulo me Banaba ödru me iwatetra me ivinö mʼ ödra, me adre me thamuâ he ka kunö Paulo me Banaba me keihen gadra Jerusalema ai ka ta je aposetolo me wahingat, can hnödra hna ivinö. 3Ke ame su ödrin ekelesia, ke ödrin e gethen hnyi Foinike me Samaria, kʼ ödrin e omanenâ ihwiöiny Aten ta je hnyei; me ödrin e okûâ senyin ka je liamekeiny hia. 4Ke ödrin e o but hnyi Jerusalema, ke ame köp ödrin hnen ekalesia, me je aposetolo, me wahingat, me ödru me omanenâ ta je ûnyi hia thithö ame ânyâ Khong ûnyi gadru. 5Ke ame todrö keihen je Faresaio a hnyat labageju, me ha, ka habe, E ûnyi hnathu he ka peritomoni ödra, me hûna ködra he ka vheno hnanyibu anyi Mose. 6Me ame ûkhacaköu thö je aposetolo me wahingat he ka ûhnenamö ûnyi eling. 7Adre hia but ivinö gan hmâ, me ame todrö Peteru me ha ködra, ka habe,

Hnyat me lakein lö, e khanʼ öbun dut ehac a hnen Khong hna ûca ke at gabun, me me he Aten ta je hnyei ka hnyi long hofucin ûthumetu ae so ûnyi hnyi hnyimök, me me labageju. 8Ke haba Khong at ame wâhmakhmetoâ je hnyok ame ohnathoâ ködra, kʼ ame ham kodra Hanu Kap, helâ minya ji kötin; 9ke e ame ca wâhmakhmetu otin bi mödra, ame ânyâwia je hnyekudra ge labageju. 10Anyin a wale ieû gabun öbun e cubec Khong, tue ip hnân ûhûkâlâköuâ hon nyin je laten, waleji ae ca khana lakamötin, mʼ otin minya he ka vadren? 11Ke otin e labageju a gʼ adre me he ka omeli otin helâ me Ödra ge betenge baû anyin Than Iesu.

12Me ame laba hnyibû but ûkhacaköu hia; me adre me vehling Banaba me Paulo ödru me ûthumetu ge je haten me je ûöman ame ânyâ Khong ûnyi gadru unyin Aten ta je hnyei. 13Ke ödre hia but fuc, haba Iakobo ame ha, ka habe,

Hnyat me lakeiny lö, ling nya ju: 14Haba Simona ame hia but omanenâ hnen Khong hna senâ bânâ Aten ta je hnyei, he ka hom ûnyi gadra hnyei hobi kâu ien. 15Ke khaca thibi e me hofuc hwan je perofeta; helâji me hna sihnalimen, ka habe,

16Hwaban ta je ûnyi e oge me he ka hmetu,

Ke oge me he ka hai uma menâ umö Davita a u;

Me oge me he ka op hmetu je dok ae hmouca hnyin,

Me oge me he ka otilâ e:

17Madre me he ka elâm Than hnen ta je kolon tavat,

Me Aten ke je hnyei hia wale adre hwenyi iödra ûnyi hnyi iök,

18Haingen Than, at ame haimemenâ ta je ûnyi e hwân hnyi hna op hmeledrany.

19Anyin a wale, haba ûnykûmenök, e so otin e ca ohmakâ tavat unyin Aten ke je hnyei adre me hwio ka Khong; 20ke so otin e he ka sihnalimen ködra he ka ûsâkâûö me ta je ûnyi ae ikiki anyin je hnatheat, ke bi ûnyi monu, ke je meno adre me noc nyin, ke dra. 21Anyin ae hu ga Mose tavat hwân hnyi je dö kâû adrem, adre me khetâ e hnyi ta je taun hia, kʼ adre me labö aû eiö hnyin je sunago hnyi je sabath hia.

22Ke so ling ka ta je aposetolo, me wahingat, me ekalesia hia he ka ûca ke li at gadra bi, me kunʼ ödru Anetioka ai tha ödru me Paulo me Banaba; jia Juda, ke ien minya Basabasa, me Sila, li at ae nua unyin je liamekeiny: 23kʼ ödru me hom adre me sihnalimen, ka habe, Haba je aposetolo, me je liamekeiny a wahingat, me adre me italofa me je liamekeiny a Aten ta je hnyei hnyi Anetioka, me Suria, me Silikia: 24Ohmun e long a gʼ ame ohmaki öbun ge ifucin ke je hnyat ûhedrin ang unyihmun, kʼ ödrin e omonâ je hnyekubun; waleji ohmun e ca hûna ködrin; 25ke tha hnyekuhmun dut, me so kohmun he ka kunâ li at köbun adre me ûca he ka tha he me Banaba me Paulo, laoûnykûmihmun, 26wale li at ödru me ca oûnyihnathoâ anyidru möt ehac hobi kâu ien Tuhöta a Iesu Keriso. 27Anyin a wale, ohmun e kunö Juda me Sila, mʼ ödru me he ka ha ta je ûnyi a ka e ge li hnyimödru. 28Anyin ae so ka Hanu Kap, ke so minya kohmun, a gʼ adre me ca he bi ka hûgo gânâ hok köbun, hon ta je ûnyi eang ae ûcû, ka habe; 29ca kâlâ je meno adre me hudo ka je hnatheat, me dra, me ta je meno adre me noc nyin, ke ca bi ûnyi monu; öbun e ne ûsâkâûö me ta je ûnyi e, me öbun e so but. Otin iouny dö.

30Ke adre me kunʼ ödrin, me ödrin e o but hnyi Anetioka; ke ödrin e hia but ûkhacaköuâ tavat ae se hia, me ödrin e ham tusi. 31Ke adre hia but aû, me adre me senyinâ hna okahwʼ ödra. 32Ke haba Juda me Sila, a li perofeta ödru, me ödru me okahwâ je liamekeiny me ha hwegiödra ge ta je hofuc ae se hia. 33Ke beû hmâ hnödru hna laba, me ame kunʼ ödru soi ödru but hnen je liamekeiny ka tavat adre me kunʼ ödru. 35Ke haba Paulo me Banaba, me ke je hnyat ae se, ödrin e laba hnyi Anetioka, kʼ ödrin e ûne me khetâ hofuc hwan Than.

36Hwaban ke je bong, haba Paulo ame ha kö Banaba, ka habe, Otu he hmetu ka wâ je liamekeiny hnyi ta je taun hia waleji öte khetâ hnyin hofuc hwan Than, adre me hawa la. 37Ke we Banaba he ka hawo Ioane minya, ke ien Mareko. 38Ke haba Paulo ame ûnykûme e ca so bi he ka tha he mödru at a kec ehac gadru ûheny Pamafulia, ke ca tha he mödru ka hnyi huliwa. 39Me ödru me iwatetra; me ödru me ûsâkâûö but, haba Banaba ame hawo Mareko, me tabâ hu Kupero ai; 40ke Paulo ame ûcö Sila me he, ame hnʼ ödru but ka hnyi ibetengiö baû anyin Than ge je liamekeiny. 41Me e ame vheno Suria me Silikia, ame sihwegiâ ta je ekalesia.

Currently Selected:

Ta je huliwa 15: IAAI

Highlight

Copy