Ta je huliwa 17

1KE ödru me he hnyi Amefipoli me Apolonia, me ödru me o hnyi Thesalonika, ke e hu sunago eling anyin at Juda: 2ke haba Paulo ame didro kodra, helâ me hwakecin, ke kun ta sabath e ame ûhnenamö mödra je hna sihnalimen, 3ame lau me ha kodra, ka habe, e ûcû Keriso he ka hom vec, me möt hmetu ûheny hnyi hna mok; haingen minya, ka habe, haba Iesu eling wale oge me omanenâ köbun, me wale thibi e Keriso. 4Haba keihen gadra, adre me kap, me tha laba me Paulo me Sila; helâe minya, se hia at Heleni, tavat adre me outen Khong, me ke je momo minya hnyat ae ûnyi hnathu. 5Ke haba at Juda adre me hmönyidra, me hawâ tavat ae kong ûhedra hnyi hna ûcû, me bi hanödra, me omonumonoâ taun hia; me adre me utut ka hnyi uma umo Jasona, me adre me elâm deny he ka hum ödru ka tavat eû hnyöu. 6Ke adre me ca ō ʼdru, me adre me lili Jasona me ke je liamekeiny ka tavat muso taun, kʼ adre me fuc hwege, ka habe, Haba hnyat ang a tavat adre me omonumonoâ hmeledrany, me ödrin e o but minya eang; 7ke e köp ödrin Jasona: ke odra hia hnyat hanyâûâ ta je hnanyibu anyi Kaisara, hai-ngödra, ka habe, e hu ke than bi a Iesu. 8Ke adre me ohmakâ hnyekon tavat ae se hia, me hnyat muso taun, at ka long je hofuc e. 9Ke ödrin e kap haten ûnyi ga Jasona me keihen, me adre me hnʼ ödrin dut.

10Haba je liamekeiny, me adre me ie kunö Paulo me Sila hnyi lit Berea ai: ke ödru me o but me ödru me didro ka hnyi sunago anyin at Juda. 11Ke beönua hwakecin ae so ge tavat ang hon at Thesalonika, anyin adre me kap hofuc ge je hnyekudra ke wedra, kʼ adre me elâm je hna sihnalimen hnyi je bong, he ka wâ hnathuiny ta je unyi e. 12Anyin a wale, ödra se hia adre me labageju; helâe minya ke je momo Heleni hnyat ae ûnyi hnathu, ke se hia minya obaga. 13Ke ame long at Juda hnyi Thesalonika, a ga hia but Paulo khetâ hofuc hwan Khong hnyi Berea, me adre me be kâe, me obwebwelâ me omonumonoâ tavat ae se hia. 14Me haba je liamekeiny adre me ie kunö Paulo ka hnyi hobat köiö: kʼ ame laba biju eling Sila me Timoteo. 15Ke haba hnyat Ödrin e ip Paulo me ödrin e tha he mē ke ne o but hnyi Athenai: ke e ame hûna ködra he ka ha kö Sila me Timoteo, ka habe, e so ödru ma ie he but kâu, me ödrin e hmetu.

16Ke haba Paulo ame tiga halubahingʼ ödru hnyi Athenai kʼ ame hmak hnyekon anyin a e ame wâ taun ae unöngöt ge ta je hnatheat. 17Anyin a wale, e ame ivinö me at Juda hnyi sunago, me tavat adre me outen Khong, me tavat minya adre me iouny mē hnyi je bong hnyi hna ûcû. 18Me ame ivinö me keihen hnyat bemetâ a latö Epikureo, me hnyat Setoiko. Haingen keihen ka habe, Ieû ame he ka ha hnen at ang ame fuc bebehu? Ke haingen keihen, ka habe, Haba e, me helâ me at ame omanenâ ta je khong kanyua: anyin a e ame kheti Iesu ke möt hmetu. 19Me adre me kât e, me hom e Areopago ai, me adre me ha, ka habe, Hawa e so kohmun he ka hnyi khanʼ ohmun hna ûne eang ae teb ûnyi u me ha? 20Anyin a u me hom ka hnyi je hnyikönyöhmun ke ta je ûnyi bi: anyin a wale, e bewehmun he ka wâ ûnykûme bongon ta je ûnyi e. 21(Ke ba ke ûnyi ame vheno at Athenai hia, me ta je atkanyua adre me laba eling, ke so bi he ka omanenâ me long ke ûnyi ae teb ûnyi.) 22Haba Paulo ame todrö hnyi wanben Areopago me ha, ka habe,

At Athenai lö, oge me wâhmakhmeto a e gan hmâ anyibun ot ka ta je khong thoi hnyi ke ta je ûnyi. 23Anyin a oge me ngenu me wâ ta je ûnyi öbun e hmi kâu, ke oge me wâ minya ke taben hut adre sihnalimen hon, ka habe, HOBI KÂU KHONG ADRE CA WÂ. Anyin a wale haba ûnyi öbun e hmi kâu me ca wâ, e thibi ang oge me he ka omanenâ köbun. 24Haba Khong at ame op hmeledrany me ta je ûnyi hia eû hnyin, e thibi Tuhan drany me hmeledrany, e ame ca laba hnyin ta je uma adre ânyâ ge je hnyamen; 25ke ame ca huliwa minya kâu hnen ta je hnyamen at, helâke adre me ânyâ ka theduoc, anyin a e ame ham hia möt, me homenâ, me ta je ûnyi hia ka ta je ûnyi hia; 26ke e ame op hnyi dra a khaca tavat hia he ka labâ hmeledrany, ke a hia but thu je ûen adre otilâ ehac, me je hnyigoulen je idra; 27mʼ adre me he ka elâm Khong, ame ne khanʼ ödra he ka khaûteta e, me wâ e, ke so bi e ca ûsâkâkâû mʼ öta hia thithö: 28anyin a öta möt me bwebwet, me e bi unyin; helâ me hna ha hnen keihen adre sit khumöng gabun, ka habe, Anyin a je mâtrâniny öta. 29Awe otin e ne je mâtâniny Khong, e ca so köta he ka ûnykûme a ga ûcû Khong me gol, me sileva, me veto adre me huliwan ge metâiny at, me bihihwakecin anyin at. 30Haba Khong ame hokhnyokâ ta je ûen waleji adre me ca wâ ûnykûme hnyin; ke e ame hûna ka tavat hia thithö hnyi je hnyei hia he ka ietra: 31anyin a e ame hia but thu bong he ka ûhnei me owisa hmeledrany hnen at e ame hia but otilâ; ke e ame ohnathoâ e ka tavat hia hnyi hnen hna omelö hmetu thö e ûnyi hnyi hna mok.

32Adre me long möt hmetu ûnyi hnyi hna mok, me haba keihen adre me hiâ; ke haingen keihen, ka habe, Ohmun e he ka ling u hmetu ge ûnyi e hnyi ke ûen. 33Ame he but Paulo gadra. 34Kʼ ame kece kâu bi keihen me labageju: e unyidrin Dionusio at Areopago, me ke momo Demari ien, me ke je hnyat mödru.

Currently Selected:

Ta je huliwa 17: IAAI

Highlight

Copy