Lukas 17

1Is ika aien ehele ilpu atimi atahaijeg yin, Et ehka intivaig nedo oop atimi; ja a’a, auwe va natimi ineig et ago nedo oop aien! 2Et upene nathaivaig inhat alupas irara flaur an nauinwan, um ethaigse yin an jop; et has nagovaig nedo oop vaig tah ilpu hal unyak iji eigki. 3Akumu aminjinai caua aijaua: el et ago nedo has vai euc a etoam, namu acaiji yin aiek; el et taigtaig inliinmopon aien, namu jim aru nedo o un aiek: 4el et ehceseven ago nedo has vai euc aien an nadiat et ethi, um lep ehceseven adumoij pan ehelum aien, um ika, Et taigtaig inliinmopok ainyak; namu jim lep aru nedo o un aiek.

5Eris ika ehele Natimarid a ilpu apostolo, Namu ika aiek yi esjilid nimyiisjis ninivaijec unyima. 6Is ika a Natimarid, El et idivaig nupsi mustart nimyiisjis ninivaijec unyimia, el eka ika aijaua va nateg ineigki, Uhmu atecrei, um ahoaig an jop; etpu ahgei intas unyimia. 7El et ago nacujitai a naheca o un tah caua ka asgi kurimatau, et wat ahes uman a naheca iyehki, inyi ti ika ehelen aien, Apan aiek, um ateucse, um hag. 8Etpu idim ika ehelen aien, Ago nitai caig incak aiek, um aso euc an napelumai unyum, um aheca unyak, ki uhup ainyak um hag um umwig; ja napu apitac aiek um hag um umwig. 9Et naaurineig vai naheca o un aien et wat ago nitai iji eigki aien is asaig ehelen aien, ka o’o? Ek ika ainyak, O’o. 10Et idim ucco, aku wit ago niji itai asega aijaua eris asaig ehelemia, akumu ika aijaua, Ecra eti ilpu aheca esjilid aijama: ecra mun ago nitai iji eigki ache aijama eris asaig ehelema.

11IS wat apan aien nalaig Jerusalem, is atga aien an niblan pece Samerya im Calili. 12Is wat atga aien an haklin nuarin-pece is ethi, eris aubillid yin a ilpu atimi lepros is ten, eris aiji ara itac acen: 13um ahlaig ijinies, um ika, Ak Iesu, Natimarid, aiheuc vai cama aiek. 14Is wat ecet ra aien, is ika ehele ra aien, Akumu apan aijaua um ehvai caua ehele ilpu atimi ahlap. Eris wat apan ara, eris adicinadicin ara. 15Is wat ato natimi is ethi ira ra, nikavaig, is cehcehe aien, is lep adumoij aien, um ahlaig ijinies um imyiahpas Atua: 16is atpuse aien u neduon, um naaurineig vai yin: is upu Samerya aien. 17Is tas a Iesu, um ika, Era mun adicinadicin natimi iji eigki et ten; ja atimi et nain ji ek eda? 18er eti ecet tah ra nadumoij pam vaig par imyiahpas Atua, natimi an taka pece ineigki ache. 19Is ika ehelen aien, Atidai aiek, um atga unyum: na mun cehcehe aiek va nimyiisjis ninivaijec unyum.

20Eris ahodai yin a ilpu Farisi, um ika, Etpu yetpam nelcau o Atua an nahopan? Is tas ehele ra aien, um ika, Et ham nelcau o Atua, jam eti alum atimi: 21eri eti ika ara, Almoi igcaki! ka, Almoi eanko! et idim eteuc nelcau o Atua anliinmopomia. 22Is ika ehele ilpu atimi atahaijeg yin aien, Etpu yetpam nadiat iji ehki, aku wit merit aijaua nalmoivaig nadiat inyi ethi o Inhal o natimi, jam eti ecetai. 23Erupu ika ehelemia ara, Almoi igcaki; ka, Almoi eanko: akumu jim apan ehele ra aijaua, um jim apitac ra. 24Et idivaig nehcohos u nauwainapit, an nahaijin nohatag um ehlo nahaijin nohatag nememina iran, etpu idim ucco a Inhal o natimi an nadiat iyehki o un. 25Ja eris idim ika inyi upyi hup aien um leucse nohocred inyi ahinag; erupu lep amcel vai yin atimi an naopan ineig. 26Is idivaig nedo an naopan yehki an numoh o Noa, etpu ucco nedo an naopan iyek inyi hamki a Inhal o natimi: 27eris hag ara, um umwig, um atmehgan, um asanlai, um uhum pan nadiat iyehki is apan anliin nelcau a Noa, is ahgarero nobohtan vai inwai, um auahas atimi asega. 28Is lep idivaig nedo an naopan iyehki an numoh o Lot; eris hag ara, um umwig, um auarimtai itai, um ahtai itai, um ahapol, um actai eom; 29ja an nadiat iyehki is ude Sotom a Lot, um atga o un, is ahes incop im narekwas an nohatag um asuol, um auahas atimi asega; 30etpu idim ucco nedo an nadiat iyek inyi ehcohos pamki a Inhal o natimi. 31An naopan iyehki aien inyi amen ijinies neom o un aien, um amen inpadiaig o un anliin neom, etmu jim asuol aien um leucse; im lep aien inyi amen uman aien, etmu jim adumoij pan aien an nimnim o un. 32Akumu imyiehva ehgai Lot aijaua. 33Aien et ika aien yi imyicoho yin, etpu mas aien; aien inyi mas aien, etpu leh nitia umoh iran aien. 34Ek asaig ehelemia ainyak mika, an nepeig iyehki erupu asjeuc an tinan inyi ethi natimi inyi ero; uhpu atipagki inyi ethi, um ude inyi ethi. 35Erupu ehrirara flaur intakata inyi ero; uhpu atipagki inyi ethi, um ude inyi ethi. 36Erupu amen umarau natimi inyi ero; uhpu atipagki inyi ethi, um ude inyi ethi. 37Eris tas ara, um ika ehelen, Eda, ak Natimarid? Is ika ehele ra aien, Erupu asjapicnaig inmeijcop an nuarin ineig inyi amen iran nohu natimi mas.

Currently Selected:

Lukas 17: ATY1863

Highlight

Copy