Lukas 16

1Is ika aien ehele ilpu atimi atahaijeg yin, Is eteuc naheca esjilid o natimi ikni itai is ethi; eris ika vai yin is eduaraprap irai padiaig o un aien. 2Is ahlaig vai yin aien, um ika ehelen, Nev edo ineigki unyum ek mun atahaijeg vaig ainyak? asuptecnaig nedo unyum aiek; et ehka vai euc inlep aheca unyak vaig. 3Is ika inliinmopoi naheca iyehki, Inki auri ainyak? etpu atipagki nyak a natimi alupas unyak u nahecavaig unyak: et ehka vai nyak nacujitaivaig: um lep ehcamai ainyak nugni itai vaig: 4ek mun ato ainyak nitai ineig ekpu ago ainyak, mika, uhu wit atipagki nyak an nahecavaig, eri leh pan nyak atimi irai eom ura. 5Is asjapicnaig atimi iji eigki asega aien eris eti aru itai ara imi natimi alupas o un, is ika aien ehelen is ethi, As eti aru inhe aiek imi natimi alupas unyak? 6Is ika aien, Naraki an nipjinitai asjaaicnaig iran et wun huntret. Is ika ehelen aien, Leh nitasvitai unyum aiek, um auroauro um ateucse, am aged fifte. 7Is lep ika ehelen is ethi aien, As eti aru inhe aiek? Is ika aien, Hwiit an nipjinitai asjaaicnaig iran et wun huntret. Is ika ehelen aien, Leh nitasvitai unyum aiek, um aged eete. 8Is imyiahpas naheca auatatimi iyehki a natimi alupas o un, va nedo arapakau o un: et esjilid narapakau o atimi an nobohtan, va niji itai ura, irai arapakau o atimi lah. 9Ek asaig ehelemia ainyak mika, Akumu aiheuc va atimi aijaua mika eri apa unyimia ara irai padiaig efaifa; va aku wit emesmas aijaua, erupu leh pan caua ara irai imnim inyi amen irai iji mesese. 10Aien et ago nedo inivaijec aien irai itai tintin, etpu ago nedo inivaijec aien irai itai esjilid: aien et ago nedo efaifa aien irai itai tintin, etpu lep ago nedo efaifa aien irai itai esjilid. 11El eka eti ago nedo inivaijec aijaua irai padiaig efaifa, etpu ikni padiaig inivaijec imi caua a di mika aki aminjinaig aijaua? 12El eka eti ago nedo inivaijec aijaua irai iji itai oi tak atimi, etpu ikni niji itai unyimia imi caua a di? 13Et ehka vaig tah natimi nahecavaig u natimi alupas ero: etpu acen inliinmopon aien vaig et ethi, um aiyu inliinmopon vaig et ethi; etpu apol iran et ethi aien, um amcel vaig et ethi. Et ehka vai caua nahecavaig o Atua im Mamona.

14Eris lep atahaijeg nitai iji eigki asega a ilpu Farisi, eris merit vai padiaig ara: eris imyiafakahcil yin ara. 15Is ika ehele ra aien, Eka idivaig ilpu atimi upene aijaua an nuhup o atimi; ja et ato inliinmopomia a Atua: et has acen nitai ineig an nuhup o Atua, era tas upene vaig atimi. 16Is amen intas alep is aged a Moses im intas eris aged a ilpu profeta um yetpan irai Joanes: eris atupun an naopan iyehki um asuptecnaig nelcau o Atua, era miakaikai emda iran natimi asega. 17Inyi yetpan an tid iran nohatag im nobohtan, ja inyi ti yetpan an tid iran tah nuarin haklin an tas alep. 18Aien et abrai ehgan aien, um leh intaka takata, et ago ingaijid aien: aien et leh yin aien eris abrai yin, et ago ingaijid aien.

19Is eteuc natimi ikni itai is ethi, is aso yin aien an napelumai cop im napelumai yilyil, um hag alupas um imyiacitak irai iji adiat: 20is lep eteuc nihki natimi is ethi, nidan Lasarus, eris ati yin an neucse neom o un, is ateluopni yin inmacop iran, 21is ahvig aien nuari itai hegaig is etjo ithan nitai hag o natimi ikni itai iyehki: eris apan kuri um eluon inmacop iran. 22Is um mas nihki natimi iyehki, eris apos pan yin a ilpu agelo, um ati yin an riti Ebraham: is um lep mas natimi ikni itai iyehki, eris um atelmoi yin; 23is erekinman iran aien an pece has, is easji pan aien, um ecet Ebraham itac acen, im lep Lasarus an ritin. 24Is ahlaig aien, um ika, Ak etmak Ebraham, aiheuc vai nyak aiek, um abrai Lasarus, mika yi atise nilpun nupsikman aien an wai, yi aheyuyu namak; et mun erekinman irak ainyak van cop alauma ineigki. 25Is ika a Ebraham, Ak inhal unyak, namu imyiehva aiek as leh niji itai upene unyum aiek an numoh unyum, um lep leh niji itai has a Lasarus; ja et imyiacitak aien an naopan ineig, et erekinman iram aiek: 26im lep ineig, et eteuc niskanse alupas juju an niblaija: et ehka nahesvaig igcaki um apan eagko ehelemia; um lep ehka nahesvaig eagko um apam igcaki ehelema. 27Is ika aien, Ak etmak, ek ugni euc ainyak, mika an abrai yin aiek yi apan aien an nimnim o etmak: 28(era faiv a ilpu etoak;) um asuptecnaig ehele ra, va eri jim lep apam ara an nuarin nohocred ineigki. 29Is ika ehelen a Ebraham, Et amen ehele ra a Moses im ilpu profeta; erumu atahaijeg ra ara. 30Is ika aien, O’o, ak etmak Ebraham: el et ehcohos ehele ra tah natimi mas, erupu adumoij anliinmopura ara. 31Is ika ehelen aien, El era eti atahaijeg Moses im ilpu profeta ara, el et nusjai tah natimi mas, eri eti imyiisjis ninivaijec ara.

Currently Selected:

Lukas 16: ATY1863

Highlight

Copy