Lukas 18

1Is ecsipece ehele ra aien, va nitai ineigki, nikavaig, eris idim ika eri alaigaheni atimi irai iji adiat, um jim auatialidi; 2is ika aien, Is eteuc natimi alupas is ethi an nuarin-pece is ethi, is eti imtitai Atua aien, um eti eccen va atimi: 3is lep eteuc intakata is ethi an nuarin-pece iyehki is mas natamnyu un; is apan ehele natimi iyehki aien, um ika, Namu aru nedo has ineigki aiek et ago vai nyak natimi tak atimi irak. 4Is eti fi auroauro aien um aru: ja par apitac, um ika inliinmopon, Ek idim eti imtitai Atua ainyak, um eti eccen va atimi; 5ja et imyidohalav nyak a intakata ineigki, va nedo ineigki ekpu aru nedo has vai yin ainyak, vai ki jim auatialidi ainyak va nedimdumoij o un irai iji adiat. 6Is ika a Natimarid, Akumu atahaijeg aijaua intas o natimi alupas auatatimi iyehki. 7Etpu aru a Atua, ka o’o, va atimi is ehtai ra aien, era idim ugni yin ara irai iji adiat im niji epeig, et wat eti tas ehele ra aien? 8Ek asaig ehelemia ainyak mika, etpu auroauro aien um aru vai ra. Ja et wit ehcohos a Inhal o natimi, inyi idim eti ecetai nimyiisjis ninivaijec an nobohtan aien.

9Is ecsipece aien ehele atimi iji eigki eris ispara imyianiv ra nedo atoh ura ara, um amcel vai tak atimi: 10Erus apan anliin neom ahlap natimi is ero um alaigaheni; is Farisi is ethi, im lep natimi akwanaham is ethi. 11Is aiji a Farisi, um echim alaigaheni, um ika, Ak Atua, ek naaurineig vai euc ainyak, ek eti idivaig tak atimi ainyak, ilpu atimi atoraliak itai, im ilpu atimi auatatimi, im ilpu atimi ago ingaijid, im lep natimi akwanaham ineigki: 12ek ehcero atwakam ainyak irai iji wiik, um ahtai nuarin itai et ethi ira ahaiji iji itai asega et ten unyak. 13Is aiji itac acen a natimi akwanaham, is pam eti easji pan an nohatag aien; is ahpoi inritin aien, um ika, Ak Atua, aiheuc vai nyak aiek, ek atimi auatatimi ainyak. 14Ek asaig ehelemia ainyak mika, is apan an neom o un natimi ineigki, eris ika uhmu eti aru nedo has o un, ja eris ika uhpu aru nedo has o natimi iyehki: aien et ika aien et esjilid, etpu upoupo aien; ja aien et ika aien et upoupo, etpu esjilid aien.

15ERIS imyiapan ehelen ilpu halav ara, mika yi atcei pan ra aien: ja eris wat almoi nedo ineigki a ilpu atimi atahaijeg yin, eris acaiji ra ara. 16Ja is ahlaig vai ra a Iesu, um ika, Akumu ika aijaua eri ham ehelek a ilpu halav haklin, um jim acaiji ra: era idivai ra ara era amen an nelcau o Atua ara: 17et inivaijec ineig ek asaig ehelemia ainyak mika, Aien et eti leh nelcau o Atua aien et idivaig inhalav, inyi ti apan iran aien.

18Is ahodai yin natimi alupas is ethi, um ika, Ak Natimi esege upene, inki ago inhe ainyak va ekpu leh nitai umoh iran ineig inyi ti lep ti? 19Is um ika ehelen a Iesu, Na auri aiek par aniv upene nyak? et eti upene tah, Atua ache: 20na ato niji tas alep aiek, eris ika, “Jim ago ingaijid, Jim atgei natmas, Jim ehneg itai, Jim asan tas ahcil, Namu eccen vai etmam im risum aiek.” 21Is ika aien, Kis apos ji eigki asega ainyak an halav unyak um uhum pam naopan ineig. 22Is wat atahaijeg nitai iji eigki a Iesu, is ika ehelen aien, Nai eti ago nitai et ethi aiek: namu ahtai niji itai asega unyum aiek, um alupai ilpu ihki atimi, napu idim leh niji itai upene an nohatag aiek: um lep apam aiek, um apitac nyak. 23Is wat atahaijeg nitai iji eigki aien, is taigtaig alupas aien: is idim atimi ikni itai aien. 24Is wat almoi a Iesu, nikavaig, is taigtaig alupas aien, is ika aien, Et ehka va atimi iji eig era ikni itai ara napanvaig an nelcau o Atua! 25et tup upene vai kamela namiliakvaig an hed an nitel, jam ehka va natimi ikni itai napanvaig an nelcau o Atua. 26Ara eris atahaijeg ara, eris ika ara, Uhpu imyiatamaig di? 27Is ika aien, Et ehka nitai iji eigki va atimi, ja et tup upene vai Atua. 28Is ika a Pitrus, Ecris idim ude niji itai asega aijama, um ahced euc. 29Is um ika ehele ra aien, Et inivaijec ineig ek asaig ehelemia ainyak mika, Ara asega eris ude eom ura, im ilpu atmil ura, im ilpu etoara, im ilpu ehgara, im ilpu hal ura, va nelcau o Atua, 30erupu leh neruvaig esjilid ara an naopan ineig, im lep nitai umoh iran ineig inyi ti lep ti, an naopan iyek.

31IS leucse atimi is twelv aien, um ika ehele ra, Intupu idim apan Jerusalem akaija, uhpu ehneijid niji itai asega eris aged a ilpu profeta vai Inhal o natimi. 32Uhpu ati yin ehele nup urai taka pece, erupu imyiafakahcil yin ara, um abli yin, um agdei yin, 33um aredei yin, um atgei yin; ja et wit ti pan itac nadiat inyi eseij, etpu lep nusjai aien. 34Eris eti ato nitai iji eigki ara: eris adenaig intas ineigki vai ra, eris eti ato nitai iji eigki ara eris asuptecnaig.

35Is wat ubutpotet pan Jeriko aien, is ateuc an nahaijin nefalaig natimi is ethi is aupat nesganimtan, um ugni itai: 36is atahaijeg aien atimi is ahinag natgavaig an nefalaig, is ahodaig aien, um ika, Di sji eigki? 37Eris ika ehelen ara, Iesu ineigki nup an Nasared, et apam an nefalaig. 38Is ahlaig aien, um ika, Ak Iesu, Mapoi Tevit, aiheuc vai nyak. 39Ara eris uhup ara eris acaiji yin ara mika yi jim tas aien: ja is esjilid nahlaig o un, um ika, Ak Mapoi Tevit, aiheuc vai nyak. 40Is aiji a Iesu, um ika eri imyiapan yin ehelen: is wat apan ubutpotet ehelen aien, is ahodai yin aien, 41um ika, Nai merit aiek vanhe mika ki ago imi euc ainyak? Is ika aien, Ak Natimarid, ek merit ainyak mika yi lah nesganimtak. 42Is ika ehelen a Iesu, Etpu lah nesganimtam aiek: na mun cehcehe aiek va nimyiisjis ninivaijec unyum. 43Is um auroauro um lah nesganimtan aien, is ahced yin aien, um imyiahpas Ataa: eris wat ecetai atimi asega, eris imyiahpas Atua ara.

Currently Selected:

Lukas 18: ATY1863

Highlight

Copy