ZECHARIAH 9
9
Ubiomikpe Emi Esimde Mme Asua Nditɔ Israel
1MBIOMO uyo Jehovah ke isɔŋ Hadrach, ndien Damascus eyedi ebiet nduɔk-odudu esie: koro owo ye kpukpru mme esien Israel eyetiŋ enyin ke Jehovah. 2Hamath ŋko emi adianade enye ke adaŋa, ye Tyre ye Zidon ŋko, koro enye ɔfiɔkde ŋkpɔ akan. 3Tyre okonyuŋ ɔbɔp ɔkpɔsɔŋ ebiet ɔnɔ idem esie, onyuŋ okubi silver nte ntan, okubi edifɔn gold nte mbat efak. 4Sese, Ɔbɔŋ eyebin enye efep, onyuŋ ɔtɔ odudu esie ke inyaŋ; ndien enye eyeta ikaŋ. 5Ashkelon eyekut, onyuŋ efehe ndik; Gaza ŋko eyekut, onyuŋ ɔfuhɔ eti-eti, ye Ekron; koro mbuɔtidem esie enamde enye but; ndien edidem eyetak ke Gaza: owo idinyuŋ iduŋke ke Ashkelon. 6Ndien isen owo eyeduŋ ke Ashdod: nyenyuŋ nsibe ubɔŋ mme Philistine mfep. 7Ndien nyesio enye iyip esie ke inua mfep, nnyuŋ nsio enye ŋkpɔ ndek ke edet mfep; ndien enye kpa enye eyesuhɔ ɔnɔ Abasi nnyin, enye eyenyuŋ ebiet ɔbɔŋ ke Judah, Ekron eyenyuŋ ebiet mme Jebusite.
8Ndien nyenam nna-ekɔŋ ŋkan ufɔk mi ŋkuk mbak udim-ekɔŋ, ke ini enye asaŋade ebe, onyuŋ ɔnyɔŋde edi: baba owo utuk idinyuŋ isaŋke aba ke otu mmɔ ibe: koro ke emi ke nda enyin mi nse. 9O adiaha Zion, dat esit eti-eti; sio mkpo idara, O adiaha Jerusalem: sese, edidem fo eyedi ke ɔtɔ fo; enye enen, onyuŋ onim idem ke andinyaŋa; enye edi suŋ-suŋ, onyuŋ odoro ke ass, ye ke abak ass, eyen uman ass. 10Ndien nyesibe chariot mfep ke Ephraim, nsibe horse mfep ke Jerusalem, eyenyuŋ esibe utiga ekɔŋ efep: ndien enye eyetaŋa emem ɔnɔ mme idut, onyuŋ ada ubɔŋ ɔtɔŋɔde ke inyaŋ kiet tutu osim inyaŋ eken, onyuŋ ɔtɔŋɔde ke akpa tutu osim ke mme utit ererimbot. 11Ndien ama edi afo ŋko, iyip ediomi fo eyesin nsio mbon ŋkpɔkɔbi fo mfep ke obube eke mmɔŋ miduhe. 12Mbufo mbon ŋkpɔkɔbi idori-enyin, efiak edi ke ɔkpɔsɔŋ ebiet: kpa mfin emi ke ndɔhɔ nte ke ndinɔ fi utim ikaba.
13Koro ndudide Judah ke idem mi nda Ephraim nsin ke utiga, nnyuŋ ndemere nditɔ fo, O Zion, nte eŋwana ye nditɔ fo, O Greece, nnyuŋ nnim fi ke ofut owo uko. 14Ndien eyekut Jehovah ke enyɔŋ mmɔ, ndien idaŋ esie eyewɔrɔ nte obuma: ndien ɔbɔŋ Jehovah eyefuri ukorowo, onyuŋ asaŋa ke oyobio Teman. 15Jehovah mme udim eyekpeme mmɔ; ndien mmɔ eyedia, enyuŋ edigi itiat-utop; eyenyuŋ eŋwɔŋ, enyuŋ eyomo uyom nte ke wine; ndien iyip eyeyɔhɔ mmɔ nte ke bowl, ye nte inuk itie-uwa. 16Ndien Jehovah Abasi mmɔ eyenyaŋa mmɔ ke usen oro, eyenyaŋa ikɔt esie nte otu ufene: koro mmɔ edide itiat anyaŋa, eke emenerede ke enyɔŋ isɔŋ esie nte banner. 17Koro enye ɔfɔn didie! enye onyuŋ eye didie! Ibokpot eyenam mkparawa ekɔri, obufa wine eyenyuŋ anam nditɔ-iban ekpon.
Currently Selected:
ZECHARIAH 9: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.
