ZECHARIAH 8

Abasi Efibe Ufip Abaŋa Ikɔt Esie

1NDIEN uyo Jehovah mme udim edi, ete, Ntem ke Jehovah mme udim ɔdɔhɔ, ete, 2Ŋkofibe akamba ufup nnɔ Zion, ŋkonyuŋ nda akamba ifiopesit mfibe ufup nnɔ enye. 3Ntem ke Jehovah ɔdɔhɔ, ete, Mmɔnyɔŋ ndi ke Zion, nyenyuŋ ndaŋ ke ufɔt Jerusalem: ndien Jerusalem eyekere, ete, Obio akpanikɔ; ye obot Jehovah mme udim, edisana obot. 4Ntem ke Jehovah mme udim ɔdɔhɔ ete, Ŋkani iren ye ŋkani iban eyetie kaŋa ke aŋwa Jerusalem, kpukpru owo ye esaŋ ke ubɔk oto ke ata usɔŋ. 5Ndien nditɔ-iren ye nditɔ-iban eyenyuŋ eyɔhɔ ke aŋwa obio emi, ke ebre mbre ke aŋwa esie.

6Ntem ke Jehovah mme udim ɔdɔhɔ, ete, Koro eyedi utibe ŋkpɔ ke enyin mbio emi esuhɔde ke ini oro: nte eyenyuŋ edi utibe ŋkpɔ ke enyin mi? Jehovah mme udim ɔdɔhɔ. 7Ntem ke Jehovah mme udim ɔdɔhɔ, ete, Sese, ami nyenyaŋa ikɔt mi ke idut edem usiaha-utin, ye ke idut usop-utin mfep; nnyuŋ nda mmɔ ndi, 8ndien mmɔ eyeduŋ ke ufɔt Jerusalem: ndien mmɔ eyedi ikɔt mi, ami nyenyuŋ ndi Abasi mmɔ ke akpanikɔ ye ke edinen ido.

9Ntem ke Jehovah mme udim ɔdɔhɔ, ete, Yak ubɔk esɔŋ mbufo emi ke mme usen emi edikopde ikɔ emi ke inua mme prophet oro ekedude ke usen oro eketɔŋɔde ndibɔp ufɔk Jehovah mme udim, kpa temple, man ediɔŋ enye. 10Koro ke mika-ikemke kaŋa ke mme usen oro, ŋkpɔ-eyen-utom owo ikoduhe, ŋkpɔ-eyen-utom unam ikonyuŋ iduhe; nnanenyin oro ikonyuŋ iyakke baba owo kiet eke odukde onyuŋ ɔwɔrɔde, okut ifure: ndien ndɔŋ kpukpru owo, 11nte eŋwana kiet ye kiet. Edi ke emi ami ndinamke ye mbio emi esukde, nte emi ŋkanamde ke akpa ini: emi edi uyo Jehovah mme udim. 12Koro mkpasip eyetɔt; vine eyenɔ mfri esie, isɔŋ eyenyuŋ ɔnɔ mbuŋwum esie, ikpa-enyɔŋ eyenyuŋ ɔnɔ mbara esie; ndien nyenam mbio emi esuhɔde eda kpukpru ŋkpɔ emi enyene. 13Ndien ama ekem, kpa nte mbufo ekedide ŋkpɔ isuŋi ke otu mme idut, O ufɔk Judah, ye ufɔk Israel: kpa ntre ke ndiŋyaŋa mbufo, ndien mbufo eyekabare edi ŋkpɔ eridiɔŋ. 14Mbufo ekufeŋe ndik: yak ubɔk mbufo esɔŋɔ. Koro ntem ke Jehovah mme udim ɔdɔhɔ, ete, Kpa nte ŋkerede ndinam idiɔk ye mbufo ke ini mme ete mbufo ekeyatde mi esit, Jehovah mme udim ɔdɔhɔ, ndien utuaha mkpɔfiɔk: 15kpasuk ntre ke ŋkekere ke ini emi ndifɔn ido ye Jerusalem ye ufɔk Judah. Mbufo ekufehe ndik. 16Mme mmɔ emi edi ŋkpɔ eke mbufo edinamde: etiŋ akpanikɔ kiet ye kiet; enyuŋ ekpe ikpe akpanikɔ ye emem ke inua-otop mbufo: 17mbufo ekunyuŋ ekere idiɔk kiet ye kiet, ke esit mbufo; ekunyuŋ ema uŋwɔŋɔ nsu: koro kpukpru ŋkpɔ emi edi se ami nsuade, Jehovah ɔdɔhɔ.

18Ekem uyo Jehovah mme udim osim mi, ete, 19Ntem ke Jehovah mme udim ɔdɔhɔ, ete, Utre-udia ɔyɔhɔ ɔfiɔŋ inaŋ, ye utre-udia ɔfiɔŋ ition, ye utre-udia ɔfiɔŋ itiaba, ye utre-udia ɔfiɔŋ duop, eyedi ini idara ye mbre ufɔk Judah, ye nti usɔrɔ. Mbufo ema ndien akpanikɔ ye emem.

20Ntem ke Jehovah mme udim ɔdɔhɔ ete, Ediwak owo ye mme andiduŋ ediwak mme idut eyesuk edi: 21ndien mme andiduŋ obio kiet eyeka obio eken, ete, Eyak nnyin ikutre ndika ŋkekpe Jehovah ubɔk, ndinyuŋ nyom Jehovah mme udim: ami ŋko nyenyuŋ ŋka. 22Ndien ediwak owo ye mkpɔsɔŋ mme idut eyedi ndiyom Jehovah mme udim ke Jerusalem, ndinyuŋ ŋkpe Jehovah ubɔk. 23Ntem ke Jehovah mme udim ɔdɔhɔ ete, Ke mme usen oro ke owo duop eke etode ke kpukpru usem mme idut edimum, kpa mmɔ edimum eyen Judah kiet utɔŋ ɔfɔŋidem, ete, Eyak nnyin ika ye mbufo: koro nnyin imokop ite ke Abasi odu ye mbufo.

Currently Selected:

ZECHARIAH 8: ENA

Highlight

Copy