ZECHARIAH 7

Abasi Asua Ɔnɔ Utre-Udia Abiaŋa

1EDIKEM ke ɔyɔhɔ isua Darius edidem inaŋ, uyo Jehovah osim Zechariah, ke ɔyɔhɔ usen inaŋ, ke ɔfiɔŋ usukkiet, kpa ke Chislev; 2ke ini Bethel edɔŋde Sharezer ye Regemmelech ye ikɔt mmɔ, ete ekpe Jehovah ubɔk: 3enyuŋ edɔhɔ mme oku emi edude ke ufɔk Jehovah mme udim, ye mme prophet ŋko, ete, Nte nyesuk ntua eyet ke ɔyɔhɔ ɔfiɔŋ ition, nnyuŋ ndianare idem mi mfep, nte ŋkanamde ediwak isua emi?

4Ndien uyo Jehovah mme udim osim mi, ete, 5Dɔhɔ ofuri mbon isɔŋ ye mme oku, ete, Ke ini mbufo etrede udia, enyuŋ etuade ke ɔyɔhɔ ɔfiɔŋ ition, ye ke ɔyɔhɔ ɔfiɔŋ itiaba, ke ofuri isua ata ye duop emi, nte mbufo eketre udia enɔ mi, kpa mi? 6Ndien ŋko ke ini mbufo ediade enyuŋ eŋwɔŋde, nte idige mbufo edia, nte idige mbufo ŋko enyuŋ eŋwɔŋ? 7Nte mme mmɔ emi idige ikɔ oro Jehovah ɔkɔkwɔrɔde ke ubɔk mme akpa prophet, ke ini eduŋde Jerusalem kaŋa, enye onyuŋ odude ke ifure, ye mme obio esie emi ekande enye ekuk, enyuŋ eduŋ edem usuk ye unaisɔŋ mben inyaŋ? 8Ndien uyo Jehovah osim Zechariah, ete, 9Ntem ke Jehovah mme udim ɔdɔhɔ, ete, Mbufo ekpe ikpe ke akpanikɔ, yak kiet onyuŋ anam mfɔn ye mbɔm ye eken. 10Mbufo ekunyuŋ etuk mme ebe-akpa, ye eyen-akpa, ye esen owo, ye eyen ubuene; mbufo ekunyuŋ eduak idiɔk kiet ye kiet ke esit mbufo. 11Ndien mmɔ inyimeke ndikpaŋ utɔŋ, edi ekpa edem, enyuŋ esɔŋ ibuot, enyuŋ enam utɔŋ mmɔ edobi, man ekukop. 12Mmɔ enyuŋ enim esit mmɔ nte itiat adamant, man ekukop mbet ye ikɔ oro Jehovah akadade spirit esie ɔnɔ ke ubɔk mme akpa prophet: ndien akwa iyaresit oto Jehovah mme udim. 13Ndien edikem, kpa nte enye okotde, ndien mmɔ mikopke; kpa ntre ke mmɔ ekekot, ndien ami ŋkopke, Jehovah mme udim ɔdɔhɔ: 14ndien ami nsuan mmɔ nnyeŋe ke otu kpukpru mme idut emi mmɔ mifiɔkke: ndien isɔŋ emi ana ikpikpu ke edem mmɔ: owo isaŋake ibe, inyuŋ ifiakke edem: mmɔ enyuŋ enam edifɔn isɔŋ emi akabare edi ikpikpu.

Currently Selected:

ZECHARIAH 7: ENA

Highlight

Copy