ZECHARIAH 10

Abasi Afak Ikɔt Esie

1MBUFO ebeŋe Jehovah edim ke ini akpatre edim: Jehovah anam mineŋ-mineŋ, ndien enye eyeda ɔkpɔsɔŋ edim ɔnɔ mmɔ, ɔnɔ kpukpru owo mbiet iŋwaŋ. 2Koro teraphim etiŋde idiɔk-ŋkpɔ, mbia-idiɔŋ enyuŋ ekut nsu, enyuŋ etiŋ nsu-nsu ndap; mmɔ edɔŋ owo esit ikpikpu: oro esin mmɔ edaŋa nte otu ufene, enyin anam mmɔ, koro baba owo kiet eke ɔbɔkde mmɔ miduhe. 3Iyaresit mi ofiop ye mme andibɔk oro: ami nnyuŋ nnɔ okpo ebot ufen: koro Jehovah mme udim ekerede otu erɔŋ esie kpa ufɔk Judah, onyuŋ onimde mmɔ ke ediye horse esie ke ekɔŋ. 4Itiat inuk oto enye, ntok oto enye, utiga ekɔŋ oto enye, kpukpru mbon-utuk ŋko-ŋko eto enye.

5Ndien mmɔ eyebiet mbon-uko eke edigide owo ke ekɔŋ nte mbat efak: mmɔ eyenyuŋ eŋwana ekɔŋ, koro Jehovah odude ye mmɔ: eyenyuŋ esin mme andi-doro horse but.

6Nyenyuŋ nnam ufɔk Judah ɔsɔŋ, nnyuŋ nyaŋa ufɔk Joseph, nnyuŋ nyak mmɔ eduŋ: koro mmatua mmɔ mbɔm: ndien mmɔ eyetie kpa nte ŋkpɔ eke mmeŋkemenke mmɔ nduɔk: koro ami ndide Jehovah Abasi mmɔ, ami nyenyuŋ nyere mmɔ. 7Ndien Ephraim eyekabare ebiet owo uko, esit eyenyuŋ adat mmɔ nte ke wine; ndien nditɔ mmɔ eyekut enyuŋ edat esit; esit mmɔ eyedara Jehovah. 8Nyesi ŋkot mmɔ, nnyuŋ ntaŋ mmɔ mbon; koro mmafak mmɔ: ndien mmɔ eyewak nte ekewakde.

9Ndien nyesuan mmɔ ke otu mme idut: ndien mmɔ eyetie ke nnyan idut eti mi; mmɔ eyenyuŋ edu uwem ye nditɔ mmɔ, enyuŋ efiak edem edi. 10Ndien nyeda mmɔ ke isɔŋ Egypt mfiak ndi, nnyuŋ ntaŋ mmɔ ke Assyria mbon; nnyuŋ nda mmɔ ndi ke isɔŋ Gilead ye Lebanon; ndien idikwe ebiet inɔ mmɔ. 11Ndien enye eyesaŋa ke inyaŋ ukut ebe, onyuŋ amia odut ke inyaŋ, ndien kpukpru udem ke Nile eyesat: ndien enye eyesuhɔre iseri Assyria onim; mmɔnyɔ Egypt eyenyuŋ adaha. 12Nyenyuŋ nnam mmɔ esɔŋ ke Jehovah; ndien mmɔ eyesaŋa ke enyiŋ esie, ke edi Jehovah ɔdɔhɔ.

Currently Selected:

ZECHARIAH 10: ENA

Highlight

Copy