ZECHARIAH 11
11
Ubiomikpe Mme Mmɔ Emi Efikde Owo
1O LEBANON, berere mme itim fo, man ikaŋ ata mme cedar fo. 2Seme, O cypress; koro cedar ɔduɔde; koro ata ikpɔ owo etakde. Mbufo mme ofriyo Bashan eseme; koro ɔkpɔsɔŋ akai ɔsuhɔrede. 3Kop! uyom eseme mme ekpemerɔŋ; koro ubɔŋ mmɔ atakde: kop! uyom ŋkuni mkparawa lion; koro iseri Jordan atakde.
4Ntem ke Jehovah Abasi mi ɔdɔhɔ ete, Bɔk ufene eke ediwotde: 5emi mme andinyene mmɔ ewotde mmɔ, ndien mibatke idem mmɔ ke mme edue-isop: ndien mmɔ eke enyemde mmɔ edɔhɔ ete, Ekɔm Jehovah; koro mforode: mme ekpeme mmɔ inyuŋ ituaha mmɔ mbɔm. 6Koro mmendituaha aba mme andiduŋ isɔŋ emi mbɔm, Jehovah ɔdɔhɔ: ndien, sese, ami nyeda kpukpru owo kiet kiet nsin mbɔhiduŋ mmɔ ke ubɔk, ye ke ubɔk edidem mmɔ: ndien mmɔ eyesuan obio, ami ndinyuŋ nsioho owo ke ubɔk mmɔ. 7Ndien ami mbɔk ŋkpri ufene eke ediwotde, kpa ata ubuene otu ufene. Ndien nda esaŋ iba ke idem mi, nsiɔ kiet enyin Uyai, nsio kiet eken enyiŋ Ubɔp-ŋkpɔ; ntem ke mbɔk ufene oro. 8Ndien nsibe mme ekpemerɔŋ mbita mfep ke ɔfiɔŋ kiet; ndien esit mi asua mmɔ, esit mmɔ onyuŋ asua mi. 9Ndien ndɔhɔ nte, Ndibɔkke mbufo: se ikpade yak akpa; yak enyuŋ esibe se eyomde ndisibe efep; ndien ama edi se isuhɔde, yak kiet ata obukidem kiet eken.
10Ndien nda esaŋ mi, kpa Uyai, nnyuŋ nsibe enye, man mbiat ediomi mi emi ŋkodiomide ye kpukpru mme idut. 11Ntem ke enye abiara ke usen oro: ndien ntem ke mme ubuene otu ufene emi esede mi, edifiɔk ete ke enye edi uyo Jehovah. 12Ndien ndɔhɔ mmɔ, nte, Ama ɔfɔn mbufo ke enyin, mbufo enɔ mi utip mi: midige ntre, mbufo etre ndinɔ. Ndien mmɔ edomo shekel silver edip ye duop enɔ ke utip mi. 13Ndien Jehovah ɔdɔhɔ mi, ete, Men enye duɔk nɔ obot-eso, ata akwa ekɔm-urua emi mmɔ ekɔmde mi. Ndien mmen silver edip ye duop oro nduɔk ke ufɔk Jehovah nnɔ obot eso.
14Ndien nsibe esaŋ mi eken oro, kpa Ubɔp-ŋkpɔ, man mbiat iman ke ufɔt Judah ye Israel.
15Ndien Jehovah ɔdɔhɔ mi, ete, Tɔŋɔ ntak bɔ ŋkpɔ utom ndisime ekpemerɔŋ ke idem fo. 16Koro, sese, ami mmɔŋ ndemere ekpem-erɔŋ ke isɔŋ emi, enye idisehe se ibiarade, idiyomke se ebinde efep, inyuŋ ikɔkke se idade unan, inyuŋ ibɔkke mmɔ eke esɔŋɔde; edi eyeta unam mmɔ eke ekponide, onyuŋ osio mmɔ mbara ukot. 17Osuk ɔdiɔk ɔnɔ obukpo ekpeme-ufene! ofut eyedoro enye ke ubɔk, ye ke enyin nnasia esie! Ubɔk esie eyekpa, eyenyuŋ etibi enye enyin nnasia.
Currently Selected:
ZECHARIAH 11: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.
