ŊWED MME PSALM 35

Abasi Mbɔk Nyaŋa Mi Sio ke Ubɔk Mme Asua

Eke David.

1O JEHOVAH, nam ikɔ ye mmɔ eke enamde ikɔ ye ami: ŋwana ekɔŋ ye mmɔ eke eŋwanade ye ami. 2Da otu-ekɔŋ ekpri ye akamba, nyuŋ daha da di nyaŋa mi. 3Nyuŋ sio eduat, nyuŋ siri usuŋ biɔŋɔ mmɔ eke ebinede mi: dɔhɔ ukpɔŋ mi, ete, “Ami ndi andinyaŋa fi.” 4Nam mmɔ eke eyomde ukpɔŋ mi ekut but ye esuene: yak mmɔ eke eduakde idiɔk enɔ mi, efiak edem enyuŋ etimere. 5Yak mmɔ etie nte mbio ke iso ofum: yak angel Jehovah onyuŋ onuk mmɔ eka. 6Yak usuŋ mmɔ okim onyuŋ ɔfiɔnɔ: yak angel Jehovah onyuŋ ebin mmɔ. 7Koro mmɔ edipde obube iyire mmɔ enɔ mi ke inyeneke ntak; mmɔ etibi ukpe enɔ ukpɔŋ mi, ke inyeneke ntak.

8Yak nsobo eke enye mifiɔkke osim enye: yak iyire esie emi enye odipde omum enye: yak enye ɔduɔ ke esit osobo. 9Ndien ukpɔŋ mi eyedara Jehovah; erinyaŋa esie eyenem mi. 10Kpukpru mme ɔkpɔ mi eyedɔhɔ, ete, Jehovah, anie ebiet fi, emi osiode owo ukut ke ubɔk owo eke ɔsɔŋde akan enye? (Ke osio) owo ukut ye ubuene ke ubɔk owo eke obumede enye?

11Mbon afai edaha eda nte ntiense; mmɔ ebup mi ŋkpɔ eke mme mfiɔkke. 12Mmɔ eda idiɔk esio mi usiene eti, ebɔ ukpɔŋ mi ŋkpɔ.

13Edi ama edi ami, ke ini mmɔ edɔŋɔde, nsine ɔfɔŋ-ikpo: nsuk ukpɔŋ mi ke utre-udia; ndien mkpe-ubɔk mi eyefiak oduk mi ke ikpanesit. 14Ŋkasaŋa nte enye ekpedide ufan mi ye eyen-eka mi: nnuhɔ, ntie mbukpisi nte owo eke atuade eka esiemɔ.

15Edi iduɔ mi adat mmɔ esit, mmɔ enyuŋ esop idem, mbukpo owo esop idem ebaŋa mi, ndien mfiɔkke: ewai inyuŋ idopke. 16Ke otu mme oburobut owo eke ebrede mbre udia, mmɔ eta edet ese mi.

17O Ɔbɔŋ, adaŋa ini didie ke afo editie ese? Sio ukpɔŋ mi ke nsobo eke mmɔ esobode, sio ikpɔk idem mi ke ubɔk mme lion. 18Nyekɔm fi ke akwa esop: nyetoro fi ke otu ediwak otu owo. 19Kuyak mme asua mi, mbon nsu, edat esit ebaŋa mi: kuyak mmɔ eke esuade mi ke ikpikpu eyip enyin. 20Koro mmɔ mitiŋke ikɔ emem: edi ekere ikɔ nsu etuk suŋ-suŋ owo ke obio. 21Mmɔ eŋwaŋade inua mmɔ ese mi, ke edɔhɔ ete, Aha, aha, enyin nnyin omokut.

22O Jehovah afo omokut: kudop uyo: O Ɔbɔŋ, kukpɔŋ mi anyan usuŋ. 23Men idem, nyuŋ demere kpe ikpe mi, O Abasi mi, ye Ɔbɔŋ mi, biere ikɔ mi. 24Kpe ikpe mi ke edinen ido fo, O Jehovah Abasi mi; kunyuŋ uyak mmɔ edat esit ebaŋa mi. 25Kuyak mmɔ edɔhɔ ke esit mmɔ ete, Ah, nnyin iyom ntre: kuyak mmɔ edɔhɔ, ete, “Nnyin imemen enye.” 26Yak mmɔ eke ukut mi adatde mmɔ esit, ekut but ye esuene ini kiet; yak mmɔ eke eburede mbure ebaŋa mi eda but ye ndutime esine ke idem. 27Yak mmɔ eke emade edinen ikɔ mi ekwɔ enyuŋ edara; yak mmɔ enyuŋ edɔhɔ kpukpru ini, ete, Yak ekpono Jehovah, emi amade ifure owo esie. 28Ndien edeme mi eyetiŋ eti ido fo, ye itoro fo, ofuri usen.

Currently Selected:

ŊWED MME PSALM 35: ENA

Highlight

Copy