ŊWED MME PSALM 34

Nɔ Abasi Ekɔm ke Edinyaŋa Emi Enye Anyaŋade Owo Osio ke Idiɔk

Eke David, ke adaŋoro enye anamde ŋkpɔ nte ibuot esie abiarade ke iso Abimelech, emi ebinde enye efep, ndien enye ɔnyɔŋ.

1NYEKƆM Jehovah kpukpru ini: itoro esie eyesuk atak mi ke inua. 2Ukpɔŋ mi eyeda Jehovah obure mbure: mbon nsukidem eyekop, enyuŋ edara. 3Mbufo etiene mi ekpono Jehovah, eyak nnyin inyuŋ itoro enyiŋ esie ɔtɔ kiet.

4Ŋkoyom Jehovah, ndien enye eyere mi, onyuŋ osio mi ke kpukpru se ndigede. 5Mmɔ ekewuk enyin ese enye, ndien iso aŋwaŋade mmɔ: ndien mmɔ ikwe but ke iso.

6Eyen ukut emi ekeseme, ndien Jehovah okop, onyuŋ anyaŋa enye osio ke kpukpru nnanenyin esie. 7Angel Jehovah ana akan mmɔ eke ebakde enye okuk, onyuŋ anyaŋa mmɔ.

8O mbufo etabi, enyuŋ ese nte Jehovah ɔfɔnde: ɔfɔfɔn ɔnɔ owo eke eberede idem ye enye. 9Mbufo, nti ikɔt Jehovah, ebak enye: koro mmɔ eke ebakde enye 10minanake baba ŋkpɔ kiet. Mme lion enana udia, enyuŋ etie biɔŋ: edi mmɔ eke eyomde Jehovah idinanake baba eti ŋkpɔ kiet.

11Mbufo nditɔwɔŋ, edi ekop uyo mi: nyeteme mbufo eteŋe Jehovah. 12Edi anie owo ke itɔŋ uwem ɔdɔŋ enye, ke ama ini eke okutde nti ŋkpɔ? 13Kpeme edeme fo ke idiɔk, kpeme mkpɔk-inua fo ke abiaŋa. 14Wɔŋɔre kpɔŋ idiɔk, nyuŋ nam eti: yom emem, nyuŋ bine enye.

15Enyin Jehovah ese mbon eti ido, utɔŋ esie onyuŋ ɔbiɔŋɔ ɔnɔ eseme mmɔ. 16Jehovah owuk iso ese mme anam-idiɔk, onyuŋ osibe se edade eti mmɔ ke ererimbot efep. 17Mme nti owo eseme, ndien Jehovah okop, onyuŋ osio mmɔ ke kpukpru nnanenyin mmɔ.

18Jehovah emekpere mmɔ eke esit ɔbuŋɔde mmɔ; onyuŋ anyaŋa mmɔ eke esit ɔduɔde. 19Ediwak ukut esim eti owo; edi Jehovah osio enye ke mmɔ kpukpru. 20Enye ekpeme kpukpru mme ɔkpɔ esie: baba mmɔ kiet ibuŋɔke. 21Idiɔk eyewot idiɔk owo: ndien mmɔ eke esuade mbon eti ido edue isop. 22Jehovah afak ukpɔŋ ikɔt esie: ndien baba owo kiet eke eberede idem mmɔ ye enye, iduehe isop.

Currently Selected:

ŊWED MME PSALM 34: ENA

Highlight

Copy