MARK 7

Ukpep Ŋkpɔ Item Owo; Mbuɔtidem Aŋwan Syria Kiet

(Mt 15.1-9)

1EKEM mme Pharisee ye ndusuk mme scribe, emi ekotode ke Jerusalem, esop idem etiene Enye; 2mmɔ enyuŋ ekut ete ndusuk mbet Esie ke edia udia mmɔ ye edidehe ubɔk, oro edi, ye ubɔk eke miyetke. 3Koro mme Pharisee ye kpukpru mme Jew idiaha ŋkpɔ, ibɔhɔke mmɔ etotim eyet ubɔk, man emum item mbiowo ekama: 4ndien ke ini mmɔ etode ke urua edi, mmɔ idiaha ŋkpɔ ke miyereke mmɔŋ: ediwak ido efen enyuŋ edu eke mmɔ ebɔde emum ekama, nte eriyet cup ye eso ye ŋkpɔ okpoho. 5Mme Pharisee ye mme scribe ndien ebup Enye ete, Nsinam mbet Fo misaŋake ke item mbiowo, edi ediade uyo ye ubɔk eke edehede? 6Edi Enye ɔdɔhɔ mmɔ ete, Isaiah ototim etiŋ nte prophet abaŋa mbufo, mbon mbubik, nte ewetde ete,

Mbio emi ekpono Mi ke mkpɔk-inua mmɔ,

Edi esit mmɔ ada nsan-nsan ye Ami;

7 Edi mmɔ ekpono Mi ikpikpu,

Sia ekpepde item owo ke ukpep-ŋkpɔ mmɔ.

8 Mbufo emɔkpɔŋ ibet Abasi edimum item owo ekama. 9Enye onyuŋ ɔdɔhɔ mmɔ ete, mbufo etim esin ibet Abasi, man mbufo enim item mbufo. 10Koro Moses ɔkɔdɔhɔ ete, Kpono usɔ ye uka; ŋko, Owo emi etiŋde idiɔk adian ete mme eka, okutre ndikpa: 11edi mbufo ete, Owo ama ɔdɔhɔ ete mme eka, ete, Se ŋkpadade mfɔn fi ufɔn edi Corban (oro edi, mmayak enye nnɔ Abasi), 12mbufo iyakke enye anam baba ŋkpɔ kiet ɔnɔ ete mme eka esie aba: 13ntem ke mbufo enam ikɔ Abasi ɔwɔrɔ ikpikpu oto ke item eke mbufo ekɔnɔde; mbufo enyuŋ enanam ediwak nkpɔ emi etiede ntem. 14Ndien Enye ɔtɔŋɔ ntak okot otu owo edi, onyuŋ ɔdɔhɔ mmɔ ete, Kpukpru mbufo ekop uyo Mi, enyuŋ etim efiɔk: 15baba ŋkpɔ kiet eke otode to oduk owo ke idem ikemeke ndisabare owo: 16edi ŋkpɔ eke ɔwɔrɔde owo ke idem, oro asabare owo. 17Ekem ke ini Enye ama ɔkpɔŋ otu owo oduk ke ufɔk, mbet Esie ebup Enye ebaŋa ŋke emi. 18Ndien Enye ɔdɔhɔ mmɔ ete, Nte mbufo nde emanana ifiɔk ntre? Nte mbufo ikwe ite ŋkpɔ ekededi, eke otode to oduk owo ke idem, ikemeke ndisabare enye; 19koro midukke ke esit esie, edi oduk ke idibi esie, onyuŋ ɔwɔrɔ ke ufɔk ekwe? ntre ke Enye owut ete kpukpru udia esana. 20Enye onyuŋ ɔdɔhɔ ete, Se iwɔrɔde owo ke idem edi se isabarede owo. 21Koro mme idiɔk ekikere eto ke esit owo ewɔŋɔ, ye use, inɔ, 22ye obom, ye efibe, ye idiɔk itɔŋ, ye oburobut ido, ye abiaŋa, ye obukpo ido, ye erise owo idiɔk enyin, ye isuŋi, ye iseri, ye ndisime: 23kpukpru mme idiɔk ŋkpɔ emi eto owo ke esit ewɔŋɔ, enyuŋ esabare owo.

24Ekem Enye adaha do, aka ke adaŋa Tyre ye Sidon. Enye onyuŋ oduk ke ufɔk, iyomke owo ɔfiɔk: ndien Enye ikemeke ndidibe. 25Edi idaha oro ŋwan kiet, emi eyen esie aŋwan enyenede edidehe spirit, okop abaŋa Enye, onyuŋ oduk edi ediduɔ Enye ke ukot 26Ŋwan oro edi Greek, oto idut Syrophoenicia. Enye ekpe ye Jesus ete ebin demon osio ke idem eyen imɔ 27Edi Jesus ɔdɔhɔ enye ete, Yak nditɔ ebem iso edia eyuhɔ: koro idotke ndimen uyo nditɔ nduɔk nnɔ mme ebua. 28Edi ŋwan ɔbɔrɔ Enye ete, Omodot, Ɔbɔŋ; kpa mme ebua ke idak okpokoro edadia ŋkeŋe udia nditɔ. 29Jesus ete enye, Kabaŋa ikɔ oro nyɔŋ ufɔk; demon ɔmɔwɔrɔ eyen fo ke idem. 30Ndien enye adaha ɔnyɔŋ ufɔk, okut eyen esie anade ke mkpana, ye nte demon ama ɔkɔwɔrɔ.

31Ekem Jesus ɔtɔŋɔ ntak adaha ɔkpɔŋ adaŋa Tyre, asaŋa ke Sidon ebe ke ufɔt adaŋa Decapolis, edi ke Inyaŋ Galilee. 32Ndien mmɔ eda owo inan, emi mikemeke nditim ntiŋ ikɔ esɔk Enye; enyuŋ ekpe Enye ubɔk ete edidori enye ubɔk ke idem. 33Jesus ɔkpɔŋ otu owo, ada owo oro ke idem esie ikpɔŋ, esin enye nnuenubɔk ke utɔŋ, onyuŋ ɔkɔk etap, otuk enye ke edeme; 34onyuŋ emenere enyin ese enyɔŋ, omum mmum, onyuŋ ɔdɔhɔ enye ete, Ephphatha, oro edi, Yak esirere. 35Ndien utɔŋ esie esirere, uruk edeme esie onyuŋ atara, ndien enye etiŋ ikɔ iŋwaŋ-iŋwaŋ. 36Edi Enye ɔsɔŋɔ ɔnɔ mmɔ uyo ete, Ekutiŋ enɔ ndomo owo kiet, edi adaŋa nte Enye ɔnɔnɔ uyo, ntre ke mmɔ edɔdiɔŋ esuan mbuk oro ekan. 37Ndien enyene mmɔ ndyɔ ebe adaŋa, mmɔ enyuŋ edɔhɔ ete, Enye ototim anam kpukpru ŋkpɔ; Enye anam kpa mme inan ekop ikɔ, mme imum enyuŋ etiŋ ikɔ.

Currently Selected:

MARK 7: ENA

Highlight

Copy