MARK 8

Jesus Ɔnɔ Owo Tosin Inaŋ Udia

(Mt 15.32-39)

1KE mme usen oro, ke ini akwa otu etɔŋɔde ntak edu, mmɔ minyuŋ inyeneke se ediade, Enye okot mbet Esie, onyuŋ ɔdɔhɔ mmɔ ete, 2Mmatua otu owo emi mbɔm, koro ke emi mmɔ etiede ye Ami ke usen ita, minyuŋ inyeneke se ediade: 3ndien edieke nnamde mmɔ esaŋa ye biɔŋ enyɔŋɔ ufɔk, mmɔ eyekpa mba ke usuŋ; ndusuk mmɔ enyuŋ eto anyan ebiet. 4Ndien mbet Esie ebɔrɔ Enye ete, Owo edikeme ndida uyo ke mmɔŋ nyuhɔ mme owo emi mi ke ebiet desert? 5Enye obup mmɔ ete, Enyene uyo ifaŋ? Mmɔ ete, Itiaba. 6Ndien Enye ɔnɔ otu owo uyo ete, Esuhɔre etetie ke isɔŋ; onyuŋ emen uyo itiaba oro, ndien, ke Enye ama ɔkɔnɔ ekɔm, obuŋ, ayak ɔnɔ mbet, ete enim ke iso mbio-obio: mmɔ enim uyo ke iso otu owo. 7Mmɔ enyuŋ enyene ndusuk ŋkpri iyak: ndien ke ini Enye ama ɔdiɔŋ mmɔ, Enye ɔdɔhɔ ete, enim mmɔ emi ŋko ke iso mbio-obio. 8Ndien mmɔ edia eyuhɔ; mmɔ enyuŋ etaŋ mbubek uyo eke esuhɔde, akpasa itiaba. 9Ibat mmɔ ekpere thousand owo inaŋ; ndien Enye anam mmɔ enyɔŋɔ. 10Idaha oro Enye ediere ke ubom ye mbet Esie, edi ke edem Dalmanutha.

11Ekem mme Pharisee ewɔŋɔ edi, etɔŋɔ ndineni eneni ye Enye; mmɔ edodomo Enye ete, Enye ɔnɔ mme imɔ idiɔŋɔ eke otode ke heaven. 12Edi Enye omum mmum ɔkpɔsɔŋ ke spirit, onyuŋ ɔdɔhɔ ete, Nsinam emana emi eyomde idiɔŋɔ? Ke akpanikɔ ke ndɔhɔ mbufo, Idinɔŋɔ emana emi baba idiɔŋɔ kiet. 13Ndien Enye ɔkpɔŋ mmɔ, ɔtɔŋɔ ntak ediere ke ubom, ebe aka ke edem oko.

14Mbet ekefre ndida uyo; mmɔ inyuŋ inyeneke uyo ibe kiet ye mmɔ ke ubom. 15Ndien Jesus ɔsɔŋɔ ɔdɔhɔ mmɔ, ete, Etiŋ enyin ekpeme idem mbak leaven mme Pharisee ye leaven Herod. 16Ndien mmɔ eneni ye kiet eken ete, Nnyin inyeneke uyo. 17Edi ke ini Jesus ɔfiɔkde, Enye ɔdɔhɔ mmɔ ete, Nsinam enenide eneni ke ntak emi mbufo minyeneke uyo? Nte mbufo ifiɔkke ŋkpɔ kaŋa, inyuŋ inyeneke ibuot? 18Nte esit mbufo amakabare ɔsɔŋ? Ke enyenede enyin, nte mbufo ikwe usuŋ? ke enyuŋ enyenede utɔŋ, nte mbufo ikopke ikɔ? nte mbufo inyuŋ itihi? 19Ke ini ŋkebuŋde uyo ition ndeme thousand owo ition, akpan mbubek uyo ifaŋ ke mbufo ekataŋ eyɔhɔ 20Mmɔ ete Enye, Duopeba. Ke ini ŋkenyuŋ mbuŋde uyo itiaba ndeme thousand owo inaŋ, ɔyɔhɔ akpasa ifaŋ ke mbufo ekataŋ mbubek uyo ke esit? Mmɔ ebɔrɔ Enye ete, Itiaba. 21Ndien Enye ete mmɔ, Nte mbufo inyeneke ibuot kaŋa?

22Ekem mmɔ edi ke Bethsaida. Ndien mmɔ eda owo nnan esɔk Enye, enyuŋ ekpe Enye ubɔk ete otuk enye. 23Ndien Enye omum nnan oro ke ubɔk, onyuŋ ada enye ɔwɔrɔ ke obio-iŋwaŋ; ndien ke Enye ama akafiari enye etap ke enyin, onyuŋ odori enye ubɔk, obup enye ete, Nte omokut ŋkpɔ? 24Owo oro emenere enyin ese, onyuŋ ɔdɔhɔ ete, Mmokut owo; koro ŋkut mmɔ esaŋade nte edide eto. 25Jesus ɔtɔŋɔ ntak odori enye ubɔk ke enyin; ndien enye owuk enyin ese ŋkpɔ, enyin esie ekabare efɔn, enye onyuŋ eneŋere okut kpukpru ŋkpɔ. 26Ekem Jesus ɔdɔŋ enye ɔnyɔŋ ufɔk, onyuŋ ɔdɔhɔ enye ete, Kuduk ke obio-iŋwaŋ oro.

27Ekem Jesus ye mbet Esie ewɔŋɔ ekeduk ke mme obio-ŋwaŋ Caesarea Philippi: ndien ke usuŋ, Enye obup mbet Esie, ete mmɔ, Mme owo edɔhɔ ete Ami ndi anie? 28Mmɔ edɔhɔ Enye ete, John Baptist; mmɔ efen ete, Elijah, edi mmɔ efen ete Owo kiet ke otu mme prophet. 29Enye obup mmɔ ete, Edi mbufo edɔhɔ ete, Ami ndi anie? Peter ɔbɔrɔ Enye ete, Afo edi Christ. 30Ndien Enye owuk mmɔ ete ekudɔhɔ baba owo kiet ebaŋa Imɔ.

31Ekem Enye ɔtɔŋɔ ndikpep mmɔ ete, Eyen owo enyene ndikut ediwak ukut; mbiowo, ye ikpɔ oku, ye mme scribe eyenyuŋ esin Enye, enyuŋ ewot Enye, ndien ke usen ita ema ebe, Enye eyeset ke mkpa. 32Enye onyuŋ etiŋ ikɔ emi aŋwa-aŋwa. Edi Peter ada Enye, ɔtɔŋɔ ndisua nnɔ Enye. 33Edi Enye ɔwɔŋɔre ese mbet Esie, asua ɔnɔ Peter, ete enye, Da ke edem Mi, Satan: koro afo ukereke ŋkpɔ Abasi, edi ekere ŋkpɔ owo. 34Ekem Enye okot otu owo ye mbet Esie edi, onyuŋ ɔdɔhɔ mmɔ ete, Owo ekededi ama oyom nditiene Mi, yak Enye otuk idem esie, onyuŋ emen cross esie etiene Mi. 35Koro owo ekededi eke oyomde ndinyaŋa uwem esie eyeduɔk enye; edi owo ekededi eke ɔduɔkde uwem esie kabaŋa Mi ye gospel, eyenyaŋa enye. 36Koro edidori owo nso edieke enye adiade ɔfuri ererimbot, ndien ada uwem esie osio isop? 37Koro nso ke owo ɔkpɔnɔ ke ibuot uwem esie? Koro owo ekededi eke okopde but ye Ami ye ikɔ Mi ke idiɔk emana use emi, 38Eyen owo eyekop but ye enye, ke ini Enye edide ke ubɔŋ Ete Esie ye ndisana angel Esie.

Currently Selected:

MARK 8: ENA

Highlight

Copy